Header Ads

ແຜນການແຂວງເຊກອງສະຫຼຸບວຽກງານກຳມະບານປະຈຳປີ 2017 ແລະ ວາງທິດທາງປີ 2018




ເຊກອງ,ວັນທີ 03/10/2017 : ວັນທີ 2 ຕຸລາຜ່ານມານີ້ ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງເຊກອງໄດ້ຈັດກອງປະຊຸມສະຫຼຸບການເຄື່ອນໄຫວວຽກງານກຳມະບານປະຈຳປີ 2017 ແລະ ວາງທິດທາງປີ 2018 ໂດຍການເປັນປະທານຂອງທ່ານ ສົມພາ ແກ້ວດາວົງ ປະທານຮາກຖານກຳມະບານພະແນກແຜນການ ແລະ ການລົງທຶນແຂວງ, ມີຕາງໜ້າອົງການຈັດຕັ້ງມະຫາຊົນຕະຫຼອດຮອດສະມາຊິກກຳມະບານພາຍໃນພະແນກດັ່ງກ່າວເຂົ້າຮ່ວມ.



ທ່ານ ສີສຸພັນ ອິນທານຸວົງ ຄະນະຮາກຖານກຳມະບານພະແນກແຜນການ ແລະ ການລົງທຶນແຂວງໄດ້ຜ່ານບົດສະຫຼຸບເພື່ອຕີລາຄາຄືນການຈັດຕັ້ງປະຕິບັດວຽກງານຕ່າງໆຂອງຄະນະຮາກຖານກຳມະບານໃນໄລຍະຜ່ານມາ ຊຶ່ງທ່ານໄດ້ຍົກໃຫ້ເຫັນຜົນງານທີ່ພົ້ນເດັ່ນຫຼາຍດ້ານ ໂດຍສະເພາະດ້ານແນວຄິດການເມືອງສະມາຊິກກຳມະບານມີທັດສະນະຫຼັກໝັ້ນ, ຄຸນທາດການເມືອງໜັກແໜ້ນ, ມີຄວາມເຊື່ອໝັ້ນຕໍ່ການຊີ້ນຳ-ນຳພາຂອງພັກ, ມີຄວາມຮັບຜິດຊອບໃນການປະຕິບັດໜ້າທີ່ວຽກງານວິຊາການ-ວິຊາສະເພາະທີ່ໄດ້ຮັບມອບໝາຍ. ປັດຈຸບັນຄະນະຮາກຖານກຳມະບານພະແນກແຜນການ ແລະ ການລົງທຶນແຂວງມີ 4 ໜ່ວຍຂຶ້ນກັບ, ມີສະມາຊິກກຳມະບານທັງໝົດ 58 ສະຫາຍ, ຍິງ 20 ສະຫາຍ.



ສ່ວນທິດທາງແຜນການລວມໃນຕໍ່ໜ້າ, ທາງຄະນະຮາກຖານກຳມະບານພະແນກແຜນການ ແລະ ການລົງທຶນແຂວງເຊກອງຈະສຸມໃສ່ຊີ້ນຳໆພາພະນັກງານ, ສະມາຊິກກຳມະບານໃນການປະຕິບັດໜ້າທີ່ສຶກສາອົບຮົມການເມືອງນຳພາແນວຄິດ ໂດຍຖືເອົາການຈັດຕັ້ງເຜີຍແຜ່ ແລະ ເຊື່ອມຊຶມບັນດາເອກະສານຕ່າງໆຕິດພັນກັບວຽກງານກໍາມະບານ ກໍ່ຄືຂໍ້ແຂ່ງຂັນ 5 ເປັນເຈົ້າທີ່ສູນກາງສະຫະພັນກຳມະບານລາວວາງອອກ, ພ້ອມທັງ ບຸກທະລຸຢ່າງແຂງແຮງໃນການພັດທະນາຊັບພະຍາກອນມະນຸດ ທັງນີ້ ກໍເພື່ອແນໃສ່ຕອບສະໜອງຄວາມຮຽກຮ້ອງຕ້ອງການໃນການພັດທະນາເສດຖະກິດ-ສັງຄົມຂອງແຂວງໃຫ້ນັບມື້ຂະຫຍາຍຕົວ ແລະ ບັນລຸໄດ້ຕາມຄາດໝາຍແຜນການທີ່ວາງໄວ້ໃນແຕ່ລະໄລຍະ.


ພ້ອມກັນນີ້ ກອງປະຊຸມຍັງໄດ້ປ່ອນບັດຄັດເລືອກເອົາຄະນະຮາກຖານກໍາມະບານ ແລະ ຄະນະໜ່ວຍກຳມະບານທີ່ຂຶ້ນກັບ ເພື່ອສືບຕໍ່ຊີ້ນຳໆພາວຽກງານກຳມະບານພາຍໃນພະແນກແຜນການ ແລະ ການລົງທຶນແຂວງເຊກອງໃຫ້ມີຜົນສຳເລັດ.

 
ຂ່າວ-ພາບ : ສັນຍາ ແກ້ວໄຊຍະວົງ/ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.