Header Ads

ເຊກອງສະແດງສີລະປະວັນນະຄະດີຕ້ອນຮັບ 2 ວັນປະຫວັດສາດການຮ່ວມມືລາວ-ຫຽວດນາມ



ການສະແດງສິລະປະວັນນະຄະດີ ສະເຫຼີມສະຫຼອງ ສອງວັນປະຫວັດສາດ ລາວ-ຫວຽດນາມ, ໄດ້ຈັດຂຶ້ນໃນຄືນວັນທີ 11 ຕຸລາ ນີ້ ຢູ່ທີ່ເດີ່ນກິລາໃນຮົ່ມແຂວງເຊກອງ ໂດຍການເຂົ້າຮ່ວມຂອງການນຳພັກ-ລັດແຂວງເຊກອງ ແລະ ການນຳພັກ-ລັດ ບັນດາແຂວງພາກກາງ-ພາກໃຕ້ ຂອງ ສສ ຫວຽດນາມ ພ້ອມດ້ວຍນັກຮ້ອງ ແລະ ນັກສະແດງສີລະປະວັນນະຄະດີ ຂອງແຂວງເຊກອງ ສປປ ລາວ ແລະ ຈາກ 3 ແຂວງ ຂອງ ສສ ຫວຽດນາມ ຕະຫຼອດຮອດມວນຊົນຊາວແຂວງເຊກອງເຂົ້າຮ່ວມຮັບຊົມຢ່າງຫຼວງຫຼາຍ.





ການສະແດງສີລະປະ-ວັນນະຄະດີ ສະເຫຼີມສະຫຼອງ 2 ວັນປະຫວັດສາດ ລາວ-ຫວຽດນາມຄື: ວັນເຊັນສົນທິສັນຍາມິດຕະພາບ ແລະ ການຮ່ວມມືລາວຫວຽດນາມ ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 55 ປີ ທີ່ແຂວງເຊກອງ ກໍ່ເພື່ອເຮັດໃຫ້ຂະບວນການຈັດຕັ້ງສະເຫຼີມສະຫຼອງວັນດັ່ງກ່າວ ມີບັນຍາກາດຟົດຟື້ນ, ທັງເພື່ອເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່ ແລະ ຄວາມສາມັກຄີແບບພິເສດລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ໃຫ້ນັບມື້ໜັກແໜ້ນຂື້ນເລື້ອຍໆ. ເຊິ່ງລາຍການສີລະປະ-ວັນນະຄະດີທີ່ນຳມາສະແດງໃນຄັ້ງນີ້ ປະກອບມີທັງໝົດ 10 ລາຍການ ມີບົດຟ້ອນ, ບົດເພງ ແລະ ບົດລໍາ ຂອງຄະນະສີລະປະຈາກ ສູນວັດທະນະທໍາເດັກ ຂອງແຂວງເຊກອງ, ຈາກກອງບັນຊາການທະຫານແຂວງ ເຊິ່ງໄດ້ສ້າງຄວາມເບີກບານມ່ວນຊື່ນໃຫ້ກັບມວນຊົນຊາວແຂວງເຊກອງຢ່າງຄຶກຄື້ນພໍສົມຄວນ , ນອກຈາກນີ້ ຍັງມີລາຍການຂອງຄະນະສີລະປະ ຈາກ 3 ແຂວງຂອງ ສສ ຫວຽດນາມ ຄຶ: ແຂວງກອນຕູມ, ແຂວງດັກລັກ ແລະ ແຂວງກວາງນາມ ເຊິ່ງປະກອບມີທັງໝົດ 7 ລາຍການສະແດງ ໃນນີ້ມີບົດຟ້ອນ 2 ລາຍການ, ບົດເພງ-ບົດລຳ 5 ລາຍການ.



ໃນຕອນທ້າຍພິທີການສະແດງ ການນໍາພັກ-ລັດ ຍັງໄດ້ມີການມອບຊໍ່ດອກໄມ້ໃຫ້ແກ່ນັກສະແດງ ເພື່ອເປັນການຊົມເຊີຍ ແລະ ເປັນຂັວນກໍາລັງໃຈໃຫ້ແກ່ນັກສະແດງ ທັງສອງຝ່າຍ.




ທີ່ມາ: ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.