Header Ads

ທ່ານ ຄໍາພູນ ແສງປະທີບ ປະກອບສ່ວນເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ ໄດ້ຮັບລາງວັນອາຊຽນ ຄັ້ງທີ 3 ປີ 2017 ທີ່ນະຄອນຫຼວງກົວລາລໍາເປີ ປະເທດມາເລເຊຍ



ທ່ານ ຄໍາພູນ ແສງປະທີບ ຜູ້ປະກອບການລ້ຽງປາກະຊັງ ເພີ້ມພູມຟາມ ບ້ານໂນນສະຫວ່າງ ເຊິ່ງເປັນບ້ານ 3 ສ້າງຂອງເມືອງປາກເຊ ແຂວງຈໍາປາສັກ ມີຜົນງານດີເດັ່ນ ປະກອບສ່ວນເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ ໄດ້ຮັບລາງວັນອາຊຽນ ຄັ້ງທີ 3 ປີ 2017, ເຊິ່ງພິທີມອບລາງວັນດັ່ງກ່າວ ຈັດຂຶ້ນໃນໂອກາດເປີດກອງປະຊຸມລັດຖະມົນຕີພັດທະນາຊົນນະບົດ ແລະ ລຶບລ້າງຄວາມທຸກຍາກອາຊຽນ ເມື່ອວັນທີ 6 ຕຸລາ 2017 ທີ່ນະຄອນຫຼວງກົວລາລໍາເປີ ປະເທດມາເລເຊຍ.

ທ່ານ ຄໍາພູນ ແສງປະທີບ ໃຫ້ສໍາພາດໃນວັນທີ 12 ຕຸລາ 2017 ນີ້ວ່າ: ເບື້ອງຕົ້ນ ຫ້ອງການກະຊວງກະສິກໍາ ແລະ ປ່າໄມ້ ໄດ້ມີແຈ້ງການເຖິງບັນດາສະມາຄົມ, ອົງການຈັດຕັ້ງທາງສັງຄົມ ແລະ ຜູ້ປະກອບການ ເລື່ອງການຄັດເລືອກສະມາຄົມ, ອົງການຈັດຕັ້ງສັງຄົມ ແລະ ຜູ້ປະກອບການ ທີ່ມີຜົນງານດີເດັ່ນປະກອບສ່ວນເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ. ຕໍ່ມາ ຫ້ອງການແຜນການ ແລະ ພົວພັນຕ່າງປະເທດ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ຂັ້ນສູນກາງ ກະຊວງກະສິກໍາ ແລະ ປ່າໄມ້ ເຫັນວ່າ ໃນທີ່ຜ່ານມາຟາມລ້ຽງປາຂອງຂ້າພະເຈົ້າ ມີຜົນງານດີເດັ່ນປະກອບສ່ວນເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ ຢູ່ແຂວງຈໍາປາສັກ ກໍ່ຄືຢູ່ ສປປ ລາວ ເຊິ່ງມີເງື່ອນໄຂຄົບຖ້ວນໃນການໄປຮັບລາງວັນ ເພິ່ນຈິ່ງໄດ້ຄັດເລືອກເອົາຟາມຂອງຂ້າພະເຈົ້າ ໂດຍມອບໃຫ້ພະແນກກະສິກໍາ ແລະ ປ່າໄມ້ແຂວງ ປະສານສົມທົບ ພ້ອມທັງແນະນໍາກ່ຽວກັບການຂຽນເອກະສານເກັບກໍາຂໍ້ມູນລາຍລະອຽດ ແລະ ຜົນງານຂອງຟາມຂ້າພະເຈົ້າໃນໄລຍະທີ່ຜ່ານມາໂດຍຫຍໍ້ ເພື່ອສົ່ງໃຫ້ຂັ້ນເທິງຄົ້ນຄ້ວາພິຈາລະນາ.

ທ່ານ ຄໍາພູນ ແສງປະທີບ ໃຫ້ຮູ້ຕື່ມອີກວ່າ: ຜົນງານພົ້ນເດັ່ນທີ່ຟາມຂອງຂ້າພະເຈົ້າເຄື່ອນໄຫວຕົວຈິງ ເຊິ່ງຖືເປັນການປະກອບສ່ວນເຂົ້າໃນການພັດທະນາຊົນນະບົດ ແລະ ລຶບລ້າງຄວາມທຸກຍາກ ມີ 2 ຢ່າງ ຄື: ແຕ່ກ່ອນການລ້ຽງປາກະຊັງຢູ່ນໍ້າຂອງໃນແຂວງຈໍາປາສັກ ບໍ່ທັນກ້ວາງຂວາງ, ບໍ່ມີຫຼາຍເຈົ້າ, ໃນປີ 2007 ຄອບຄົວຂອງຂ້າພະເຈົ້າໄດ້ເລີ່ມລ້ຽງປາກະຊັງຢູ່ນໍ້າຂອງ. ຜ່ານການຈັດຕັ້ງປະຕິບັດຕົວຈິງ ເຫັນວ່າການລ້ຽງປາກະຊັງຢູ່ນໍ້າຂອງມີລາຍຮັບດີ ແລະ ສາມາດສ້າງໃຫ້ເສດຖະກິດຄອບຄົວມີຢູ່ມີກິນ, ຕໍ່ມາປະຊາຊົນຫຼາຍໆຄອບຄົວທົ່ວແຂວງ ໄດ້ມາຖອດຖອນບົດຮຽນ ແລ້ວນໍາໄປຈັດຕັ້ງປະຕິບັດ ຈິ່ງເຮັດໃຫ້ການລ້ຽງປາກະຊັງພາຍໃນແຂວງມີການເຕີບໃຫຍ່ຂະຫຍາຍຕົວຢ່າງກ້ວາງຂວາງ ມີເຖິງ 1 ພັນກ່ວາກະຊັງໃນປັດຈຸບັນ, ທັງນີ້ກໍ່ຍ້ອນການລ້ຽງປາກະຊັງ ໄດ້ຊ່ວຍເຮັດໃຫ້ຊີວິດການເປັນຢູ່ຂອງຜູ້ປະກອບການດີຂຶ້ນ. ຕໍ່ມາ ເມື່ອມີການລ້ຽງປາກະຊັງ ກໍ່ຕ້ອງມີການຂະຫຍາຍໜອງ ເພື່ອໃຊ້ເປັນບ່ອນອະນຸບານລູກປາ ເຊິ່ງປີ 2010 ຂ້າພະເຈົ້າກໍ່ໄດ້ໄປເຊົ່າໜອງປາຂອງບໍລິສັດຊົນລະປະທານແຂວງ 9 ໜອງ ຢູ່ໜອງກັນ ຫຼັກ 40 ເມືອງປະທຸມພອນ ພ້ອມນັ້ນ ກໍ່ໄດ້ຊື້ດິນນໍາປະຊາຊົນເຂດນັ້ນ 3 ເຮັກຕາ ແລ້ວສ້າງເປັນໜອງປາຂອງຕົນເອງ, ເບື້ອງຕົ້ນ ມີພຽງຂ້າພະເຈົ້າໄປສ້າງໜອງປາຢູ່ບ່ອນນັ້ນ ແຕ່ 2 ປີຕໍ່ມາ ໄດ້ມີຫຼາຍໆຄອບຄົວໄປສ້າງໜອງປາຢູ່ໃນຂອບເຂດດຽວກັນ ແລະ ຂະຫຍາຍຕົວຢ່າງກ້ວາງຂວາງ ມີເຖິງ 17 ເຈົ້າໃນປັດຈຸບັນ.

ທ່ານ ຄໍາພູນ ແສງປະທີບ ກ່າວຕອນທ້າຍອີກວ່າ: ສິ່ງດັ່ງກ່າວ ແມ່ນຍ້ອນຄວາມສາມັກຄີຮັກແພງ, ຄວາມເປັນຈິດໜຶ່ງໃຈດຽວກັນຂອງຄົນໃນຄອບຄົວ ທີ່ພ້ອມພາກັນບຸກບືນສູ້ຊົນ, ອົດທົນຜ່ານຜ່າອຸປະສັກຂໍ້ຫຍຸ້ງຍາກນາໆປະການ ໃນການພັດທະນາຊີວິດການເປັນຢູ່ ພາຍໃຕ້ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ກໍ່ຄືການຊີ້ນໍາ-ນໍາພາຂອງອໍານາດການປົກຄອງແຂວງ ແລະ ເມືອງປາກເຊ ຕະຫຼອດຮອດອົງການຈັດຕັ້ງຂອງທ້ອງຖິ່ນຮາກຖານ ຈິ່ງເຮັດໃຫ້ຊີວິດການເປັນຢູ່ ກໍ່ຄືການລ້ຽງປາຂອງຟາມຂ້າພະເຈົ້າມີຜົນສໍາເລັດ ເຊິ່ງຂ້າພະເຈົ້າຈະເທີດທູນ ແລະ ຈົດຈໍາບຸນຄຸນຂອງພັກ-ລັດ ໄວ້ໃນດວງໃຈຕະຫຼອດໄປ ແລະ ໃນຕໍ່ໜ້າ ຂ້າພະເຈົ້າ ພ້ອມດ້ວຍຄອບຄົວກໍ່ຍັງຈະສືບຕໍ່ດໍາເນີນກິດຈະການລ້ຽງປາໃນກະຊັງ ເພື່ອປະກອບສ່ວນເຂົ້າໃນວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກຂອງປະຊາຊົນຕໍ່ໄປ.
ອີງຕາມຂໍ້ມູນຈາກຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ກະຊວງກະສິກຳ ແລະ ປ່າໄມ້ ໃຫ້ຮູ້ວ່າ : ຜ່ານມາຢູ່ ສປປ ລາວ ພວກເຮົາມີຜູ້ໄດ້ຮັບລາງວັນນີ້ 2 ພາກສ່ວນຄື : ທ່ານສະຫຼຽວ ສະແຫວງສຶກສາ ໃນນາມຕາງໜ້າອົງການຈັດຕັ້ງທາງສັງຄົມປີ 2013. ປີ 2015 ແມ່ນກອງທຶນຫຼຸດຜ່ອນຄວາມທຸກຍາກ ຫຼື ທລຍ. ສຳລັບປີ 2017 ແມ່ນປີທຳອິດທ່ີ ສປປ ລາວ ພວກເຮົາໄດ້ຄັດເລືອກເອົາຜູ້ປະກອບການເຂົ້າຮັບລາງວັນດັ່ງກ່າວ./.

ຂ່າວ-ພາບ: ທູນທອງໃຈ/ຈໍາປາໃໝ່
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.