Header Ads

ປກສ ເມືອງໄຊເສດຖາ ຖະແຫຼງຈັບກຸມຜູ້ກໍ່ເຫດປຸ້ນທະນາຄານ


ໃນວັນທີ 4 ຕຸລາ 2017, ກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ຖະແຫຼງການກ່ຽວກັບ ການຈັບກຸມຜູ້ຖືກຫາກໍ່ເຫດປຸ້ນໜ່ວຍບໍລິການຂອງທະນາຄານແຫ່ງໜຶ່ງຢູ່ເຂດບ້ານວຽງຈະເລີນ ເມືອງໄຊ ເສດຖາ ນະຄອນຫຼວງວຽງຈັນ ພ້ອມເງິນ 200 ລ້ານກວ່າກີບ.


ພັທ ຄຳເກີ່ງ ຈັນສຸລິມາດ ຫົວໜ້າກອງບັນຊາການ ປກສ ເມືອງ ໄຊເສດຖາ ໄດ້ຖະແຫຼງຂ່າວວ່າ: ໃນເວລາ 11:45 ໂມງຂອງວັນ ທີ 27 ກັນຍາ 2017 ເກີດເຫດຄົນຮ້າຍເປັນຊາຍ 1 ຄົນ ໄດ້ຂັບຂີ່ລົດຈັກມາຈອດຢູ່ໜ້າທະນາຄານ ແລະ ໄດ້ເອົາປືນເຂົ້າໄປປຸ້ນເອົາເງິນຢູ່ໜ່ວຍບໍລິການຂອງທະນາຄານແຫ່ງໜຶ່ງ; ຫຼັງຈາກນັ້ນເຈົ້າໜ້າທີ່ໄດ້ລົງເກັບ ກໍາຂໍ້ມູນຫຼັກຖານຢູ່ສະຖານທີ່ເກີດເຫດ ແລະ ສືບຮູ້ວ່າ: ຜູ້ກໍ່ເຫດຊື່ທ້າວ ບຸນຈັນ ຫຼື ຕຸ້ຍ ອາຍຸ 41 ປີ ພັກເຊົາຢູ່ ບ້ານດອນກອຍ ເມືອງສີສັດຕະນາກ ໄດ້ເອົາຕົວຫຼົບໜີໄປບວດຢູ່ວັດແຫ່ງໜຶ່ງເຂດເມືອງໄຊທານີ; ຈາກນັ້ນ ຕົກ ມາຮອດວັນທີ 3 ຕຸລາ 2017 ເຈົ້າໜ້າ ປກສ ເມືອງ ໄດ້ສົມທົບກັບພາກສ່ວນທີ່ກ່ຽວຂ້ອງເຂົ້າກັກຕົວຜູ້ຖືກຫາ ພ້ອມທັງກວດຄົ້ນທີ່ພັກພົບເຫັນເງິນ 40 ລ້ານກີບ, ເງິນ ບາດ 52.000 ບາດ ແລະ ເງິນ ໂດລາ 3.460 ໂດລາ ມາສອບສວນ.


ທ້າວ ບຸນຈັນ ສາລະພາບ ວ່າ: ໃນວັນ 20 ກັນຍາຜ່ານມາ, ໄດ້ຊື້ປືນປອມຢູ່ຕະຫຼາດແຫ່ງໜຶ່ງ ແລ້ວມາກໍ່ເຫດປຸ້ນ ເອົາເງິນຢູ່ໜ່ວຍບໍລິການຂອງທະນາຄານແຫ່ງໜຶ່ງໄດ້ເງິນກີບ 90 ລ້ານກີບ, ເງິນບາດ 117.850 ບາດ ແລະ ເງິນໂດລາ 10.672 ໂດລາ ແລ້ວເອົາຕົວຫຼົບໜີໄປທາງບ້ານດົງຄຳຊ້າງ ແລະ ນໍາລົດຈັກໄປດັດແປງສະພາບເພື່ອ ປົກປິດການກະທໍາຜິດ. ຫຼັງຈາກນັ້ນ ຈຶ່ງນໍາເອົາເງິນສ່ວນໜຶ່ງໄປຈ່າຍຫຼິ້ນກິນຟຸມເຟືອຍ ແລະ ເອົາຕົວຫຼົບໜີໄປ ບວດຢູ່ວັດແຫ່ງໜຶ່ງໃນເວລາຕໍ່ມາຈຶ່ງຖືກເຈົ້າໜ້າທີ່ຈັບຕົວໄດ້.

ພາບ ແລະ ຂ່າວ: ນສພ ປ້ອງກັນຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.