Header Ads

ເຈົ້າໜ້າທີ່ພະແນກຄົ້ນຄວ້າສັງລວມຫ້ອງຕຳຫຼວດແຂວງສາລະວັນມອບລົດຈັກຄືນໃຫ້ເຈົ້າຂອງເດີມ



ເຈົ້າໜ້າທີ່ພະແນກຄົ້ນຄວ້າສັງລວມ ຫ້ອງຕຳຫຼວດແຂວງສາລະວັນ ໄດ້ມອບລົດຈັກເວັບສີຟ້າດໍາບໍ່ມີເລກທະບຽນຄືນໃຫ້ເຈົ້າຂອງເດີມ ໃນລະຫວ່າງອາທີດຜ່ານມາ, ມອບໂດຍ ສະຫາຍ ພັຕ ບຸນສີ ສຸວັນນະລາດ ຫົວໜ້າຫ້ອງການຄົ້ນຄ້ວາສັງລວມຫ້ອງຕຳຫຼວດ ແຂວງສາລະວັນ ແລະ ໄດ້ມອບລົດຈັກຄັນດັ່ງກ່າວໃຫ້ ນາງພວນ ອາຍຸ 17 ປີ, ອາຊີບນັກຮຽນ, ປັດຈຸບັນຢູ່ບ້ານຄຳທອງ ເມືອງສາລະວັນ, ແຂວງສາລະວັນ, ມີອໍານາດການປົກຄອງ ແລະວິຊາການທີ່ກ່ຽວຂ້ອງເຂົ້າຮ່ວມເປັນສັກຂີພິຍານ. 

ລົດທີ່ນຳມາມອບໃນຄັ້ງນີ້ ແມ່ນຖືກຄົນຮ້າຍລັກໄປໃນຄືນຂ້ອນແຈ້ງຂອງວັນທີ 22 ກັນຍາ 2017 ເວລາປະມານ 3 ໂມງ. ໃນຄືນເກີດເຫດ ນາງພວນ ເຈົ້າຂອງລົດ ໄດ້ມ້ຽນມັດພາຫະນະຂອງຕົນເປັນທີ່ຮຽບຮ້ອຍກ່ອນເຂົ້ານອນ. ຄົນຮ້າຍໂດຍອາໄສລູກກະແຈທີ່ຄົນຮ້າຍຊຳນານມື ງັດກະແຈຄໍ ລົດຈັກ ແຕກຫັກອອກຈາກກັນ ເມື່ອຄົນຮ້າຍລັກລົດຈັກຄັນດັ່ງກ່າວໄດ້ ຜູ້ກ່ຽວກໍ່ຂັບຂີ່ພາຫະນະທີ່ລັກມາໄປຕາມເສັ້ນທາງເລກທີ 20 (ເສັ້ນທາງສາລະວັນ-ປາກເຊ ) ແຕ່ຖືກເຈົ້າໜ້າທີ່ປະຈຳປ້ອມ 3 ແຍກບ້ານນາຂ້ອຍສາວ ໂບກກະບອງໄຟທີ່ເປັນການສັນຍານໃຫ້ຜູ້ກ່ຽວຜ່ອນຄວາມໄວລົງ ເພື່ອເຈົ້າໜ້າທີ່ປະຈໍາປ້ອມຈະກວດກາພາຫະນະ ແລະເອກະສານ, ແຕ່ຄົນຮ້າຍລາຍນີ້ ພັດເລັ່ງຄວາມໄວສູງຂື້ນ ເຮັດໃຫ້ເຈົ້າໜ້າທີ່ປະຈຳປ້ອມຜິດສັງເກດ ຈຶ່ງຟ້າວໄລ່ຕິດຕາມລົດຄັນດັ່ງກ່າວ ໂດຍມີໄລຍະຫ່າງຈາກກັນປະມານ 200-300 ແມັດ. 


ຈົນໃນທີ່ສຸດຄົນຮ້າຍລາຍນີ້ໄດ້ຈອດລົດຈັກຄັນທີ່ລັກມາ ປະໄວ້ຂ້າງທາງ ຢູ່ບໍລິເວນບ້ານສູງ ເມືອງ ແລະແຂວງສາລະວັນ ສ່ວນຜູ້ກ່ຽວແມ່ນເອົາຕົວຫຼົບໜີເຂົ້າປ່າຊ້າປະຈຸບັນ ທາງເຈົ້າໜ້າທີ່ຕຳຫຼວດແຂວງສາລະວັນ ຍັງລວບລວມຂໍ້ມູນຫຼັກຖານ ແລະຮ່ອງຮອຍຂອງຄົນຮ້າຍລາຍດັ່ງກ່າວ ເພື່ອນຳໄປພິສູດໃຫ້ຮູ້ແຈ້ງ ແລະ ຈະນຳຈັບຕົວຄົນຮ້າຍທີ່ກໍ່ເຫດມາລົງໂທດຕາມລະບຽບກົດໝາຍ. ສະຫາຍ ພັຕ ບຸນສີ ສຸວັນນະລາດ ຫົວໜ້າຫ້ອງການຄົ້ນຄ້ວາສັງລວມຫ້ອງຕຳຫຼວດກ່າວວ່າ: ພາຍຫຼັງໄດ້ລົດຈັກກັບຄືນຈາກຄົນຮ້າຍ, ເຈົ້າໜ້າທີ່ປະຈໍາປ້ອມນາຂ້ອຍສາວໄດ້ຈັດສົ່ງລົດຄັນດັ່ງກ່າວ ໃຫ້ຫ້ອງການຄົ້ນຄວ້າສັງລວມຫ້ອງຕໍາຫຼວດ, ມື້ຖັດມາ ພະນັກງານປະຈໍາປ້ອມ ໄດ້ແຈ້ງໃຫ້ພະນັກງານລັດຖະກອນ,ປະຊາຊົນ,ນັກຮຽນ-ນັກສຶກສາທີ່ມີການໄປ-ມາຕາມທ້ອງຖະໜົນຫຼວງຮັບຮູ້ ຖ້າຫາກບ້ານຫຼືຄອບຄົວໃດ ຖືກຄົນຮ້າຍລັກລົດຈັກໃນຄໍ່າຄືນຂອງວັນທີ 22 ກັນຍາ 2017 ໃຫ້ມາພົວພັນເອົາພາຫະນະຢູ່ຫ້ອງການຄົ້ນຄວ້າສັງລວມຫ້ອງຕໍາຫຼວດແຂວງ ແລະ ໃຫ້ປະກອບເອກະສານທີ່ກ່ຽວພັນກັບພາຫະນະ ໂດຍມີການຢັ້ງຢືນອໍານາດການປົກຄອງທ້ອງຖິ່ນທີ່ຕົນສັງກັດຢູ່ຢ່າງຈະແຈ້ງ, ເມື່ອ ນາງພວນ ຜູ່ເປັນເຈົ້າຂອງລົດໄດ້ຮັບຮູ້ ຈິ່ງຮີບຮ້ອນເຂົ້າແຈ້ງເອກະສານລົດຂອງຕົນ ທີ່ໝາຍເລກຈັກເລກຖັງ 083 999 ປະຈຸບັນທັງເຈົ້າໜ້າທີ່ຫ້ອງການຄົ້ນຄວ້າສັງລວມຫ້ອງຕໍາຫຼວດ ໄດ້ມອບລົດຈັກຄັນດັ່ງກ່າວຄືນໃຫ້ເຈົ້າຂອງຊັບເດີມເປັນທີ່ຮຽບຮ້ອຍແລ້ວ.

ໂດຍ: ກໍ ໄຊຍະວົງສາ/ໜັງສືພິມ ສາລະວັນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.