Header Ads

ເຊກອງຝຶກອົບຮົມສ້າງຄູຝຶກກ່ຽວກັບການຜະລິດ,ການຄຸ້ມຄອງຄຸນນະພາບ ແລະ ການພັດທະນາການຕະຫລາດກະສິກໍາສະອາດ



ແຂວງເຊກອງ : ຊຸດຝຶກອົບຮົມສ້າງຄູຝຶກກ່ຽວກັບການຜະລິດ,ການຄຸ້ມຄອງຄຸນນະພາບ ແລະ ການພັດທະນາການຕະຫຼາດກະສິກຳສະອາດ ໃຫ້ແກ່ພະນັກງານຂັ້ນແຂວງ,ຂັ້ນເມືອງ ຂອງແຂວງເຊກອງ ໄດ້ຈັດຂຶ້ນໃນວັນທີ 16 ຕຸລາ ນີ້ ຢູ່ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ແຂວງເຊກອງ ໂດຍການເຂົ້າຮ່ວມຂອງທ່ານ ເສີມສີ ສຸລິຕະ ຮອງຫົວໜ້າພະແນກກກະສິກໍາ ແລະ ປ່າໄມ້ແຂວງເຊກອງ, ມີທ່ານ ບຸດສະກອນ ອິນທະລັງສີ ຫົວໜ້າສູນມາດຕະຖານກະສິກຳສະອາດ ກົມປູກຝັງ ກະຊວງກະສິກຳ ແລະ ປ່າໄມ້ ແລະ ມີວິທະຍາກອນມາຈາກກົມປູກຝັງ ແລະ ນັກສຳມະນາກອນຈາກຂະແໜງການທີ່ກ່ຽວຂ້ອງຂັ້ນແຂວງ-ຂັ້ນເມືອງເຂົ້າຮ່ວມ ຊຶ່ງຊຸດຝຶກອົບຮົມດັ່ງກ່າວຈະໄດ້ດຳເນີນເປັນເວລາ 2 ວັນ (16-17/10/2017) ຈຶ່ງຈະສຳເລັດ.



ທ່ານ ເສີມສີ ສຸລິຕະ ຮອງຫົວໜ້າພະແນກກະສິກຳ ແລະ ປ່າໄມ້ແຂວງເຊກອງ ກ່າວວ່າ: ໃນຊຸດຝຶກອົບຮົມດັ່ງກ່າວແມ່ນມີຄວາມໝາຍຄວາມສຳຄັນໃນການພັດທະນາບຸກຄະລະກອນ,ສ້າງຄວາມເຂັ້ມແຂງ ຄວາມຮູ້ຄວາມສາມາດໃຫ້ແກ່ພະນັກງານຂັ້ນແຂວງ,ຂັ້ນເມືອງ ເພື່ອພັດທະນາວຽກງານການຜະລິດກະສິກໍາສະອາດ,ສ້າງໂອກາດທາງດ້ານການຕະຫຼາດໃຫ້ເປັນສິນຄ້າກະສິກໍາປອດໄພ ແລະ ໄດ້ມາດຕະຖານ ສາມາດແຂ່ງຂັນໄດ້ທັງຕະຫຼາດພາຍບໃນ ແລະ ຕ່າງປະເທດ, ເຊິ່ງໃນໄລຍະຜ່ານມາ ຜົນຜະລິດສິນຄ້າກະສິກໍາ ຍັງບໍ່ຮັບປະກັນຄວາມປອດໄພຕໍ່ຜູ້ບໍລິໂພກ,ມີສານເຄມີຕົກຄ້າງ,ມີສັດຕູພືດ ແລະຈຸລິນຊີປົນເປື້ອນຄຸນນະພາບຄວາມປອດໄພ,ການຜະລິດກະສິກຳຍັງບໍ່ມີຫຼັກການ ແລະ ຜົນຜະລິດຍັງບໍ່ເປັນໄປຕາມມາດຕະຖານ ຍ້ອນວ່າຜູ້ຜະລິດຍັງບໍ່ມີຄວາມຮູ້ ແລະຄວາມຊໍານິຊໍານານໃນການຜະລິດ ທີ່ມີການຄວບຄຸມ ແລະ ຕ້ອງປະຕິບັດຕາມມາດຕະຖານລະບົບການຜະລິດ ຈຶ່ງມີຄວາມຈໍາເປັນຕ້ອງພັດທະນາຊາວກະສິກອນໃຫ້ສາມາດຜະລິດໃຫ້ໄດ້ຜົນຜະລິດຕະພັນພືດທີ່ປອດໄພ ໂດຍຊຸກຍູ້ໃຫ້ມີການຜະລິດສິນຄ້າກະສິກໍາດ້ານພືດຕາມລະບົບການຄຸ້ມຄອງຈັດການຄວາມປອດໄພ ແລະຄຸນນະພາບຕາມຫຼັກການປະຕິບັດກະສິກໍາທີ່ດີ ຕາມມາດຕະຖານກະສິກໍາອິນຊີ.




ທ່ານ ບຸດສະກອນ ອິນທະລັງສີ ຫົວໜ້າສູນມາດຕະຖານກະສິກຳສະອາດ ກົມປູກຝັງ ກໍໄດ້ໃຫ້ຮູ້ວ່າ: ຊຸດຝຶກອົບຮົມໃນຄັ້ງນີ້ ແມ່ນເພື່ອສ້າງໃຫ້ວິຊາການຂັ້ນແຂວງ,ຂັ້ນເມືອງ ໃຫ້ມີຄວາມຮູ້ຄວາມເຂົ້າໃຈ ໃນການນໍາເອົາແຜນນະ ໂຍບາຍຂອງລັດຖະບານ ກ່ຽວກັບວຽກງານຄໍ້າປະກັນສະບຽງອາຫານ ແລະຜະລິດເປັນສິນຄ້າຕາມມາດຕະຖານກະສິກໍາສະອາດໃນແຂວງເຊກອງເວົ້າລວມ, ເວົ້າສະເພາະແມ່ນຜະລິດຕາມລະບົບກະສິກໍາທີ່ດີ ( GAP ) ມາຜັນຂະຫຍາຍ,ຖ່າຍທອດບັນດາເຕັກນິກຕ່າງໆ ເພື່ອນໍາໄປຈັດຕັ້ງປະຕິບັດໃຫ້ຄໍາແນະນໍາແກ່ກຸ່ມຊາວກະສິກອນ,ຜູ້ຜະລິດ,ຜູ້ປະກອບການ ແລະ ທຸກໆພາກສ່ວນທີ່ກ່ຽວຂ້ອງ ສາມາດຈັດຕັ້ງປະຕິບັດດ້ວຍການນໍາໃຊ້ເຕັກນິກວິຊາການທີ່ຖືກຕ້ອງໃນທຸກໆຂັ້ນຕອນຂອງຂະບວນການຜະລິດນັບແຕ່ເລີ່ມປູກຈົນເຖິງການຈໍາໜ່າຍ; ທັງນີ້ເພື່ອສ້າງໃຫ້ນັກສໍາມະນາກອນເຂົ້າໃຈເນື້ອໃນກະສິກໍາສະອາດ ແລະ ຮ່ວມກັນສົນທະນາກໍານົດທິດທາງຈັດຕັ້ງປະຕິບັດຮ່ວມກັນ ໂດຍການກໍານົດຈຸດສຸມຜະລິດເຂົ້າກະສິກໍາສະອາດ ແລະພືດຜັກອິນຊີ, ນອກນີ້ທ່ານຍັງໄດ້ຮຽກ ຮ້ອງໃຫ້ນັກສໍາມະນາກອນເອົາໃຈໃສ່ຄົ້ນຄວ້າຮໍ່າຮຽນ ແລະ ແລກປ່ຽນບົດຮຽນນໍາຄູຝຶກ,ຍົກເອົາບັນຫາຕົວຈິງທີ່ເກີດຂຶ້ນໃນການຈັດຕັ້ງປະຕິບັດມາສົນທະນາເພື່ອປັບປຸງບົດຮຽນໃຫ້ແທດເໝາະກັບວຽກງານຕົວຈິງ.



ພາບ-ຂ່າວ: ພຸດທະສອນ (ແຂວງເຊກອງ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.