Header Ads

6 ເດືອນຕົ້ນປີ ຊຽງຂວາງ ເກັບລາຍຮັບເຂົ້າງົບປະມານໄດ້ 3 ຕື້ກວ່າກີບ


ພາຍ​ໃນ 6 ​​ເດືອນ​ຕົ້ນ​ປີ 2017 ຜ່ານ​ມານີ້ ​ແຂວງ​ຊຽງ​ຂວາງ ​ ສາມາດເກັບລາຍຮັບທ້ອງຖິ່ນ ເຂົ້າງົບປະມານໄດ້ 3 ຕື້ກວ່າກີບ ຂະນະ​ທີ່ສະເລ່ຍ ລາຍຮັບຕໍ່ຫົວຄົນ ເພີ່ມຈາກ 1.328 ໂດລາສະຫະລັດ ໃນປີ 2015 ມາເປັນ 1.600 ໂດລາສະຫະລັດ/ຄົນ/ປີ.


ທ່ານ ສົມກົດ ມັງໜໍ່ເມກ  ເຈົ້າແຂວງແຂວງຊຽງຂວາງ ​​ໄດ້​ເປີດ​ເຜີຍ​ຫວ່າງ​ບໍ່​ດົນ​ມາ​ນີ້​ວ່າ: ປະຈຸບັນນີ້ ທົ່ວ​ແຂວງ​ມີຄອບຄົວ ທຸກຍາກຫລຸດ​ລົງຍັງ​ເຫລືອ 819 ຄອບຄົວ​, ໃນໄລຍະ 2 ປີຜ່ານມາ ເສດຖະກິດ ຂະຫຍາຍຕົວ ຕໍ່ເນື່ອງບໍ່ຫລຸດ 8 ​% ຕໍ່ປີ ​ແລະ ສາມາດ​ເກັບ​ລາຍ​ຮັບ​ໄດ້ 77 ຕື້ກີບເທົ່າກັບ 63 % ຂອງແຜນການປີ, ຂະນະ​ທີ່​ການປະຕິບັດ ລາຍຈ່າຍສູງ​ກວ່າ​ລາຍ​ຮັບ ຊຶ່ງເທົ່າກັບ 66 ​%, ສິນຄ້າຂາອອກ ບັນລຸໄດ້ເຖິງ 137 ຕື້ກວ່າກີບ, ເທົ່າກັບ 63,58 ​%, ສ່ວນໃຫຍ່ແມ່ນສິນຄ້າກະສິກໍາ ແລະ ສັດລ້ຽງ; ໂຄງປະກອບເສດຖະກິດ ​ໃນຂົງເຂດກະສິກຳ ໄດ້ຫລຸດລົງຈາກ 40,71 ​% ໃນປີ 2015, ມາເປັນ 36,77, ອຸດສາຫະກຳເພີ່ມຂຶ້ນຈາກ 35,06 ​% ໃນປີ 2015 ມາເປັນ 36,98 % ແລະ ການບໍລິການເພີ່ມຈາກ 24,22 ​% ໃນປີ 2015 ມາເປັນ 26,25 ​%.



ນອກ​ນີ້, ແຂວງຊຽງ​ຂວາງ ​ຍັງໄດ້ສຸມໃສ່ການຜະລິດ 5 ປະເພດສິນຄ້າຕົ້ນຕໍເຊັ່ນ: ການລ້ຽງສັດໃຫຍ່, ການປູກສາລີ, ການປູກເຂົ້າໄກ່ນ້ອຍ, ການປູກມອນ-ລ້ຽງມອນ ແລະ ການປູກໄມ້ແປກພັນປາດ ເອົາຢາງ ແລະ ບັນດາປະເພດສິນຄ້າສຳຮອງ ທີ່ເປັນມູນເຊື້ອຂອງປະຊາຊົນ ເຮັດໃຫ້ມີຫລາຍຕົວແບບ ເກີດຂຶ້ນຢ່າງເປັນຂະບວນ ພ້ອມນັ້ນໄດ້ສຸມໃສ່ ພັດທະນາພື້ນຖານໂຄງລ່າງ ສ້າງເສັ້ນທາງເຂົ້າ ເຖິງບ້ານເພີ່ມຂຶ້ນ ປະຈຸ​ບັນຍັງ 4 ບ້ານບໍ່ທັນມີທາງລົດເຂົ້າເຖິງ, ການຊົມໃຊ້ໄຟຟ້າ ໄດ້ເພີ່ມຂຶ້ນຈາກ 80,85 %  ປີ 2015 ມາເປັນ 90,72 ​% ໃນປີ 2017. 



ທ່ານ  ​ເຈົ້າ​ແຂວງ​ຊຽງ​ຂວາງ  ​ຍັງກ່າວ​ຕື່ມ​ວ່າ: ແຂວງກໍໄດ້ພະຍາຍາມຍາດແຍ່ງ ການລົງທຶນ ຂອງບັນດາບໍລິສັດເອກະຊົນ ​ເປັນ​ຕົ້ນ​ແມ່ນ ບໍລິສັດຍີ່ປຸ່ນ ໃນການລ້ຽງງົວ ພັນຊີ້ນ-ງົວນົມ ​ໃນ​ນັ້ນ​ໄດ້ມອບດິນ ປອກໂລ້ນປູກຫຍ້າ ຈຳນວນ 500 ຮຕ ປະຈຸບັນມີງົວແລ້ວ 1.000 ກວ່າໂຕ ນັບທັງງົວເກີດໃໝ່ ແລະ ບໍລິສັດໄດ້ລົງທຶນໄປແລ້ວ 17 ລ້ານ ກວ່າໂດລາ ແລະ ທາງບໍລິສັດກໍາລັງຂຸ້ນຂ້ຽວ ສ້າງໂຮງງານນ້ຳນົມ ເພື່ອກຽມພະລິດ ອອກສູ່ສັງຄົມ ແລະ ສົ່ງອອກຕ່າງປະເທດ.

ຂ່າວ: ມະນີ​ທອນ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.