Header Ads

ພິທີໂຮມຊຸມນຸມສະເຫລີມສະຫລອງ ວັນຄົນພິການ ແຫ່ງຊາດ ແລະ ວັນສາກົນຜູ້ອາຍຸສູງ




ເພື່ອເຮັດໃຫ້ຊີວິດການເປັນຢູ່ຂອງ ຄົນພິການ ແລະ ຜູ້ອາຍຸສູງ ມີສ່ວນຮ່ວມໃນການພັດທະນາຄອບຄົວ, ສັງຄົມ, ເປັນຕົວແທນໃນການປົກປ້ອງ ສິດຜົນປະໂຫຍດ ແລະ ໄດ້ຮັບການປົວແປງ ນັບມື້ນັບດີຂຶ້ນ, ໃນຕອນເຊົ້າ ວັນທີ 29 ກັນຍາ 2017ນີ້, ທີ່ສູນການຄ້າລາວໄອເຕັກ ນະຄອນຫຼວງວຽງຈັນ; ໄດ້ມີພິທີໂຮມຊຸມນຸມສະເຫລີມສະຫລອງ ວັນຄົນພິການ ແຫ່ງຊາດ ແລະ ວັນສາກົນຜູ້ອາຍຸສູງ , ໂດຍເປັນກຽດເຂົ້າຮ່ວມຂອງ ທ່ານ ປອ. ຄໍາແພງ ໄຊສົມແພງ ກຳມະການສູນກາງພັກ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານ ຜູ້ປະຈຳການ ຄະນະກຳມະການແຫ່ງຊາດ ເພື່ອຄົນພິການ, ມີບັນດາຮອງລັດຖະມົນຕີ, ສະມາຄົມຄົນພິການ , ຜູ້ອາຍຸສູງ, ອົງການຈັດຕັ້ງຕ່າງໆ, ແຂກຖືກເຊີນ ທັງໝົດ ທັງພາຍໃນ ແລະ ຕ່າງປະເທດ ແລະມວນຊົນເຂົ້າຮ່ວມຢ່າງຫຼວງຫຼາຍ.





ທ່ານ ປອ. ຄໍາແພງ ໄຊສົມແພງ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ ຄຳຂວັນ ສະເຫລີມສະຫລອງ ວັນສໍາຄັນດັ່ງກ່າວປະຈໍາປີນີ້ ຄື: “ກ້າວສູ່ສັງຄົມ ທີ່ຢຶນຍົງ ແລະ ສະພາບແວດລ້ອມທີ່ດີ ເພື່ອໝົດທຸກຄົນ” ແລະ ຄໍາຂວັນ ໃຫ້ແກ່ຜູ້ອາຍຸສູງ ຄື: “ກ້າວສູ່ອານາຄົດທີ່ສົດໃສ, ຊົມໃຊ້ພອນສະຫວັນ, ການປະກອບສ່ວນ ແລະ ການມີສ່ວນຮ່ວມຂອງຜູ້ອາຍຸສູງໃນສັງຄົມ” ; ເຊິງທ່ານລັດຖະມົນຕີ ໄດ້ກ່າວຄຳປາໃສຕໍ່ພິທີດັ່ງກ່າວວ່າ: ປະຈຸບັນໃນທົ່ວໂລກ ມີຈໍານວນຜູ້ພິການ ຫຼາຍກວ່າ 1 ຕື້ຄົນ ຫຼື ປະມານ 15 % ຂອງປະຊາກອນໂລກ ແລະ ອີງຕາມການປະເມີນຂອງ ອົງການສະຫະປະຊາຊາດ ໃນປີ 2017 ປະຊາກອນຜູ້ອາຍຸສູງ 60 ປີຂຶ້ນໄປ ມີຈໍານວນ 962 ລ້ານຄົນ ເທົ່າກັບ 13% ຂອງປະຊາກອນໂລກ, ຈໍານວນດຜູ້ອາຍຸສູງ ມີແນວໂນມເພີ້ມຂຶ້ນຄາດວ່າ ໃນປີ 2030 ຈະມີເຖິງ 1.4 ລ້ານຄົນ ແລະ 2050 ຈະມີປະມານ 2.1 ລ້ານຄົນ ໂດຍສະເພາະຢູ່ ບັນປະເທດທີ່ພັດທະນາແລ້ວ ແລະ ປະເທດທີ່ພັດທະນາໄວ.



ສຳລັບສະຖິຕິຄົນພິການຂອງລາວ ຕາມການສຳຫລວດປະຊາກອນໃນປີ 2015 ເຫັນວ່າ ມີແນວໂນ້ມເພີ້ມຂີື້ນ ຈາກຕົວເລກສະຖິຕິໃນປີ 2005 ມີປະມານ 57.000 ຄົນເທົ່າກັບ 1,4% ຂອງພົລະເມືອງທັງໝົດ ມາເປັນປະມານ 160.000 ຄົນ ໃນປີ 2015 ເທົ່າກັບ 2,8% ຂອງພົນລະເມືອງ ເພີ້ມຂື້ນໜຶ່ງເທົ່າຕົວ ຫຼື ເພີ້ມຂື້ນ 100%, ໃນນີ້ ແມ່ຍິງກວມຢູ່ປະມານ 80.000 ຄົນ ຖືວ່າ ມີຈຳນວນເພດຊາຍ ແລະ ເພດຍິງຄົນລະເຄິ່ງ.

ສະຖິຕິຜູ້ອາຍຸສູງ ມີປະມານ 297.000 ຄົນ, ຈາກການສຳຫລວດໃນປີ 2005 ມາເປັນປະມານ 422.000 ຄົນໃນປີ 2015 ເທົ່າກັບ 6,5% ຂອງປະຊາກອນທັງໝົດ, ໃນນີ້ມີຜູ້ອາຍຸສູງທີ່ເປັນຜູ້ພິການປະມານ 29.000 ຄົນ ເທົ່າກັບ 18% ຂອງປະຊາກອນຜູ້ອາຍຸສູງ.



ຈາກການປະເມີນໃນທົ່ວໂລກ ຍັງພົບວ່າ ພວກເຂົາເຈົ້າເຫລົ່ານັ້ນ ຍັງປະເຊີນກັບສິ່ງກີດຂວາງຕ່າງໆ ຍ້ອນໂຄງສ້າງຂອງສັງຄົມ, ເສດຖະກິດ, ທັດສະນະຄະຕິ, ທັງຂາດການມີສ່ວນຮ່ວມ ແລະ ຄວາມສະເໝີພາບ ຢູ່ໃນຄອບຄົວ ແລະ ສັງຄົມ, ເຫັນໄດ້ຈາກບັນຫາການເຂົ້າເຖິງການສຶກສາ, ການປິ່ນປົວ ແລະ ຟື້ນຟູສຸຂະພາບ, ການຝຶກວິຊາຊີບ ແລະ ມີວຽກເຮັດງານທຳ; ການສະໜັບສະໜູນດ້ານນິຕິກຳ ແລະ ການເຊື່ອມໂຍງຄົນພິການ ແລະ ຜູ້ອາຍຸສູງເຂົ້າໃນຂະບວນການພັດທະນາ ຍັງບໍ່ທັນທົ່ວເຖິ່ງ.




ພັກ-ລັດຖະບານ ຍາມໃດກໍໄຫ້ຄວາມເປັນຫ່ວງເປັນໄຍ ຕໍ່ຊີວິດການເປັນຢູ່ຂອງປະຊົນບັນດາເຜົ່າ, ເວົ້າສະເພາະ ແມ່ນຜູ້ເສຍອົງຄະ ແລະ ພິການ, ເດັກນ້ອຍ, ແມ່ຍິງ ແລະ ຜູ້ອາຍຸສູງ. ດ້ວຍເຫດນີ້, ເພື່ອເຮັດໃຫ້ຊີວິດການເປັນຢູ່ຂອງ ຄົນພິການ ແລະ ຜູ້ອາຍຸສູງ ໄດ້ຮັບການປົວແປງ ນັບມື້ນັບດີຂຶ້ນ ລັດຖະບານ ຈຶ່ງໄດ້ອອກດຳລັດ, ເລກທີ 232/ນຍ, ລົງວັນທີ 6 ກັນຍາ 2013 ວ່າດ້ວຍ “ການຈັດຕັ້ງ ແລະ ເຄື່ອນໄຫວຂອງຄະນະກຳມະການແຫ່ງຊາດ ເພື່ອຄົນພິການ ແລະ ຜູ້ອາຍຸສູງ” ເພື່ອເປັນຕົວແທນໃຫ້ລັດຖະບານ ໃນການຄົ້ນຄວ້າ, ກຳນົດນະໂຍບາຍ ແລະ ລະບຽບກົດໝາຍ ແນ່ໃສ່ປົກປ້ອງ ແລະ ສົ່ງເສີມ ສິດທິຂອງຄົນພິການ ແລະ ຜູ້ອາສູງ.

ໂດຍເຫັນໄດ້ຄວາມສຳຄັນຕໍ່ວຽກງານດັ່ງກ່າວ ລັດຖະບານພວກເຮົາ ຈິ່ງໄດ້ໃຫ້ສັນຕະຍາບັນ ເຂົ້າເປັນພາຄີຂອງ ສົນທິສັນຍາ ວ່າດ້ວຍ ສິດທິຂອງຄົນພິການ, ໃນວັນທີ 25 ເດືອນ ກັນຍາ ປີ 2009 ແລະ ໄດ້ເຂົ້າຮ່ວມຢ່າງຕັ້ງໜ້າ ຕາມຄວາມສາມາດຂອງຕົນ ຈັດຕັ້ງປະຕິບັດ ແຜນທົດສະຫວັດແຫ່ງການພັດທະນາ ຄົນພິການ ຂອງພາກພື້ນອາຊີ-ປາຊິຟິກ, ແຜນຍຸດທະສາດ ອິນຊອນ ວ່າດ້ວຍການເຮັດໃຫ້ສິດທິ ຄົນພິການ ກາຍເປັນຈິງ,ໄລຍະປີ 2013-2022, ແຜນຍຸດທະສາດສະຫວັດດີການ ແລະ ການພັດທະນາອາຊຽນ ໄລຍະປີ 2016-2020 ແລະ ແຜນປະຕິບັດງານສາກົນ ມານຕຣິດ ວ່າດ້ວຍ ຜູ້ອາຍຸສູງ ແລະ ການພັດທະນາ, ຄວາມຮ່ວງໄຍດ້ານສຸຂະພາບ, ຄວາມຢູ່ດີກິນດີ ແລະ ສິງແວດລ້ອມທີ່ເປັນມິດ ໄລຍະປີ 2002-2022.





ວຽກງານຊ່ວຍເຫລືອ ແລະ ພັດທະນາຜູ້ດ້ອຍໂອກາດ ເປັນຕົ້ນ ແມ່ຍິງ, ເດັກນ້ອຍ, ຄົນພິການ ແລະ ຜູ້ອາຍຸສູງ ຂອງພວກເຮົາ ເປັນວຽກງານໜຶ່ງທີ່ສຳຄັນ ແລະ ເປັນວຽກງານທີ່ມີລັກສະນະຍຸດທະສາດຍາວນານ ຍ້ອນວ່າ ປະເທດພວກເຮົາ ເຄີຍຜ່ານແປວໄຟສົງຄາມມາຫລາຍກວ່າ 30 ປີ, ມີພົນລະເມືອງລາວຈຳນວນຫລວງຫລາຍ ໄດ້ຮັບຜົນກະທົບທັງທາງກົງ ແລະ ທາງອອ້ມ ຈາກສົງຄາມ, ຫຼາຍພັນຄົນກາຍເປັນຄົນເສຍອົງຄະ ແລະ ພິການ ແລະ ຜົນຮ້າຍຂອງລະເບີດບໍ່ທັນແຕກທີ່ຍັງຕົກຄ້າງ ຍັງຈະສືບຕໍ່ສົ່ງຜົນກະທົບຕໍ່ການດຳລົງຊີວິດຂອງປະຊາຊົນ ເຮັດໃຫ້ປະຊາຊົນຖືກບາດເຈັບ, ລົ້ມຕາຍ ແລະ ກາຍເປັນຄົນພິການ.



ເພື່ອແກ້ໄຂບັນຫາດັ່ງກ່າວນັ້ນ, ລັດຖະບານ ໄດ້ມີຄວາມພະຍາຍາມໃນການປະຕິບັດພັນທະຂອງຕົນ ຕໍ່ສົນທິສັນຍາສາກົນ ວ່າດ້ວຍ ສິດທິຄົນພິການ ແລະ ແຜນປະຕິບັດງານສາກົນ (ມາດຕຮິດ) ວ່າດ້ວຍ ຜູ້ອາຍຸສູງ ໂດຍໄດ້ສຸມໃສ່ໃຫ້ການຊ່ວຍເຫລືອ ແລະ ພັດທະນາຄົນພິການ ຕາມຄວາມສາມາດ ທາງດ້ານເສດຖະກິດ-ສັງຄົມ ແລະ ການຮ່ວມມືກັບສາກົນ; ເຊິ່ງສະແດງອອກຄື: ລັດຖະບານ ໄດ້ເອົາໃຈໃສ່ຄົ້ນຄວ້າສ້າງ ແລະປັບປຸງ ນະໂຍບາຍ, ນິຕິກຳ, ຍຸດທະສາດ, ແຜນງານ, ໂຄງການອັນລະອຽດ ໂດຍສະເພາະ ແມ່ນໄດ້ຄົ້ນຄວ້າສ້າງ ດຳລັດ ວ່າດ້ວຍ ຄົນພິການ ແລະ ນະໂຍບາຍແຫ່ງຊາດ ເພື່ອຜູ້ອາຍຸສູງ ເຊິ່ງໄດ້ຮັບຮອງ ແລະ ປະກາດໃຊ້ໃນປີ 2006 ແລະ 2014. ໄປຄ່ຽງຄູ່ກັນນັ້ນ, ກໍ່ໄດ້ປະສານສົມທົບກັບທຸກພາກສ່ວນທີ່ກ່ຽວຂ້ອງ ປັບປຸງກົດໝາຍ ການສຶກສາ ທີ່ສົ່ງເສີມລະບົບການຮຽນຮ່ວມ; ກົດໝາຍ ວ່າດ້ວຍ ການປີ່ນປົວທີ່ຊ່ວຍປ້ອງກັນ, ການຮັກສາສຸຂະພາບ ແລະ ການຟື້ນຟູ; ກົດໝາຍ ວ່າດ້ວຍ ແຮງງານ ທີ່ເໜັ້ນໜັກໃຫ້ຫົວໜ່ວຍແຮງງານຮັບເອົາ ແລະ ປົກປ້ອງແຮງງານທີ່ເປັນຄົນພິການ; ກົດໝາຍປະກັນສັງຄົມ ເປັນຕົ້ນ.






ພິເສດໃນປະຈຸບັນ ພວກເຮົາພວມເລັ່ງໃສ່ສ້າງນະໂຍບາຍ, ແຜນຍຸດທະສາດ ແລະ ແຜນປະຕິບັດງານແຫ່ງຊາດ ວ່າດ້ວຍ ຄົນພິການ ແລະ ກໍກຳລັງກະກຽມສ້າງ ກົດໝາຍວ່າດ້ວຍ ຄົນພິການ, ພ້ອມທັງ ສຸມໃສ່ເຜີຍແຜ່ ດຳລັດ ວ່າດ້ວຍ ຄົນພິການ, ນະໂຍບາຍແຫ່ງຊາດ ເພື່ອຜູ້ອາຍຸສູງ ໃຫ້ພາກສ່ວນຕ່າງໆ ເພື່ອເຮັດໃຫ້ສັງຄົມໄດ້ຮັບຮູ້ຢ່າງກວ້າງຂວາງ, ເລິກເຊິງ ແລະ ມີສ່ວນຮ່ວມເຂົ້າໃນການຊ່ວຍເຫລືອ ແລະ ພັດທະນາຄົນພິການ ແລະ ຜູ້ອາຍຸສູງລາວ.



ນອກຈາກນີ້, ຂະແໜງການກ່ຽວຂ້ອງ ກໍໄດ້ເອົາໃຈໃສ່ເຊື່ອມໂຍງວຽກງານຄົນພິການ ແລະ ຜູ້ອາຍຸສູງ ເຂົ້າໃນແຜນຍຸດທະສາດຂອງຂະແໜງການຕົນ ເຊັ່ນ: ແຜນຍຸດທະສາດພັດທະນາວຽກງານສະຫວັດດີການສັງຄົມ 2016-2020, ນະໂຍບາຍແຫ່ງຊາດ ວ່າດ້ວຍການຮຽນຮ່ວມ 2016-2020, ແຜນການລືບລ້າງຄວາມທຸກຍາກ. ພ້ອມກັນນັ້ນ, ໄດ້ຂະຫຍາຍລະບົບການຮຽນຮ່ວມ ໄປຍັງບັນດາແຂວງບ່ອນທີ່ມີເງື່ອນໄຂ, ຜ່ານການປະຕິບັດ ເຫັນວ່າ ມີນັກຮຽນທີ່ເປັນຄົນພິການໄດ້ເຂົ້າຮຽນປະຖົມ ແລະ ມັດທະຍົມຈຳນວນກວ່າ 6.000 ຄົນ ໃນນີ້ມີນັກຮຽນທີ່ບັນຫາທາງສະໝອງ 98 ຄົນ, ພິການຕາ ແລະ ຫູ 142 ຄົນ, ຮຽນໃນລະດັບມະຫາວິທະຍາໄລ 10 ຄົນ ຍິງ 3 ຄົນ ແລະ ໄດ້ຂະຫຍາຍສູນຟື້ນຟູການແພດໜ້າທີ່ການໄປຍັງ 5 ແຂວງຈຸດສຸມ, ສ້າງສູນຜະລິດ ອົງຄະທຽມ ແລະ ຟຶ້ນຟູສະມັດຕະພາບຄົນພິການ ທີ່ບ້ານເກິນ ເພື່ອຜະລິດ ແລະ ສະໜອງອຸປະກອນເຄື່ອງຄ້ຳຊູ, ຊ່ວຍຊູ ໃຫ້ແກ່ຄົນພິການ ແລະ ຜູ້ອາຍຸສູງ ນຳໃຊ້ເຂົ້າໃນການດໍາລົງຊີວິດປະຈຳວັນ ເຊັ່ນລໍ້ເລື່ອນ ຈຳນວນ 4.453 ຄັນ, ແຂນຂາທຽມຈຳນວນ 3.631 ອັນ, ໄມ້ຄໍ້າເຖົ້າ, ເຄື່ອງຊ່ວຍຝັງ ແລະ ແວ່ນຕາຈຳນວນ 1.956 ອັນ, ລວມໄປເຖິງສະໜອງການຝຶກວິຊາຊີບ ແລະ ການປະກອບອາຊີບໄດ້ຈຳນວນ 937 ຄົນ. ສ້າງກອງທຶນໜູນວຽນ ເພື່ອພັດທະນາຄຸນນະພາບຊີວິດຜູ້ອາຍຸສູງ ຢູ່ແຂວງ ຫລວງພະບາງ, ຊຽງຂວາງ, ວຽງຈັນ, ນະຄອນ ຫລວງວຽງຈັນ ແລະ ແຂວງຈຳປາສັກ ໄດ້ຈຳນວນ 37 ບ້ານ ແລະ ສົ່ງເສີມການກວດສຸຂະພາບໃຫ້ຜູ້ອາຍຸສູງ ໂດຍບໍ່ໄດ້ເສຍຄ່າໃນແຕ່ລະປີ, ນອກນີ້, ໃນແຕ່ລະປີ ຍັງໄດ້ສົ່ງເສີມໃຫ້ມີການຈັດຕັ້ງ ສະເຫລີມສະຫລອງວັນສາກົນ ເພື່ອຄົນພິການ ແລະ ຜູ້ອາຍຸສູງເພື່ອເຜີຍແຜ່ ວຽກງານ, ບົດບາດ ແລະ ສິດທິຂອງຄົນພິການ ແລະ ຜູ້ອາຍຸສູງ ໃຫ້ສັງຄົມໄດ້ຮັບຮູ້ ແລະ ເຂົ້າໃຈ ພ້ອມທັງມີສ່ວນຮ່ວມ ໃນການປະຕິບັດສົນທິສັນຍາ ວ່າດ້ວຍສິດທິຂອງຄົນພິການ, ພ້ອມດ້ວຍນະໂຍບາຍ, ນິຕິກຳ ແລະ ແຜນງານຕ່າງໆ ທີ່ກ່າວມາຂ້າງເທິ່ງ ຄືດັ່ງທີ່ພວກເຮົາກຳລັງເຮັດ ໃນປະຈຸບັນ.



ຕໍ່ກັບຜູ້ເສຍອົງຄະ ແລະ ພິການ ທີ່ມີຜົນງານ ແລະ ຄຸນງາມຄວາມດີຕໍ່ພາລະກິດການປະຕິວັດຊາດ, ປະຊາທິປະໄຕ ລັດຖະບານ ໄດ້ເນັ້ນໜັກເອົາໃຈໃສ່ໃຫ້ການຊ່ວຍເຫຼືອ ຜ່ານມາໄດ້ສ້າງ ແລະ ສ້ອມແປງ ເຮືອນຢູ່ໃຫ້ຜູ້ເສຍອົງຄະປະເພດພິເສດ ຈຳນວນ 242 ທ່ານ ຕົກເປັນເງິນ 24.6 ຕື້ກີບ ແລະ ເງິນອຸດໜູນເສຍອົງຄະ ແຕ່ລະປະເພດຈຳນວນ 13.000 ກວ່າຄົນ, ເງິນອຸດໜູນຜູ້ດູແລ ແລະ ເງິນນະໂຍບາຍຕັດເຄື່ອງນຸ່ງຮົມ ໃຫ້ພະນັກງານເສຍອົງຄະຢູ່ 12 ສູນ ຕົກເປັນເງິນ 8.5 ຕື້ກີບ ລວມທັງ ເງິນອຸດໜູນຄອບຄົວ ໃນເວລາເສຍຊີວິດອີກດ້ວຍ.

ນອກນັ້ນ, ເພື່ອເຮັດໃຫ້ຊີວິດການເປັນຢູ່ຂອງຄົນພິການ ແລະ ຜູ້ອາຍຸສູງ ໄດ້ຮັບການປັບປຸງດີຂື້ນເທື່ອລະກ້າວ ໃຫ້ເຂົາເຈົ້າສາມາດຊ່ວຍເຫລືອຕົນເອງ, ມີສ່ວນຮ່ວມໃນການພັດທະນາຄອບຄົວ, ສັງຄົມ, ລັດຖະບານ ຈຶ່ງໄດ້ອະນຸມັດສ້າງຕັ້ງ ສະມາຄົມຄົນພິການລາວປະເພດຕ່າງໆ ແລະ ສະມາຄົມຜູ້ອາຍຸສູງຂຶ້ນ ໃນລະດັບສູນກາງ ແລະ ທ້ອງຖິ່ນ ໃນບ່ອນທີ່ມີເງື່ອນໄຂ ເພື່ອເປັນຕົວແທນໃນການປົກປ້ອງ ສິດຜົນປະໂຫຍດຂອງຄົນພິການ ແລະ ຜູ້ອາຍຸສູງ ໂດຍສະເພາະ ການລະດົມທຶນເຂົ້າມາພັດທະນາຕົນເອງ ຈາກ ສັງຄົມ, ອົງການຈັດຕັ້ງຕ່າງໆ ທັງພາຍໃນ ແລະ ຕ່າງປະເທດ ເພື່ອການຊ່ວຍດ້ານງົບ ປະມານ ທີ່ລັດຖະບານມີບໍ່ພຽງພໍ. ເຖິງວ່າດ້ານດີ ແລະ ຜົນສຳເລັດຂອງວຽກງານມີຫຼາຍອັນຕັ້ງໜ້າ ແຕ່ພວກເຮົາກໍຍັງປະເຊີນໜ້າກັບສິ່ງທ້າທາຍອີກຫລາຍສົມຄວນ ເຊັ່ນ: ແນວໂນ້ມຈໍານວນຄົນພິການ ທີ່ເພີ້ມສູງຂຶ້ນ ຈະເປັນຍ້ອນຕອນເກີດ, ຈາກລະເບີດບໍ່ທັນແຕກທີ່ຍັງຕົກຄ້າງ, ຈາກອຸປະຕິເຫດຕາມທ້ອງຖະໜົນ ແລະ ຈາກການເຮັດວຽກ ເຮັດໃຫ້ເກີດມີຫລາຍປະເພດຄວາມເປັນພິການ ເຊັ່ນ: ຫູໜວກ, ປາກກຶກ, ພິການຕາ, ແຂນຂາ, ພິການທາງສະໝອງ ແລະ ອື່ນໆ. ສະນັ້ນ, ຈິ່ງມີຄວາມຮຽກຮ້ອງຕ້ອງການສູງຂື້ນ ໃນການລົງທຶນເຂົ້າໃນການດູແລ, ປິ່ນປົວ, ການສຶກສາ, ການຝຶກວິຊາຊີບ ແລະ ການມີວຽກເຮັດງານທຳ ລວມທັງໂຄງລ່າງ ພຶ້ນຖານທີ່ອໍານວຍຄວາມສະດວກ ໃຫ້ກັບຄົນພິການ ແລະ ຜູ້ອາຍຸສູງ ເປັນເຫດຜົນໃຫ້ລັດຖະບານພວກເຮົາ ເພີ້ມທະວີການລົງທຶນ ໃຫ້ການຊ່ວຍເຫລືອ ສ້າງບຸກຄະລະກອນ ທີ່ມີຄວາມຮູ້-ຄວາມຊ່ຽວຊານຫລາຍດ້ານ, ສ້າງພື້ນຖານໂຄງລ່າງທີ່ເປັນມິດ ແລະ ສະໜອງອຸປະກອນເຄື່ອງຄ້ຳຊູ ເພື່ອເອື້ອອຳນວຍຄວາມສະດວກໃຫ້ແກ່ພວກເຂົາເຫຼົ່ານັ້ນ ເຮັດໃຫ້ ພວກເຂົາສາມາດເຂົ້າເຖິງ ການບໍລິການທາງສັງຄົມ, ເຂົ້າເຖິງການຮຽນຮ່ວມ, ການຝຶກວິຊາຊີບ ແລະ ການມີວຽກເຮັດງານທຳ, ສາມາດຊ່ວຍເຫລືອຕົນເອງ, ມີສ່ວນຮ່ວມໃນການພັດທະນາຄອບຄົວ ແລະ ສັງຄົມຕາມລຳດັບ. ພ້ອມກັນນັ້ນ, ພວກເຮົາຍັງຈະໄດ້ພ້ອມກັນ ສືບຕໍ່ປັບປຸງບັນດານະໂຍບາຍ, ນິຕິກໍາ ແລະ ກົນໄກການປົກປ້ອງ ແລະ ສົ່ງເສີມສິດຜົນປະໂຫຍດຂອງ ຄົນພິການ ໃຫ້ມີການຂະຫຍາຍລົງສູ່ທ້ອງຖິ່ນຮາກຖານ ແລະ ຊຸມຊົນ, ສືບຕໍ່ການໂຄສະນາ ເຜີຍແຜ່ນິຕິກຳ ທີ່ກ່ຽວກັບຄົນພິການ ແລະ ຜູ້ອາຍຸສູງ ໃຫ້ກວ້າງຂວາງ ແລະ ທົ່ວເຖິ່ງ ເພື່ອຈະໄດ້ຮັບຮູ້ວ່າວຽກງານຄົນພິການ ແລະ ຜູ້ອາຍຸສູງ ບໍ່ແມ່ນວຽກຂອງລັດຖະບານຝ່າຍດຽວ ແຕ່ເປັນວຽກທົ່ວສັງຄົມ ທີ່ຈະຕ້ອງໄດ້ມີສ່ວນຮ່ວມ ໃຫ້ການຊ່ວຍເຫລືອເຊິງກັນແລະກັນ, ປະຕິບັດໜ້າທີ່ດ້ານມະນຸດສະທຳຮ່ວມກັນ ເຊິ່ງມີຄວາມຈຳເປັນທີ່ສຸດໃນປະຈຸບັນນີ້ ກໍຄື ໃນອານາຄົດ.


ອີກເທື່ອໜຶ່ງ, ຕາງໜ້າໃຫ້ລັດຖະບານ, ຕາງໜ້າໃຫ້ບັນດາທ່ານຜູ້ພິການ ແລະ ຜູ້ອາຍຸສູງຂອງລາວໃນທົ່ວປະເທດ, ຂ້າພະເຈົ້າ ຂໍສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງ ຕໍ່ການຊ່ວຍເຫລືອອັນມີຄຸນຄ່າຈາກບັນດາທ່ານ, ຈາກການຈັດຕັ້ງທຸກພາກ ສ່ວນທັງພາຍໃນ ແລະ ຕ່າງປະເທດ ທີ່ຜ່ານມາໃຫ້ການສະໜັບສະໜູນ ທາງດ້ານເຕັກນິກວິຊາການ, ທຶນຮອນ ປະກອບສ່ວນເຂົ້າໃນການຊ່ວຍເຫລືອ ແລະ ພັດທະນາຄົນພິການ, ຜູ້ອາຍຸສູງ ແລະ ອົງການຈັດຕັ້ງຂອງຄົນພິການ ແລະຜູ້ອາຍຸສູງ ໃນໄລຍະຜ່ານມາກໍຄືປະຈຸບັນໄດ້ຮັບການຮ່ວມມືຊ່ວຍເຫລືອ ດ້ານມະນຸດສະທຳຈາກບັນດາທ່ານ ຕໍ່ໄປຕື່ມອີກເລື້ອຍໆ.

ພາຍໃນງານດັ່ງກ່າວຍັງມີການກວດສຸກຂະພາບຟີຣ, ສິນລະປະ, ວາງສະແດງສິນຄ້າ ແລະ ຈຳໜ່າຍຜະລິດຕະພັນຈາກສີມືຂອງຄົນພິການ ແລະ ຜູ້ອາຍຸສູງ ນຳຕື່ມອີກ./

ພາບ-ຂ່າວ: ເພັດສະໄໝ ພິມມະສອນ/ກະຊວງແຮງງານ ແລະ ສະຫວັດດີການສັງຄົມ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.