Header Ads

ກົງສູນໃຫຍ່ ສປ ຈີນ ປະຈໍາພາກເໜືອ ມອບເຄື່ອງສຽງຊຸດໃຫຍ່ໃຫ້ກອງສິລະປະກອນ



ວັນທີ່ 25 ຕຸລາ 2017 ທີ່ພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງຫຼວງພະບາງ ທ່ານ ລີປາວກ່ວາງ ຫົວໜ້າກົງສູນໃຫຍ່ ສປ ຈີນ ປະຈໍາພາກເໜືອ ທີ່ແຂວງຫຼວງພະບາງ ໄດ້ນໍາເອົາເຄື່ອງສຽງຊຸດໃຫຍ່ ມາມອບໃຫ້ກອງສິລະປະກອນພະແນກຖະແຫຼງຂ່າວ,ວັດທະນະທໍາ ແລະ ທ່ອງທ່ຽວແຂວງຫຼວງພະບາງ,ໃນນັ້ນປະກອບມີ 15 ລາຍການຄື: ມິກເຊີMixer yamahaMGP 16X,Driver Rack PA,Power Tafn Mega 9002, Power Tafn I Power 6000,ດອກ 12” A1 line arry,ດອກ 18 ” A1Fw,ໄມລອຍ AKG ເກາະຫູ,ປັກໄຟ Rack NPE,ສາຍລໍາໂພງ,ສາຍສັນຍານຄົບຊຸດ,ຕູໃສ່ເຄື່ອງສຽງ 3 ຟ່າ 10U,LD stinger 101 G2 one, LD stinger 101 G2 two,ດອກໄຟ LED 54-3W ພ້ອມກ່ອງໃສ່ດອກໄດ້ 8 ດອກ ແລະ ມິກຄຸມໄຟ LED ລວມມູນຄ່າທັງໝົດ 18.241 ໂດລາ ເທົ່າກັບ 150.705.000ກີບ, ທ່ານ ລີປາວກ່ວາງ ຫົວໜ້າກົງສູນໃຫຍ່ ສປ ຈີນ ປະຈໍາພາກເໜືອ ໄດ້ກ່າວວ່າ: ໃນປີນີ້ໄດ້ວາງແຜນນໍາເອົາເຄື່ອງຊ່ວຍເຫຼືອໄປມອບໃຫ້ບັນດາເມືອງຕ່າງໆພາຍໃນແຂວງຫຼວງພະບາງ ທັງ 12 ເມືອງ ແລະ ໄດ້ມອບເຄື່ອງຊ່ວຍເຫຼືອໃຫ້ແລ້ວ ແລະ 3 ເມືອງສຸດທ້າຍທີ່ໄດ້ໄປຢ້ຽມຢາມ ກໍຄື: ເມືອງງອຍ,ໂພນທອງ ແລະ ເມືອງວຽງຄໍາ,ໃນນັ້ນໄດ້ຊ່ວຍເຫຼືອທາງດ້ານອຸປະກອນການສິດສອນໃຫ້ແກ່ໂຮງຮຽນທີ່ຂາດເຂີນ,ຜ່ານການໄປຢ້ຽມຢາມ 12 ເມືອງນັ້ນ ມີຄວາມຮູ້ສືກດີໃຈ ແລະ ຖືວ່າໄດ້ເປັນສ່ວນໜຶ່ງທີ່ເປັນພົນລະເມືອງຂອງແຂວງຫຼວງພະບາງ ທີ່ໄດ້ປະກອບສ່ວນພັດທະນາບ້ານເມືອງຂອງຕົນ ແລະ ບໍ່ດົນມານີ້ກໍໄດ້ໄປຢ້ຽມຢາມບັນດາແຂວງພາກເໜືອ ພ້ອມທັງໄດ້ມອບເຄື່ອງອຸປະກອນການສຶກສາ ແລະ ເຄື່ອງກິລາໃຫ້ແກ່ບັນດາແຂວງທີ່ໄປຢ້ຽມຢາມ ແຂວງລະ 5-6 ໂຮງຮຽນ ລວມທັງໝົດ 25 ແຫ່ງ.



ໂດຍເຫັນໄດ້ຄວາມສໍາຄັນຂອງການພັດທະນາຊັບພະຍາກອນມະນຸດ,ໂດຍສະເພາະແມ່ນການສຶກສາ,ເຊິ່ງສາມາດປ່ຽນແປງສະຕາກໍາບຸກຄົນ,ຄອບຄົວ ແລະ ປະເທດຊາດໄດ້,ສະນັ້ນທາງກົງສູນຈິ່ງພະຍາຍາມສ້າງເງື່ອນໄຂ ແລະ ສ້າງແຜນ ເພື່ອໃຫ້ຄວາມຊ່ວຍເຫຼືອດ້ານວຽກງານຕ່າງໆແກ່ປະຊາຊົນລາວ ເປັນຕົ້ນແມ່ນດ້ານການສຶກສາ ແລະ ດ້ານວັດທະນະທໍາ.ສໍາລັບການມອບເຄື່ອງສຽງຊຸດໃຫຍ່ໃຫ້ສິລະປະກອນໃນຄັ້ງນີ້ ແມ່ນສະແດງເຖິງນໍ້າໃຈໄມຕີຈິດມິດຕະພາບ ທັງເປັນການເສີມຂະຫຍາຍສາຍພົວພັນຮ່ວມມືມິດຕະພາບລະຫວ່າງລາວ-ຈີນ,ຈີນ-ລາວໃຫ້ແໜ້ນແຟ້ນຍິ່ງໆຂື້ນໄປ ແລະ ຫວັງວ່າອຸປະກອນເຄື່ອງສຽງຕ່າງໆທີ່ນໍາມາມອບໃຫ້ກອງສິລະປະກອນ ຈະໄດ້ນໍາໃຊ້ເຂົ້າໃນງານສໍາຄັນຕ່າງໆຂອງຊາດ,ໂດຍສະເພາະຂອງແຂວງຫຼວງພະບາງໃຫ້ມີປະສິດທິຜົນ ແລະ ມີຄວາມສະດວກສະບາຍຫຼາຍຂື້ນ.

ຈາກນັ້ນຂື້ນກ່າວຮັບເຄື່ອງດັ່ງກ່າວນີ້ໂດຍແມ່ນທ່ານ ສຸລິທິບ ໜໍ່ຄຸນຜົນ ຫົວໜ້າພະແນກ ຖະແຫຼງຂ່າວວັດທະນະທໍາ ແລະ ທ່ອງທ່ຽວແຂວງຫຼວງພະບາງ,ໂດຍການເປັນສັກຂີພະຍານຂອງທ່ານ ບົວທອງ ແພງສະຫວັນ ຮອງເລຂາພັກແຂວງ,ປະທານກວດກາພັກ-ລັດແຂວງຫຼວງພະບາງ,ມີບັນດາຂະແໜງການອ້ອມຂ້າງພະແນກ ພ້ອມດ້ວຍພະນັກງານ ແລະ ກອງສິລະປະກອນເຂົ້າຮ່ວມຢ່າງພ້ອມພຽງ.


ຂ່າວ: ເພັດສາຄອນ ສິມມະວົງ (ຂ່າວສານຫຼວງພະບາງ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.