Header Ads

ການເກັບຄ່າເຂົ້າຊົມສະຖານທີ່ທ່ອງທ່ຽວຜ່ານປະຕູດຽວ ສາມາດສ້າງລາຍຮັບເຂົ້າງົບປະມານຢ່າງລວມສູນ ແລະ ໂປ່ງໃສ



ໃນ​ວັນ​ທີ 24 ຕຸລາ 2017 ຜ່ານ​ມານີ້, ທີ່​ກອງ​ປະຊຸມ​ສະ​ໄໝ​ສາມັນ​ເທື່ອ​ທີ 4 ຂອງ​ສະພາ​ແຫ່ງ​ຊາດ ຊຸດ​ທີ VIII ທ່ານ ສົມ​ພູ ດວງ​ສະຫວັນ ກຳມະການ​ຄະນະ​ປະຈຳ ທັງ​ເປັນ​ປະທານ​ກຳມາ​ທິການວັດທະນະທຳ-ສັງຄົມ​ ສະພາ​ແຫ່ງ​ຊາດ ​ໄດ້​​ປະກອບຄຳ​ຄິດ​ເຫັນ ຕໍ່​ບົດ​ລາຍ​ງານ​ຂອງ​ລັດຖະບານ ກ່ຽວ​ກັບ​ການຈັດ​ຕັ້ງ​ປະຕິບັດ​ວຽກ​ງານ​ການທ່ອງທ່ຽວ​ ໃນ​ຊຸມ​ປີຜ່ານມາ ​ແລະ ທິດ​ທາງ​ແຜນ​ພັດທະນາ ​ໃນ​ປີ 2018. ​ເຊິ່ງທ່ານ​ ໄດ້​ມີ​ຄຳ​ເຫັນວ່າ: ການ​ເຜີຍ​ແຜ່​ດຳລັດ​ວ່າ​ດ້ວຍ​ກອງ​ທຶນ​ການທ່ອງທ່ຽວ ສະບັບ​ເລກທີ 119/ລບ, ລົງ​ວັນ​ທີ 10/04/2017 ມາ​ຮອດປັດຈຸບັນ ຍັງ​ບໍ່​ທົ່ວ​ເຖິງເຊິ່ງການຈັດ​ຕັ້ງ​ປະຕິບັດ​ດຳ​ລັດ​ດັ່ງກ່າວ​ນີ້, ​ໄດ້​ເລີ່​ມ ປະຕິບັດ​ຢູ່​ບາງ​ແຂວງ​ເທົ່າ​ນັ້ນ ​ໂດຍ​ການ​ເກັບ​ເງິນ​ຈາກ​ນັກ​ທ່ອງ​ທ່ຽວ​ໂດຍ​ກົງ ຜູ້​ລະ 1 ​ໂດ​ລະສະ​ຫະລັດ ຢູ່​ດ່ານ​ຕົ້ນ​ທາງ​ເຂົ້າ​ກອງ​ທຶນ​ທ່ອງ​ທ່ຽວ, ​ແຕ່​ບາງ​ແຂວງ​ໄດ້​ຈັດ​ຕັ້ງ​ປະຕິບັດ​ມາ​ໄດ້​ໄລຍະໜຶ່ງ​ແລ້ວ ກໍ​ໄດ້​ສັ່ງ​ໂຈະ​ຍ້ອນ​ຄວາມ​ບໍ່​ເຂົ້າ​ໃຈ ​ແລະ ບໍ່​ເປັນ​ເອກະ​ພາບ​ກັນ​ໃນ​ການຈັດ​ຕັ້ງ​ປະຕິບັດ. ​ແຕ່​ເຖິງຢ່າງ​ໃດ​ກໍ​ຕາມ ຜ່ານ​ການ​ຄົ້ນຄວ້າ, ​ແລກປ່ຽນ​ຄວາມ​ຄິດ​ເຫັນ​ຈາກ​ຫລາຍ​ພາກສ່ວນ ​ແລະ ຜູ້​ປະກອບ​ການ​ເຫັນ​ວ່າ ຖ້າ​ປະຕິບັດ​ໄດ້​ ຈະ​ເປັນ​ການປະກອບ​ສ່ວນ​ສ້າງ​ກອງ​ທຶນ​ທ່ອງ​ທ່ຽວ​ໄດ້​ຫລາຍ​ຂຶ້ນ ຫລື ຖ້າ​ປະຕິບັດ​ກົນ​ໄກ​ການ​ກຳນົດ​ລາຄາ​ທີ່​ເໝາະ​ສົມ ​ແລະ ການ​ເກັບ​ຄ່າ​ເຂົ້າຊົມ​ສະຖານ​ທີ່​ທ່ອງ​ທ່ຽວ ​ຜ່ານ​ປະຕູ​ດຽວ​ ສາມາດ​ທ່ຽວ​ໄດ້​ຫລາຍ​ບ່ອນ​ຕາມ​ທີ່​ກຳນົດ ກໍ​ຈະ​ເປັນ​ການ​ສ້າງລາຍ​ຮັບ​ເຂົ້າ​ງົບປະມານ​ຢ່າງ​ລວມສູນ ​ແລະ ​ໂປ່​ງ​ໃສ.




ທ່ານ ສົມ​ພູ ດວງ​ສະຫວັນ ຍັງ​ມີ​ຄຳ​ເຫັນຕື່ມວ່າ: ການ​ພັດທະນາ​ແຫລ່ງທ່ອງ​ທ່ຽວ​ເຖິງ​ວ່າ​ຈະ​ມີ​ນະ​ໂຍບາຍ, ມີກົດໝາຍ​ຮອງ​ຮັບ, ມີ​ການ​ວາງ​ແຜນ​ໃນ​ແຕ່ລະດັບ, ກຳນົດ​ເປັນ​ແຜນ​ງານ ​ແລະ ມີ​ໂຄງການ​ລະອຽດ​ແລ້ວ​ກໍ​ຕາມ ແຕ່​ການ​ປະຕິບັດ​ຕົວ​ຈິງ ຍັງ​ບໍ່​ທັນ​ເປັນ​ຮູບ​ປະ​ທຳ​ເທົ່າ​ທີ່​ຄວນ, ການ​ລົງທຶນ​ໃສ່​ການ​ລົງ ທຶນ​ຍັງ​ຈຳກັດ, ຈຳນວນ​ໜຶ່ງ​ຍັງ​ອາ​ໄສ​ໂຄງການ​ຊ່ວຍ​ເຫລືອ​ຈາກ​ຕ່າງປະ​ເທດ, ຂອດ​ການ​ຄົ້ນຄວ້າ​ ອະ​ນຸມັດ​ການ​ລົງທຶນ​ຍັງ​ຜ່ານ​ຫລາຍ​ຂັ້ັ້ນຕອນ​ເຮັດ​ໃຫ້​ຊັກ​ຊ້າ, ບໍ່​ເລິກ​ເຊິ່ງຮອບດ້ານ ​ແລະ ການ​ພັດທະນາ​ບໍ່​ມີ​ຈຸດ​ສຸມ​ບູລິມະ​ສິດ. ​ເຊິ່ງວຽກ​ງານ​ການທ່ອງທ່ຽວ ​ເປັນ​ວຽກ​ທີ່​ຕິດພັນກັບ​ຫລາຍ​ພາກ​ສ່ວນ, ທຸກ​ຄົນຕ້ອງ​ມີ​ພັນທະ​ເຂົ້າ​ຮ່ວມ ​ແຕ່​ການ​ປະສານ​ສົມທົບ​ເຊິ່ງກັນ ​ແລະ ກັນ ​ໃນ​ໄລຍະ​ທີ່​ຜ່ານ​ມາ​ຍັງ​ບໍ່​ທັນ​ໄດ້​ດີ, ການ​ລົງທຶນ​ພັດທະ ນາ​ບາງ​ໂຄງການ​ຍັງ​ມີ​ຜົນ​ກະທົບ​ຕໍ່​ສິ່ງ​ແວດ​ລ້ອມ, ການ​ດຳລົງ​ຊີວິດຂອງ​ປະຊາຊົນ​ລາວ​ບັນດາ​ເຜົ່າ ​ແລະ ແຫ​ລ່ງທ່ອງ​ທ່ຽວ; ການ​ສຳ​ຫລວດ, ວາງ​ແຜນ ​ແລະ ການ​ພັດທະ ນາ​ບາງ​ແຫ​ລ່ງທ່ອງ​ທ່ຽວ​ ຍັງ​ບໍ່​ທັນ​ຄຳນຶງ​ເຖິງ​ຜົນ​ກະທົບ​ໄລຍະ​ຍາວ ​ແລະ ຮັບປະກັນ​ຄວາມ​ຍືນ​ຍົງ.

ພ້ອມ​ນີ້, ບັນດາ​ຫົວ​ໜ່ວຍ​ທຸລະ​ກິດ​ການ​ທອ່ງທ່ຽວ​ ເປັນ​ຕົ້ນ​ບໍລິສັດ​ທ່ອງ​ທ່ຽວ, ​ໂຮງ​ແຮມ​, ​ເຮືອນ​ພັກ, ຣີສອດ, ຮ້າ​ນອາຫານ-ພັດ​ຕະຄານ, ສ່ວນ​ໃຫຍ່​ຍັງ​ບໍລິຫານ​ແບບ​ຄອບຄົວດຳ​ເນີນ​ທຸລະ​ກິດ​ໂດຍ​ບໍ່​ມີ​ບົດ​ວິພາກ, ບໍ່​ຖື​ບັນ​ຊີ, ຜູ້​ປະກອບ​ການ​ຈຳນວນ​ໜຶ່ງ ສວຍ​ໂອກາດ​ເຮັດ​ຫລາຍ​ກິດຈະ​ການ​ໄປ​ຄຽງ​ຄູ່​ກັບ​ທຸລະ​ກິດ​ທີ່​ຕົນ​ໄດ້​ຮັບ​ອະນຸຍາດ, ມີ​ບາງ​ກິດຈະການ​ຜູ້ໄດ້ຮັບ​ອະນຸຍາດ​ແມ່ນ​ຄົນ​ລາວ ​ແຕ່​ການ​ດຳ​ເນີນ​ທຸລະ​ກິດຕົວ​ຈິງ​ ແມ່ນ​ຄົນ​ຕ່າງປະ​ເທດ; ການ​ບໍລິການ​ກິດຈະການ​ທ່ອງ​ທ່ຽວ​ເຫັນ​ແຕ່​ດ້ານ​ລາຍ​ຮັບ ​ແຕ່​ບໍ່​ຄຳນຶງ​ເຖິງ​ຜົນ​ກະທົບ​ທາ​ງດ້ານ​ສຸຂະພາບ, ຄວາມ​ປອດ​ໄພ​ຂອງ​ຜູ້​ມາ​ໃຊ້​ບໍລິການ, ຄ່າ​ພັກ​ແຮມ, ລາຄາ​ອາຫານ, ​ເຄື່ອງ​ດື່ມ, ​ເຄື່ອງ​ທີ່​ລະນຶກ, ຄ່າ​ທ່ຽວ​ຊົມ, ຄ່າ​ຂົນ​ສົ່ງ​ພາຍ​ໃນ​ມີ​ຫາງ​ສຽງ​ຈົ່ມ​ວ່າ​ຈາກ​ນັກ​ທ່ອງ​ທ່ຽວ ມີ​ລາຄາ​ແພງ​ຖ້າ​ທຽບ​ໃສ່​ບັນດາ​ປະ​ເທດ​ອ້ອມ​ຂ້າງ ​ເຊິ່ງສາ​ເຫດ​ອາດ​ຈະ​ມາ​ຈາກ​ສິນຄ້າ​ສ່ວນ​​ໃຫຍ່​ ແມ່ນ​ນຳ​ເຂົ້າ​ຈາກ​ຕ່າງປະ​ເທດ ຫລື ມີ​ການ​ສວຍ​ໂອກາດ​ຈາກ​ຜູ້​ປະກອບ​ການ ​ແລະ ການ​ຄຸ້ມ​ຄອງຂອງ​ພາກສ່ວນ​ທີ່​ກ່ຽວຂ້ອງ, ບາງ​ແຫ​ລ່ງທ່ອງ​ທ່ຽວ​ທີ່​ສຳຄັນ ກໍ​ຍັງ​ບໍ່​ໄດ້​ເອົາ​ໃຈ​ໃສ່​ລະບົບ​ຄວາມ​ປອດ​ໄພ​​ເທົ່າ​ທີ່​ຄວນ​ ​ເປັນ​ຕົ້ນ​ແມ່ນ​ຍັງ​ບໍ່​ໄດ້​ຕິດ​ຕັ້ງ​ ອຸປະກອນ​ຕິດຕາມ​ຄວາມ​ປອດ​ໄພ (ກ້ອງ​ວົງ​ຈອນ​ປິດ) ​ແລ​ະ ໜ່ວຍ​ງານ​ຊ່ວຍ​ເຫລືອ​ສຸກ​ເສີນ​ຢູ່​ສະຖານ​ທີ່​ທ່ອງ​ທ່ຽວ​ຂອງ​ຕົນ.

ຂ່າວ: ສົມ​ຫວັງ ພາບ: ​ໄອ່​ຄຳ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.