Header Ads

ປກສ ແຂວງສາລະວັນ ຈັບ 2 ຜູ້ຕ້ອງຫານັດສົ່ງຢາ ພ້ອມຢຶດຢາບ້າໄດ້ 112 ເມັດ



ຕາມການລາຍງານຂ່າວ ປກສ ແຂວງສາລະວັນ ໃຫ້ຮູ້ວ່າ: ເຈົ້າໜ້າທີ່ພະແນກຕຳຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງສາລະວັນ ໄດ້ສະກັດຈັບຕົວກຸ່ມເປົ້າໝາຍລັກລອບຄ້າຂາຍຢາເສບຕິດ ທີ່ ບ້ານແສນວັງ ເມືອງສາລະວັນ ຢຶດຢາບ້າໄດ້ 112 ເມັດ ແລະກັກຕົວ 2 ຜູ້ຕ້ອງຫາ ເພື່ອນຳໄປສືບສວນຫາຜູ້ຮ່ວມຂະບວນການ.

ພະແນກຕໍາຫຼວດສະກັດກັ້ນ ແລະຕ້ານຢາເສບຕິດ ປກສ ແຂວງສາລະວັນ ໄດ້ເປີດເຜີຍວ່າ: ຕາມການແຈ້ງຂ່າວຂອງພົນລະເມືອງດີວ່າຈະມີການນັດຂາຍຢາບ້າ ທີ່ບ້ານແສນວັງ ໃນວັນທີ 4 ຕຸລາ 2017, ເຈົ້າໜ້າທີ່ຈື່ງໄດ້ເກັບກຳຂໍ້ມູນຕາມແຫຼ່ງຂ່າວ ເຫັນວ່າເປັນຄວາມຈິງ ໄດ້ນໍາກໍາລັງຕິດຕາມການເຄື່ອນໄຫວການລັກລອບຄ້າຂາຍຢາເສບຕິດ(ຢາບ້າ) ຢູ່ບ້ານແສນວັງ ເມືອງສາລະວັນ. ມາຮອດເວລາປະມານ 14:00 ໂມງ ຂອງວັນດຽວກັນ ຈື່ງພົບເຫັນເປົ້າໝາຍຂັບຂີ່ລົດມາຈອດຢູ່ບ້ານດັ່ງກ່າວ ໂດຍນຳໃຊ້ລົດເກັງສີດຳ ບໍ່ມີປ້າຍທະບຽນ. ຈາກນັ້ນເຈົ້າໜ້າທີ່ຕໍາຫຼວດຈຶ່ງເຂົ້າກວດຄົ້ນພົບເຫັນຢາບ້າຈໍານວນ 112 ເມັດ ຢູ່ໃນຖົງໂສ້ງຜູ້ຂັບຂີ່ ແລະ ໃນລົດອີກ 6 ເມັດ ຈຶ່ງກັກຕົວໄວ້ ໃນນັ້ນມີທ້າວ ໄຟວັນ ( ຈ່ອຍ ) ອາຍຸ 42 ປີ ຢູ່ບ້ານ ແສນວັງ ແລະທ້າວ ນ້ອຍ ອາຍຸ 35 ປີ ຢູ່ບ້ານຂົວເສັດ ເມືອງສາລະວັນ ໄປສອບ ສວນຂະຫຍາຍຜົນຫາຜູ້ຮ່ວມຂະບວນການນໍາກັນ. ຜ່ານການສອບສວນ, ຜູ້ກ່ຽວສະລະພາບວ່າ: ຢາບ້າຈຳນວນດັ່ງກ່າວແມ່ນໄດ້ຊື້ມາຈາກຜູ້ຮ່ວມຂະບວນການ ເພື່ອຈະເອົາໄປຂາຍໃຫ້ຜູ້ສັ່ງຊື້ ຢູ່ບ້ານແສນວັງ ແຕ່ກໍຖືກຈັບຕົວກ່ອນ. ປັດຈຸບັນຄະດີດັ່ງກ່າວຍັງຢູ່ ໃນການລວບລວມຂໍ້ມູນຫຼັກຖານຂອງເຈົ້າໜ້າທີ່ເພື່ອສືບຫາຂະບວນການ ແລະ ດຳເນີນຄະດີຕາມລະບຽບກົດໝາຍ. 

ຢ່າງໃດກໍຕາມ ປະຊາຊົນ ກໍຕ້ອງຊ່ວຍກັນເປັນຫູເປັນຕາໃຫ້ກັບເຈົ້າໜ້າທີ່ ກໍລະນີພົບເຫັນ ແມ່ນຟ້າວແຈ້ງ ຕໍ່ເຈົ້າໜ້າທີ່ຕໍາຫຼວດຈຸດໃກ້ທີ່ສຸດ ເພື່ອເຂົ້າແກ້ໄຂເຮັດໃຫ້ບັນຫາຢາເສບຕິດ ນັບມື້ຫຼຸດໜ້ອຍຖອຍລົງໄປເລື້ອຍໆ.


ທີ່ມາ : ໜັງສືພິມ ສາລະວັນ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.