Header Ads

ເຈົ້າໜ້າທີ່ກອງບັນຊາການ ປກສ ແຂວງບໍ່ແກ້ວ ມອບຜູ້ຖືກຫາຄະດີຢາເສບຕິດ ໃຫ້ເຈົ້າໜ້າທີ່ຕໍາຫຼວດໄທ



ເຈົ້າໜ້າທີ່ກອງບັນຊາການ ປກສ ແຂວງບໍ່ແກ້ວ ສປປ ລາວ ໄດ້ມອບຕົວ ທ້າວ ໂກວິດ ແຊຊົງ ອາຍຸ 28 ປີ ເຊື້ອຊາດໄທ ສັນຊາດໄທ ຢູ່ບ້ານສາມ ເມືອງເທີງ ແຂວງຊຽງຮາຍ ປະເທດໄທ ຜູ້ຖືກຫາຄະດີຄ້າຂາຍຢາເສບຕິດ ໃຫ້ເຈົ້າໜ້າທີ່ຕໍາຫຼວດໄທ ພາຍຫຼັງເຈົ້າໜ້າທີ່ຕໍາຫຼວດລາວຊ່ວຍຈັບ ໃນຂະນະທີ່ເອົາຕົວລີ້ຊ້ອນຢູ່ແຂວງບໍ່ແກ້ວ ເພື່ອໄປດໍາເນີນຄະດີຕາມກົດໝາຍ.
ພັຕ ສົມປອງ ແກ້ວປັນຍາ ຫົວໜ້າພະແນກຕໍາຫຼວດກວດຄົນເຂົ້າ-ອອກເມືອງ ຫົວໜ້າດ່ານ ຕມ ຂົວມິດຕະພາບ 4 ປກສ ແຂວງບໍ່ແກ້ວ ໃຫ້ຮູ້ວ່າ: ຜູ້ຖືກຫາລາຍນີ້ ແມ່ນພົວພັນກັບຄະດີ ມີຢາເສບຕິດໄວ້ໃນຄອບຄອງຢູ່ປະເທດໄທ ແລ້ວໄດ້ເອົາຕົວຫຼົບໜີມາຢູ່ແຂວງບໍ່ແກ້ວ ໃນວັນທີ 1 ກັນຍາ 2017, ມາຮອດວັນທີ 6 ກັນຍາ 2017 ຈຶ່ງໄດ້ຖືກເຈົ້າໜ້າທີ່ ປກສ ແຂວງບໍ່ແກ້ວ ກັກຕົວໃນຂໍ້ຫາລັກລອບເຂົ້າ-ອອກເມືອງຜິດກົດໝາຍ ແລ້ວປະສານຫາເຈົ້າໜ້າທີ່ຕຳຫຼວດໄທ ເພື່ອສົ່ງຕົວໄປດໍາເນີນຄະດີຕາມກົດໝາຍ.
ພິທີມອບຕົວຜູ້ຖືກຫາດັ່ງກ່າວ ໄດ້ຈັດຂຶ້ນໃນທ້າຍອາທິດຜ່ານມາ ຢູ່ ຕມ ສາກົນ ຂົວມິດຕະພາບ 4 ເມືອງຫ້ວຍຊາຍ ແຂວງບໍ່ແກ້ວ ໂດຍການຕາງໜ້າມອບຂອງ ພັຕ ສົມປອງ ແກ້ວປັນຍາ ຫົວໜ້າພະແນກຕໍາຫຼວດກວດຄົນເຂົ້າ-ອອກເມືອງ ຂົວມິດຕະພາບ 4, ຝ່າຍໄທ ກ່າວຮັບໂດຍ ພັທ ຍິງ ຫະໄທລັດ ຈຸນລະສາດ ຫົວໜ້າດ່ານ ຕມ ຂົວມິດຕະພາບ 4 ຊຽງຂອງ ແຂວງຊຽງຮາຍ ປະເທດໄທ.
ພາບ ແລະ ຂ່າວ:  ໜັງສືພິມ ຄວາມສະຫງົບ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.