Header Ads

ນະຄອນຫຼວງວຽງຈັນສະເຫຼີມສະຫຼອງວັນຄູແຫ່ງຊາດ ໃນຕອນເຊົ້າວັນທີ 3 ຕຸລາ 2017 ຢ່າງຄືກຄື້ນ !




ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ຈັດງານສະເຫຼີມສະຫຼອງວັນຄູແຫ່ງຊາດ ຄົບຮອບ 23 ປີ ຂຶ້ນ ທີ່ໂຮງແຮມດອນຈັນພາເລດ ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ສິນລາວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ແຂກຮັບເຊີນຈາກ ໂຮງຮຽນແຫ່ງຕ່າງໆ ທົ່ວນະຄອນຫຼວງວຽງຈັນ ພ້ອມດ້ວຍ ນ້ອງໆນັກຮຽນເຂົ້າຮ່ວມຈຳນວນຫຼາຍຮ້ອຍຄົນ. ທ່ານ ຊົມພູ ແກ້ວປັນຍາ, ຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ ໄດ້ຂຶ້ນເລົ່າມູນເຊື້ອ ແລະ ປະຫວັດຄວາມເປັນມາຂອງວັນຄູແຫ່ງຊາດ ແລະ ສະຫຼຸບຜົນງານຂອງພະແນກສຶກສາທິການ ແລະ ກິລາໃນ 1 ປີຜ່ານມາ. 


 

ຕະຫຼອດເວລາທີ່ຜ່ານມາ, ຄູອາຈານນັບບໍ່ຖ້ວນ ສາມາດສ້າງຜົນງານດີເດັ່ນໃນການປົກປັກຮັກສາ ແລະ ສ້າງສາພັດທະນາປະເທດຊາດ ຮ່ວມກັບປະຊາຊົນບັນດາເຜົ່າໃນທົ່ວປະເທດ, ພາຍໃຕ້ການນຳພາຂອງຄະນະພັກ ແລະ ອຳນາດການປົກຄອງນະຄອນຫຼວງວຽງຈັນ. 





ນອກຈາກນີ້, ກະຊວງສຶກສາທິການ ແລະ ກິລາກໍ່ຄື ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ກໍ່ໄດ້ມີຜົນງານດີເດັ່ນຫຼາຍດ້ານເຊັ່ນດຽວກັນຄື: ນັບຕັ້ງແຕ່ປະເທດຊາດໄດ້ຮັບການປົດປ່ອຍ ແລະ ສະຖາປະນາເປັນສາທາລະນະລັດປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ມາຮອດປະຈຸບັນ, ວຽກງານການສຶກສາແມ່ນໄດ້ຮັບການພັດທະນາທາງດ້ານປະລິມານ ແລະ ຄຸນນະພາບເປັນກ້າວໆມາ ຄື: ແຕ່ ປີ 1975-1976 ທົ່ວນະຄອນຫຼວງວຽງຈັນມີໂຮງຮຽນອະນຸບານພຽງແຕ່ 2 ແຫ່ງ, ໂຮງຮຽນປະຖົມ 328 ແຫ່ງ, ໂຮງຮຽນມັດທະຍົມຕົ້ນ 12 ແຫ່ງ ແລະ ໂຮງຮຽນອຸດົມມີພຽງແຕ່ 2 ແຫ່ງ ຄື ໂຮງຮຽນອຸດົມວຽງຈັນ ແລະ ໂຮງຮຽນອຸດົມຟ້າງຸ່ມ. ຈໍານວນນັກຮຽນແຕ່ຊັ້ນອະນຸບານ ຮອດຊັ້ນອຸດົມ ມີ 68,092 ຄົນ, ແລະ ຄູສອນ 2,079 ຄົນ. ມາຮອດສົກຮຽນ 2016-2017 ທົ່ວນະຄອນຫຼວງວຽງຈັນ ມີໂຮງຮຽນພາກລັດ ແລະ ເອກະຊົນທັງໝົດ 1,031 ແຫ່ງ, ມີນັກຮຽນທັງໝົດ 195,765 ຄົນ. ໃນສົກຮຽນ 2017-2018 ຂະແໜງການສຶກສາທິການ ແລະ ກິລາ ນະຄອນຫຼວງວຽງຈັນ ຈະສູ້ຊົນເຮັດໃຫ້ອັດຕາການເຂົ້າຮຽນຂອງເດັກອາຍຸ 5 ປີໃຫ້ໄດ້ 95,50%, ແລະ ອັດຕາການເຂົ້າຮຽນ ໃນຊັ້ນປະຖົມໃຫ້ໄດ້ 100%. 


ພ້ອມກັນນີ້, ກໍ່ຈະເອົາໃຈໃສ່ສ້າງໂຮງຮຽນຕົວແບບທີ່ມີຄຸນນະພາບ ນັບແຕ່ຊັ້ນອະນຸບານຈົນຮອດຊັ້ນ ມັດທະຍົມຕອນປາຍ, ຈະສືບຕໍ່ສ້າງໂຮງຮຽນຂຽວສະອາດ ແລະ ມີຄຸນນະພາບ, ປັບປຸງໂຮງຮຽນໃຫ້ມີຄອມພິວເຕີ ແລະ ຍົກສູງລະດັບວິຊາສະເພາະໃຫ້ແກ່ຄູສອນ ແລະ ຜູ້ບໍລິຫານການສຶກສາໃຫ້ທົ່ວເຖິງ.



ພາບ ແລະ ຂ່າວ: ວິທະຍຸກະຈາຍສຽງແຫ່ງຊາດ 

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.