Header Ads

ທ່າແຕງ ຍົກລະດັບຄວາມຮູ້ວຽກງານອົງການກາແດງລາວ



ຕອນເຊົ້າວັນທີ 11 ຕຸລາ 2017 ຜ່ານມານີ້ ຢູ່ທີ່ສະໂມສອນເມືອງ ທ່າແຕງ ແຂວງ ເຊກອງ ໄດ້ຈັດກອງປະຊຸມເຜີຍແຜ່ ແລະຍົກລະດັບຄວາມຮູ້ດ້ານວຽກງານອົງການກາແດງລາວ ໂດຍເປັນປະທານຂອງທ່ານ ຄໍາໄພ ສິມມາວັດ ຮອງເລຂາພັກເມືອງ ທ່າແຕງ ຜູ້ຊີ້ນໍາຂົງເຂດວັດທະນະທໍາ-ສັງຄົມ,ໃຫ້ກຽດເຂົ້າຮ່ວມຂອງທ່ານ ພອນຄໍາ ແກ້ວວິໄລ ຫົວໜ້າກອງໂຄສະນາ-ຂົນຂວາຍຊອກຫາແຫຼ່ງທຶນອົງການກາແດງລາວສູນກາງ, ມີທ່ານ ໄພວັນ ສຸກກະເສີມ ຮອງຫົວໜ້າອົງການກາແດງແຂວງ ເຊກອງ, ຫົວໜ້າ ແລະຮອງຫ້ອງການ, ອໍານວຍການໂຮງໝໍ, ນາຍ ແລະພົນທະຫານ, ຕໍາຫຼວດ,ພະນັກງານລັດຖະກອນ ພ້ອມດ້ວຍນ້ອງນັກຮຽນ 1 ຮ້ອຍກວ່າຄົນເຂົ້າຮ່ວມ.



ທ່ານ ພອນຄໍາ ແກ້ວວິໄລ ຫົວໜ້າກອງໂຄສະນາ-ຂົນຂວາຍຊອກຫາແຫຼ່ງທືນອົງການກາແດງລາວສູນກາງກ່າວວ່າ: ຈຸດປະສົງຂອງການເຜີຍແຜ່ ແລະຍົກລະດັບຄວາມຮູ້ຂອງວຽກງານອົງການກາແດງລາວໃນຄັ້ງນີ້ ເພື່ອຍົກລະດັບຄວາມອາດສາມາດ ແລະຜັນຂະຫຍາຍຄວາມຮູ້, ຄວາມເຂົ້າໃຈໃຫ້ແກ່ພະນັກງານລັດຖະກອນໃນທຸກຂະແໜ່ງການ ພ້ອມດ້ວຍພໍ່ແມ່ປະຊາຊົນລາວບັນດາເຜົ່າ ແລະນ້ອງນັກຮຽນ ໄດ້ຮັບຮູ້-ເຂົ້າໃຈປະຫວັດຄວາມເປັນມາ, ໜ້າທີ່ ແລະ ພາລະບົດບາດຂອງອົງການກາແດງລາວໃນແຕ່ລະໄລຍະ,ນັບແຕ່ປີ 1955-1975 ກ່ຽວກັບວຽກງານບັນເທົາທຸກຜູ້ໄດ້ຮັບເຄາະຮ້າຍຈາກໄພພິບັດຕ່າງໆ, ຜູ້ທຸກຍາກດ້ອຍໂອກາດ, ຊ່ວຍປົກປັກຮັກສາສຸຂະພາບປະຊາຊົນບັນດາເຜົ່າ,ປະກອບສ່ວນຕັ້ງໜ້າໃນຂະບວນການມະນຸດສະທໍາຕາມ 7 ຫຼັກການພື້ນຖານຂອງຂະບວນການກາແດງແລະຊີກວົງເດືອນ, ພາຍຫຼັງສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບການສະຖາປະນາຂຶ້ນ ເຊິ່ງມາຮອດປັດຈຸບັນອົງການກາແດງລາວ ໄດ້ສືບຕໍ່ປັບປຸງ ແລະຂະຫຍາຍສາຂາມີທັງໝົດ 17 ສາຂາກາແດງ ແລະ1 ນະຄອນຫຼວງໃນທົ່ວປະເທດ ທີ່ເຄື່ອນໄຫວຕາມດໍາລັດເລກທີ 36/ລບ, ລົງວັນທີ 21 ເມສາ 1999 ເປັນຕົ້ນມາຈົນເຖິງທຸກວັນນີ້. ທັງນີ້ ເພື່ອປະຕິບັດຕາມແນວທາງນະໂຍບາຍຂອງພັກ ແລະລະບຽບກົດໝາຍຂອງລັດ ທີ່ຕິດພັນກັບຍຸດທະສາດຂອງລັດຖະບານ ກໍຄືນະໂຍບາຍລວມຂອງວຽກງານອົງການກາແດງລາວວາງອອກໃຫ້ບັນລຸເປົ້າໝາຍສະຫັດສະວັດ ດ້ານການພັດທະນາມະນຸດສະທໍາໃຫ້ມີຄວາມຍືນຍົງ,ທັງເປັນການຮັບປະກັນໃຫ້ແກ່ການບໍລິຈາກເລືອດດ້ານສາທາລະນະສຸກໃຫ້ທົ່ວເຖິງ,ສະເໝີພາບ ແລະມີປະສິດທິຜົນສູງ.




ໂອກາດນີ້ ທ່ານ ຄໍາໄພ ສິມມາວັດ ຮອງເລຂາພັກເມືອງທ່າແຕງ ຜູ້ຊີ້ນໍາຂົງເຂດວັດທະນະທໍາ-ສັງຄົມ ກໍໄດ້ສະແດງຍ້ອງຍໍຊົມເຊີຍມາຍັງຄະນະທີມງານສູນກາງ, ຂັ້ນແຂວງ ພ້ອມພາກສ່ວນກ່ຽວຂ້ອງໄດ້ນໍາເອົາຂໍ້ມູນຂ່າວສານຕ່າງໆ ກ່ຽວກັບວຽກງານອົງການກາແດງລາວ ລົງສູ່ເຜີ່ຍແຜ່ໃຫ້ພະນັກງານລັດຖະກອນ ແລະນ້ອງນັກຮຽນໃນຄັ້ງນີ້ ໄດ້ມີຄວາມຮູ້ຄວາມສາມາດ, ຮູ້ຈັກຈໍາແນກສິ່ງທີ່ດີ, ສິ່ງທີ່ຜິດຕໍ່ລະບຽບກົດໝາຍວາງອອກ ກ່ຽວກັບວຽກງານອົງການກາແດງໃນແຕ່ລະໄລຍະຢ່າງເລິກເຊິ່ງ ແລະນໍາໄປຈັດຕັ້ງປະຕິບັດຢ່າງເຂັ້ມງວດ, ພ້ອມຮຽກຮ້ອງມາຍັງຄະນະກໍາມະການຂັ້ນເມືອງ ຈົ່ງເປັນເຈົ້າການປຸກລະດົມຂົນຂວາຍໃນການບໍລິຈາກເລືອດຂອງແຕ່ລະຂະແໜ່ງການ-ກົມກອງ,ມີການຖອດຖອນບົດຮຽນ, ການວາງແຜນການໃຫ້ບັນລຸຕາມລະດັບຄາດໝາຍ ເພື່ອປະກອບສ່ວນຊ່ວຍເຫຼື່ອສັງຄົມໃຫ້ນັບມື້ນັບດີຂຶ້ນ.




ພ້ອມດຽວກັນນີ້ ກໍໄດ້ມອບໃບອຸປະກາລະກຸນໃຫ້ຜູ້ມີຜົນງານ, ໂຮງຮຽນ ແລະມອບບັດການບໍລິຈາກເລືອດໃຫ້ນ້ອງນັກຮຽນ ໂດຍແມ່ນທ່ານ ຄໍາໄພ ສິມມາວັດ ຮອງເລຂາພັກເມືອງທ່າແຕງ ແລະທ່ານ ໄພວັນ ສຸກກະເສີມ ຮອງຫົວໜ້າອົງການກາແດງແຂວງ ເຊກອງ ໄດ້ພັດປ່ຽນກັນຂຶ້ນມອບ.


ຂ່າວ : ພອນ ບຸນອຸທິດ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.