Header Ads

ຄະນະສະເພາະກິດພີເອັສຢືນຢັນ ຈະຊອກທຸກວິທີກູ້ຄືນຜົນເສຍຫາຍໃຫ້ປະຊາຊົນ !!!






ອີງຕາມການລານຍງານຂອງ ໜັງພິມເສດຖະກິດ- ສັງຄົມ ໂດຍອ້າງຄໍາຢືນຢັນຂອງ ຄະນະສະເພາະກິດພີເອັສທີ່ຢືນຢັນ  ວ່າຈະຊອກທຸກວິທີກູ້ຄືນຜົນເສຍຫາຍໃຫ້ປະຊາຊົນ ເຖິງແມ່ນວ່າປະຈຸບັນຈະຍັງບໍ່ທັນ ເປັນທີ່ຈະແຈ້ງຕໍ່ແນວທາງໃນການຊົດເຊີຍເງິນຄືນໃຫ້ກັບປະຊາຊົນທີ່ໄດ້ຮັບຜົນກະທົບຈາກບໍລິສັດພີເອັສກໍຕາມແຕ່ຄະນະສະເພາະກິດທີ່ຖືກແຕ່ງຕັ້ງໂດຍທ່ານ ທອງລຸນ ສີສຸລິດ ນາຍົກລັດຖະມົນຕີຢືນຢັນວ່າ ຈະເຮັດທຸກຄວາມສາມາດເພື່ອຫາວິທີ ແລະມາດຕະການເກັບກູ້ຊັບສິນຄືນໃຫ້ກັບຜູ້ເສຍຫາຍ ທັງນີ້ຄະນະໄດ້ເລັ່ງທຳການສືບສວນ-ສອບສວນຂະຫຍາຍຜົນຕື່ມຫາຜູ້ຮ່ວມກະທຳຜິດມາລົງໂທດ ພ້ອມກວດຄົ້ນ, ຍຶດ ແລະອາຍັດຊັບສິນຈຳນວນໜຶ່ງທີ່ມີສ່ວນກ່ຽວພັນກັບຄະດີ ຂະນະທີ່ມາຮອດດຽວນີ້ມີຜູ້ມາຍື່ນຄຳຮ້ອງຟ້ອງແລ້ວຈຳນວນ 5.020 ຄົນ ມີມູນຄ່າເສຍຫາຍລວມທັງໝົດເກືອບ 2 ຮ້ອຍຕື້ກີບ.



ເມື່ອວັນທີ 5 ຕຸລາ 2017 ຄະນະສະ ເພາະກິດແກ້ໄຂບັນຫາບໍລິສັດພີເອັສ ໄດ້ຈັດເວທີຖະແຫຼງຂ່າວຄວາມຄືບໜ້າ ໃນການແກ້ໄຂບັນຫາບໍລິສັດພີເອັສ ຕໍ່ສື່ມວນຊົນ ຊຶ່ງທ່ານ ອາຄົມ ປຣະເສີດ ຫົວໜ້າກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ ທັງເປັນຄະ ນະສະເພາະກິດດັ່ງກ່າວເປີດເຜີຍໃຫ້ຮູ້ວ່ານັບແຕ່ເກີດມີສະຖານະການຄວາມວຸ້ນວາຍ ເນື່ອງຈາກສະມາຊິກພີເອັສລວມຕົວກັນທວງເງິນຄືນຈາກບໍລິສັດໄດ້ຜ່ອນຄາຍລົງນັບແຕ່ວັນທີ 13 ກັນຍາ ເປັນຕົ້ນມາຄະນະສະເພາະກິດໄດ້ຄົ້ນຄວ້າປຶກສາຫາລືເຖິງຂັ້ນຕອນ ແລະບາດກ້າວຕໍ່ໄປກ່ຽວກັບວິທີທາງແກ້ໄຂບັນຫາບໍລິສັເພີເອສຕາມຂະບວນການຂອງກົດໝາຍ ທັງນີ້ຄະນະສະເພາະກິດຈະເຮັດທຸກຄວາມສາມາດໃນການແກ້ໄຂເພື່ອຫຼຸດຜ່ອນຜົນເສຍຫາຍທີ່ສະມາຊິກອັບປະໂຫຍດໃນການຮ່ວມລົງທຶນນຳບໍລິສັດ ພີເອັສ.


ໂດຍຄະນະສະເພາະກິດຈະເຮັດໜ້າ ທີ່ໃນການປະເມີນສະພາບຄວາມເປັນຈິງຂອງບໍລິສັດ, ຫາວິທີການ ແລະມາດຕະ ການເກັບກູ້ຊັບສິນ, ເງິນຄຳຄືນມາຕາມເງື່ອນໄຂຄວາມສາມາດຕົວຈິງ ເພື່ອສາມາດຊົດເຊີຍເງິນຄືນໃຫ້ປະຊາຊົນເທົ່າທີ່ຈະເປັນໄປໄດ້ ແຕ່ບໍ່ແມ່ນມາຮັບພາລະ ເພື່ອໃຊ້ແທນບໍລິສັດພີເອັສ.



ທ່ານ ອາຄົມ ປຣະເສີດ ກ່າວຕື່ມວ່າ ປະຈຸບັນເຈົ້າໜ້າທີ່ຕຳຫຼວດໄດ້ເປີດການສືບສວນ-ສອບສວນ ຕໍ່ບຸກຄົນທີ່ມີສ່ວນກ່ຽວຂ້ອງໃນສະຖານສໍ້ໂກງ ແລະໄອຍະການໄດ້ອອກຄຳສັ່ງກັກຂັງພາງປະທານບໍລິສັດພີເອັສ ນາງ ສຸກນາລີ ແລະທ້າວ ປໍເຮີ ພ້ອມດ້ວຍຜູ້ຖືກຫາຈຳນວນໜຶ່ງ ເພື່ອສືບສວນ-ສອບສວນຂະຫຍາຍຜົນຫາຜູ້ຮ່ວມກະທຳຄວາມຜິດຕື່ມມາລົງ ໂທດຕາມລະບຽບກົດໝາຍ ນອກນັ້ນຄະນະສະເພາະກິດຍັງໄດ້ທຳການກວດຄົ້ນ ເຄຫາສະຖານ ພ້ອມທັງຢຶດ, ອາຍັດຊັບສິນຈຳນວນໜຶ່ງທີ່ມີສ່ວນພົວພັນກັບຄະດີສວນທຸກກິດຈະການຂອງພີເອັສແມ່ນໃຫ້ຢຸດເຊົາການເຄື່ອນໄຫວທັງໝົດ.
ຂະນະທີ່ວັນທີ 21 ກັນຍາ 2017 ກົມໃຫຍ່ຕຳຫຼວດກະຊວງປ້ອງກັນຄວາມສະຫງົບໄດ້ອອກແຈ້ງການເລກທີ 43/ຕຫຼ ເຖິງພໍ່ແມ່ປະຊົນໄດ້ຮັບຊາບກ່ຽວ ກັບໃຫ້ຜູ້ເສຍຫາຍໄປຍື່ນຄຳຮ້ອງຟ້ອງ ເພື່ອທວງເງິນຄືນຢູ່ກົມຕຳຫຼວດເສດຖະກິດ, ປກສ ນະຄອນຫຼວງແຂວງ ເມືອງ ແລະບໍລິສັດພີເອັສ ຊຶ່ງມາຮອດປະຈຸບັນ ໄດ້ຮັບຄຳຮ້ອງ ແລະເອົາຄຳໃຫ້ການໄດ້ ຈຳນວນ 5.020 ຄົນ ມູນຄ່າເສຍຫາຍ ຈຳນວນ 196 ຕື້ກີບ ທ່ານ ອາຄົມ ປຣະເສີດ ກ່າວ.



ແນວໃດກໍດີ ເພື່ອເປັນການປົກປ້ອງຜົນປະໂຫຍດຂອງຜູ້ຖືກເສຍຫາຍຄະນະສະເພາະກິດ ໄດ້ຮຽກຮ້ອງມາຍັງຜູ້ຖືກເສຍຫາຍທີ່ຍັງບໍ່ທັນຂຽນຄຳຮ້ອງຟ້ອງ ຫຼື ແຈ້ງຄວາມຕໍ່ບໍລິສັດພີເອັສກໍໃຫ້ຮີບຮ້ອນເຂົ້າມາພົວພັນໂດຍກົງກັບຄະນະສະເພາະກິດ ສ່ວນຜູ້ທີ່ຢູ່ຕ່າງແຂວງແມ່ນສາມາດຂຽນຄຳຮ້ອງຫຼືແຈ້ງຄວາມນຳເຈົ້າຫນ້າທີ່ຕຳຫຼວດຢູ່ກອງບັນຊາການເມືອງ ຫຼື ຫ້ອງຕຳຫຼວດກອງບັນຊາການ ປກສ ແຂວງນະຄອນຫຼວງ ທີ່ຕົນດຳລົງຊີວິດຢູ່ກໍໄດ້.



ທີ່ມາ: ເສດຖະກິດ- ສັງຄົມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.