Header Ads

ລະມາມ ສະເຫຼີມສະຫຼອງວັນຄູແຫ່ງຊາດຄົບຮອບ 23 ປີ ທີ່ສະໂມສອນຫ້ອງວ່າການປົກຄອງເມືອງ ເມືອງລະມາມ ແຂວງເຊກອງ





ແຂວງເຊກອງ  : ໃນຕອນເຊົ້າຂອງວັນທີ 4 ຕຸລາ 2017 ນີ້ ເມືອງລະມາມ ແຂວງເຊກອງ ໄດ້ຈັດພິທີສະເຫຼີມສະຫຼອງວັນຄູແຫ່ງຊາດ ຄົບຮອບ 23 ປີ ( ວັນທີ 7/ 10 /1994 – 7 / 10 /2017 ) ຂຶ້ນທີ່ສະໂມສອນຫ້ອງວ່າການປົກຄອງເມືອງ ພາຍໃຕ້ການເຂົ້າຮ່ວມຂອງທ່ານ ປອ ແພງສີ ສີລາວີ ເຈົ້າເມືອງລະມາມ, ມີທ່ານ ຂັນແກ້ວ ໂຮມອິນຕາ ຮອງຫົວໜ້າພະແນກສຶກສາທິການ ແລະກິລາແຂວງ, ມີບັນດາຄະນະປະຈຳພັກ, ກຳມະການພັກເມືອງ, ຫົວໜ້າ,ຮອງ ຫ້ອງການອ້ອມຂ້າງເມືອງ, ຜູ້ບໍລິຫານການສຶກສາຂັ້ນແຂວງ,ອາດີດພະນັກງານຄູອາຈານ-ອາວຸໂສບໍານານ ພ້ອມດ້ວຍພະນັກງານຄູອາຈານ ແລະ ຫຼານນ້ອຍນັກຮຽນຮູ້ປັນຍາຊົນເຂົ້າຮ່ວມ.



ໃນພິທີຄັ້ງນີ້, ທ່ານ ໂພທອງ ສີລັນດອນ ຫົວໜ້າຫ້ອງການສຶກສາທິການ ແລະ ກິລາເມືອງ ກໍ່ໄດ້ຍົກໃຫ້ເຫັນເຖິງປະຫວັດ ຂອງນາຍຄູຄຳ ເຊິ່ງທ່ານກ່າວວ່າ: ໃນປີ 1907 ທ້າວຄຳ ໄດ້ເຂົ້າຮັບອົບຮົມຄູສຳເລັດ ມາເຖິງວັນທີ 7 ຕຸລາ 1907 ທ້າວຄຳ ເລີ່ມເປັນຄູສອນ,ຍ້ອນພວກລ່າເມືອງຂຶ້ນຝຣັ່ງເຫັນອິດທິພົນຂອງພະສົງໃນວຽກງານການສຶກສາ ພວກເຂົາຈຶ່ງຫັນນະໂຍບາຍເພື່ອຜັນຂະຫຍາຍໂຮງຮຽນໃຫ້ກວ້າງອອກກວ່າເກົ່າ ດ້ວຍຮູບການເປີດໃຫ້ມີໂຮງຮຽນສ້າງຄູພະສົງຂຶ້ນໃນປີ 1907 ທີ່ວັດຈັນ, ເຊິ່ງປະກອບມີພະສົງ 50 ກວ່າອົງໄດ້ເຂົ້າຮຽນ, ທ້າວ ຄຳ ກໍ່ເປັນຄູສອນຢູ່ໂຮງຮຽນປະຖົມແຫ່ງນີ້,ຍ້ອນຈິດໃຈຮັກຊາດ ນາຍຄູຄຳໄດ້ເອົາໃຈໃສ່ສຶກສາໃຫ້ພະສົງທີ່ຈະເປັນຄູໃຫ້ມີຄວາມຮັກຊາດລາວ, ບໍ່ໃຫ້ຊາດລາວເຊື່ອມເສຍໃຫ້ຊາດຝຣັ່ງ, ໃນປີ 1913 ຄູຄຳໄດ້ສອນຢູ່ໂຮງຮຽນ ຕັບໂຟແລັງ ລວມມີຄູລາວ 3 ຄົນ, ມາເຖິງກາງເດືອນ ພະຈິກ ປີ 1920 ຂະບວນການຕໍ່ສູ້ຂອງປະຊາຊົນລາວນຳໂດຍນາຍຄູຄຳໄດ້ລະເບີດຂຶ້ນຢູ່ວຽງຈັນ, ການຕໍ່ສູ້ໄດ້ດຳເນີນໄປຢ່າງຮຸນແຮງ ຄູຄຳໄດ້ຖືກຝຣັ່ງຈັບ ແລະ ນຳຕົວໄປຂັງຄຸກ ພາຍຫຼັງຖືກຄຸມຂັງໄລຍະໜຶ່ງນາຍຄູຄຳ ກໍ່ໄດ້ໂຕນອອກຈາກຄຸກແລ້ວຂ້າມແມ່ນໍ້າຂອງ ໄປອາໃສຢູ່ນຳພີ່ນ້ອງທີ່ບາງກອກ ປະເທດໄທ, ຕໍ່ມາໃນປີ 1949 ນາຍຄູຄຳໄດ້ເຈັບປ່ວຍ ແລະ ໄດ້ເສຍຊີວິດຍ້ອນພະຍາດຂອງເພິ່ນຢູ່ທີ່ວັດສີທາລາມ( ປະເທດໄທ). ດັ່ງນັ້ນ ເພື່ອເຮັດໃຫ້ຄວາມສຳນຶກເຖິງຄຸນງາມຄວາມດີຂອງຄູໃນທົ່ວສັງຄົມໄດ້ກາຍເປັນພຶດຕິກຳຕົວຈິງ, ຈຶ່ງມີຄວາມຈຳເປັນຈະຕ້ອງກຳນົດໃຫ້ມີວັນຄູແຫ່ງຊາດລາວ ໂດຍກຳນົດເອົາວັນເຂົ້າຮັບລາຊະການຄູຂອງນາຍຄູຄຳ ເຊິ່ງແມ່ນຄູຜູ້ທີ່ມີສັນຊາດລາວຄົນທຳອິດຄື: ວັນທີ 7 ຕຸລາ ເປັນວັນຄູແຫ່ງຊາດຂອງທຸກໆປີ.
ເພື່ອເຮັດໃຫ້ການສະເຫຼີມສະຫຼອງວັນຄູແຫ່ງຊາດຄົບຮອບ 23 ປີນີ້ມີຄວາມໝາຍຄວາມສຳຄັນ, ທ່ານ ປອ ແພງສີ ສີລາວີ
ເຈົ້າເມືອງໆລະມາມກໍ່ໄດ້ໃຫ້ກຽດຂຶ້ນໂອ້ລົມ ເຊິ່ງທ່ານກໍ່ໄດ້ເນັ້ນໃຫ້ບັນດາພະນັກງານຄູອາຈານ, ຜູ້ບໍລິຫານການສຶກສາ ພາຍໃນເມືອງຈົ່ງພ້ອມກັນເອົາໃຈສຶກສາອົບຮົມການເມືອງແນວຄິດໃຫ້ບັນດາພະນັກງານຄູອາຈານໃຫ້ໜັກແໜ້ນ ແລະ ເຂັ້ມແຂງ, ເອົາໃຈໃສ່ຈັດຕັ້ງຕິບັດຂໍ້ແຂ່ງຂັນ 3 ລັກສະນະ 5 ຫຼັກມູນຂອງກະຊວງສຶກສາວາງອອກໃຫ້ປະກົດຜົນເປັນຈິງ.


ຂ່າວ-ພາບ: ດາວສະຫວັນ ໄຊລາສອນ / ຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.