Header Ads

ລັດກຳນົດທິດທາງ ແຜນການຈຸດສຸມດ້ານການທ່ອງທ່ຽວ ສຳລັບປີ 2018 ເພື່ອສ້າງລາຍຮັບ ປະມານ 900 ລ້ານໂດລາສະຫະລັດ



ໃນ​ວັນ​ທີ 24 ຕຸລາ 2017 ນີ້, ທີ່​ກອງ​ປະຊຸມ​ສະ​ໄໝ​ສາມັນ​ ເທື່ອ​ທີ 4 ຂອງ​ສະພາ​ແຫ່ງ​ຊາດ ​ຊຸດ​ທີ VIII ໂດຍ​ການ​ເປັນ​ປະທານ​ຂອງ​ ທ່ານ ບຸນ​ປອນ ບຸດ​ຕະນະ​ວົງ ຮອງ​ປະທານ​ສະພາ​ແຫ່ງ​ຊາດ, ທ່ານ ບໍ່​ແສງ​ຄຳ ວົງ​ດາລາ ລັດຖະມົນຕີ​ ກະຊວງ​ຖະ​ແຫລ​ງຂ່າວ, ວັດທະນະທຳ ​ແລະ ທ່ອງ​ທ່ຽວ ​ໄດ້ລາຍ​ງານກ່ຽວ​ກັບ​ ການຈັດ​ຕັ້ງ​ປະຕິບັດ ​ແຜນວຽກ​ງານ​ທ່ອງ​ທ່ຽວ​​ ​ໃນ​ຊຸມ​ປີຜ່ານ​ມາ ​ແລະ ທິດ​ທາງ​ແຜນການ​ໃນຕໍ່ໜ້າ ເພື່ອ​ເຮັດ​ໃຫ້​ການຈັດ​ງານ​ ປີ​ທ່ອງ​ທ່ຽວ​ລາວ 2018 ​ເຕັມ​ໄປ​ດ້ວຍ​ບັນຍາກາດ​ຟົດ​ຟື້ນ ມີ​ຄວາມ​ໝາຍຄວາມ​ສຳຄັນ, ​ໂດຍ​ສຸມ​ໃສ່​ການ​ປະຕິບັດ​ ນະ​ໂຍບາຍ​ການ​ສົ່ງ​ເສີມ​ ການທ່ອງທ່ຽວທໍາມະ​ຊາດ, ວັດທະນະ​ທໍາ ​ແລະ ປະຫວັດສາດ​ ຂອງ​ລັດຖະບານ​ ໃຫ້​ໄປ​ຄ່ຽງຄູ່​ກັບ​ ການຈັດ​ຕັ້ງ​ປະຕິບັດ​ ແຜນ​ພັກ​ທະ​ນາ​ປະຈຳ​ປີ ​ໃຫ້​ສຳ​ເລັດ​ຕາມ​ຄາດໝາຍ​ ສູ້​ຊົນ​ດຶງ​ດູດ​ນັກ​ທ່ອງ​ທ່ຽວ​ ເຂົ້າປະ​ເທດ ບໍ່​ໃຫ້​ຫລຸດ 5 ລ້ານ​ເທື່ອ​ຄົນ ​ແລະ ສ້າງ​ລາຍ​ຮັບ​ປະມານ 900 ລ້ານ​ໂດ​ລາ​ສະຫະລັດ.




​ທ່ານ ບໍ່​ແສງ​ຄຳ ວົງ​ດາລາ ​ໄດ້ລາຍ​ງານ​ ກ່ຽວ​ກັບ​ການ​ກຳນົດ​ທິດ​ທາງ​ ແຜນ​ການ​ຈຸດ​ສຸມ ​ໃນ​ປີ 2018 ມີ​ ສໍາລັບ​ວຽກ​ງານ​ການ​ໂຄສະນາ ​ແລະ ການຈັດຕັ້ງປະຕິບັດ​ ໂຄງການ​ປີ​ທ່ອງ​ທ່ຽວ 2018, ໂດຍ​ການ​ສ້າງ​ຂະ​ບວນການ​ໂຄສະນາ ​ແລະ ການຈັດ​ຕັ້ງ​ບັນດາ​ກິດຈະກຳ​ ໃນ​ໄລຍະ​ປີ​ທ່ອງ​ທ່ຽວ 2018 ​ໃຫ້​ບັນ ລຸ​ ຕາມ​ເປົ້າໝາຍ​ທີ່​ວາງ​ໄວ້; ພ້ອມ​ນີ້ ​ວຽກ​ງານ​ການ​ພັດທະນາ ​ການທ່ອງທ່ຽວ ​ແມ່ນ​ຮັບຮອງ, ​ເຜີ​ຍ​ແຜ່ ​ແລະ ຈັດ​ພິມ​ມາດຕະຖານ​ ສະຖານ​ທີ່​ທ່ອງ​ທ່ຽວຂອງ ສປປ ລາວ, ​ໃນ​ປີ 2019-2020 ດໍາ​ເນີນການ​ຝຶກ​ອົບຮົມ​ ໃຫ້​ຄະນະ​ຮັບຜິດຊອບ ​ປະ​ເມີນ​ຜົນ​ຂັ້ນ​ແຂວງ-​ເມືອງ ​ແລະ ດຳ​ເນີນ​ການຈັດ​ລະດັບ​ ສະຖານ​ທີ່​ທ່ອງ​ທ່ຽວ​ຂອງ ສປປ ລາວ ​ໃນ​ຂອບ​ເຂດ​ທົ່ວ​ປະ​ເທດ, ຈັດ​ຕັ້ງ​ປະຕິບັດ​ເປົ້າ​ໝາຍ​ ການ​ພັດທະນາ​ການທ່ອງທ່ຽວ ​ແບບ​ຍືນ​ຍົງ ​ແລະ ພັດທະນາ​ການທ່ອງທ່ຽວ​ສີຂຽວ; ວຽກ​ງານ​ການ​ຄຸ້ມຄອງ​ ການທ່ອງທ່ຽວ ​ເພີ່ມ​ທະວີ​ການ​ກວດກາ​ຕິ​ດ ຕາມ​ການ​ເຄື່ອນ​ໄຫວ​ຂອງ​ທຸລະ​ກິດ​ ການບັນ​ເທີ​ງທຸກ​ປະ​ເທດ, ສຶກສາ​ອົ​ບຮົມ​​ແນວ​ຄິດ, ສ້າງ​ສະຕິ​ຕື່ນ​ຕົວ ​ແລະ ຍົກ​ສູງ​ຄວາມ​ຮັບຜິດຊອບ​ຕໍ່ໜ້າ​ທີ່​ ໃຫ້​ແກ່​ຜູ້​ປະກອບ​ການ​ ​ເພື່ອ​​ແນ່​ໃສ່​ເຮັດ​ໃຫ້​ ສິ່ງຫຍໍ້​ທໍ້​ຫລຸດ​ໜ້ອຍ​ຖອຍ​ລົງ, ພ້ອມ​ທັງ​ສືບ​ຕໍ່​ສ້າງ ​ແລະ ​ປັບປຸງ​ນິຕິ​ກຳ, ກົດໝາຍ​ຂອງ​ຂະ​ແໜງ​ທ່ອງ​ທ່ຽວ​ ໃຫ້​ຄົ​ບຖ້ວນ​ເທື່ອ​ລະ​ກ້າວ ​ເປັນ​ຕົ້ນ



ແມ່ນ​ສ້າງ​ຂໍ້​ຕົກ​ລົງ​ວ່າ​ດ້ວຍ ການ​ຄຸ້ມ​ຄອງ​ຄາຣາວານ, ການທ່ອງທ່ຽວ​ແບບ​ພະ​ຈົນ​ໄພ, ການ​ສ້າງ​ຕັ້ງ ​ແລະ ການ​ເຄື່ອນ​ໄຫວ​ ທຸລະ​ກິດ​ນຳ​ທ່ຽວ, ການ​ຄຸ້ມ​ຄອງ​ທຸລະ​ກິດ ​ບໍ​ລິ​ການ​ໂຮງ​ແຮມ ​ແລະ ​ເຮືອນ​ພັກ, ຮ່າງ​ດຳລັດ​ວ່າ​ດ້ວຍ​ການ​ຄຸ້ມ​ຄອງ​ ແຫລ່​ງທ່ອງ​ທ່ຽວ, ປັບປຸງ​ຂໍ້​ຕົກ​ລົງ​ວ່າ​ດ້ວຍ​ ມາດຖານ​ຂັ້ນ​ພື້ນຖານ ​ຂອງ​ເຮືອນ​ພັກ ສະບັບ​ເລກທີ 1107/ອຊທ ລົງ​ວັນ​ທີ 03/08/1999, ປັບປຸງ​ຂໍ້​ຕົກລົງ​ ວ່າ​ດ້ວຍ​ການ​ຄຸ້ມ​ຄອງ​ ທຸລະ​ກິດ​ພັດຕະ​ຄານ, ຮ້ານ​ອາຫານ, ສວນ​ອາຫານ ​ແລະ ຮ້ານ​ກິນ​ດື່ມ; ສຳລັບ​ວຽກ​ງານ​ການ​ພັດທະນາ​ ບຸກຄະ​ລະກກອນ ​ແມ່ນ​ດຳ​ເນີນ​ການ​ຝຶກ​ອົບຮົມ​ໄລຍະ​ສັ້ນ​ ໃຫ້​ບັນດາ​ແຂວງ​ເປົ້າ​ໝາຍ​ ໃນ​ທົ່ວ​ປະ​ເທດ ​ເພື່ອ​ເປັນ​ການ​ສືບ​ຕໍ່​ຍົກ​ລະດັບ​ ຄຸນ​ນະພາ​ບການ​ບໍລິການ ​ໃນ​ຂະ​ແໜງ​ການທ່ອງທ່ຽວ​ ພາຍ​ໃນ​ຫົວ​ຂໍ້​ຕ່າງ ​ໂດຍ​ໄດ້​ສືບ​ຕໍ່​ພັດທະນາ ​ການ​ຝຶກ​ອົບຮົມ, ການ​ປັບປຸງ ​ແລະ ພັດທະນາ​ຫລັກສູດ​ຝຶກ​ອົ​ບຮົມ ​ເຊັ່ນ: ປັບປຸງ​ຫລັກສູ​ດການ​ຝຶກ​ອົບຮົມ ​ທີ່​ມີຢູ່​ແລ້ວ​ໃຫ້​ສອດຄ່ອງ​ກັບ ​ມາດຕະຖານ​ອາ​ຊຽນ, ສືບ​ຕໍ່​ປັບປຸງ ​ແລະ ຂໍ​ອະນຸມັດ​ຫລັກ ສູດຝຶກ​ອົບຮົມ​ພະນັກງານ​ນຳ​ທ່ຽວ​ ລະດັບ​ຊາດ, ປັບປຸງ ​ແລະ ຂໍ​ອະນຸມັດ​ຫລັດ​ສູດ​ຝຶກ​ອົບຮົມ ​ພະນັກງານຳ​ທ່ຽວ​ຂັ້ນ​ແຂວງ, ປັບປຸງ​ຫລັກ​ສູດ​ຝຶກ​ອົບຮົມ​ຄູ​ຝຶກ​ ໃນ​ຂະ​​ແໜງ​ທ່ອງ​ທ່ຽວ, ຄົ້ນ​ຄ້ວາ ​ແລະ ສ້າງຫລັກສູດ​ຝຶກ​ອົບຮົມ​ໄລຍະ​ສັ້ນ ການ​ບໍລິການ​ຂົນ​ສົ່ງ​ທ່ອງ​ທ່ຽວ, ພ້ອມ​ທັງ​ຄົ້ນ​ຄ້ວາ ​ແລະ ສ້າງ​ຫລັກສູດ​ຝຶກ​ອົບຮົມ​ ໄລຍະ​ສັ້ນ​ຄວາມ​ປອດ​ໄພ​ ໃນ​ຂະ​​ແໜງ​ການທ່ອງທ່ຽວ.



ສຳລັບ​ງົບປະມານ ​ແລະ ການ​ລົງທຶນ ​ໃນ​ຂະ​ແໜງ​ການທ່ອງທ່ຽວ ສືບ​ຕໍ່​ຈັດ​ຕັ້ງປະຕິບັດ​ ດຳລັດ​ວ່າ​ດ້ວຍ ກອງ​ທຶນການທ່ອງທ່ຽວ ເລກທີ 119/ນຍ ​​ເພື່ອ​ຂຸດ​ຄົ້ນ​ແຫ​ລ່ງລາຍ​ຮັບ ​ໃຫ້​ງົບປະມານ​ການ​ເຄື່ອນ​ໄຫວ ວຽກ​ງານ​ທ່ອງ​ທ່ຽວ ​ກ່ຽວ​ກັບ​ການ​ຄຸ້ມ​ຄອງ, ສຳລັບ​ວຽກ​ງານ​ການ​ປະສານ​ງານ​ ຮ່ວມ​ມື​ກັບ​ພາກສ່ວນ​ກ່ຽວຂ້ອງ​ພາຍ​ໃນ ​ແລະ ຕ່າງປະ​ເທດ ​ແມ່ນ​ໃຫ້​ສືບ​ຕໍ່​ປະສານ​ຮ່ວມ​ກັບ​ ຂະ​ແໜງ​ການ​ທີ່​ກ່ຽວຂ້ອງ​ ຕາມ​ພາລະ​ບົດບາດ ​ແລະ ມີ​ຈຸດ​ສຸມ ​ເພື່ອ​ແກ້​ໄຂ​ບັນດາ​ສິ່ງ​ກີດ​ຂວາງ​ຕ່າງ​ໆ ​ໃນ​ການ​ພັດທະນາ ​ແລະ ສົ່ງ​ເສີມ​ການທ່ອງ​ທ່ຽວ​ໃຫ້​ຫລຸດ​ລົງ ​ເຊັ່ນ: ຂະ​ແໜງ​ຄົມມະນາຄົມ ​ແລະ ຂົນ​ສົ່ງ, ຂະ​ແໜງ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ, ຂະ​ແໜງ​ອຸດສາຫະກຳ ​ແລະ ການ​ຄ້າ, ຂະ​ແໜງ​ການ​ຕ່າງປະ​ເທດ​ ເປັນ​ຕົ້ນ. ພ້ອມ​ນີ້, ​ໃຫ້​ປະສານ​ກັບ ​ອຳນາດ​ການ​ປົກຄອງ ​ຂັ້ນ​ສູນ​ກາງ, ທ້ອງ​ຖິ່ນ ​ແລະ ການຈັດ​ຕັ້ງ​ທາງ​ສັງຄົມ ​ເຜີຍ​ແຜ່​ກ່ຽວ​ກັບ​ນິຕິກໍາ ຂອງ​ຂະ​ແໜງ​ການທ່ອງທ່ຽວ, ​ແຜນ​ພັດທະນາ​ ໃນ​ແຕ່ລະ​ໄລຍະ ​ໂດຍ​ສະ​ເພາະ​ ແມ່ນ​ການ​ໂຄສະນາ​ກິດຈະກຳ​ຕ່າງໆ ​ໃນ​ປີ​ທ່ອງ​ທ່ຽວ​ລາວ ​ໃຫ້​ທົ່ວ​ເຖິງ​ທັງ​ພາຍ​ໃນ ​ແລະ ຕ່າງປະ​ເທດ.​




ຂ່າວ: ສົມ​ຫວັງ, ພາບ​: ໄອ່​ຄຳ/ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.