Header Ads

ພິທີມອບ-ຮັບເຄື່ອງຊ່ວຍເຫຼືອ



ໃນຕອນແລງ ຂອງວັນທີ 20 ຕຸລາ 2017 ທີ່ຫ້ອງວ່າການສຳນັກງານນາຍົກລັດຖະມົນຕີ ໄດ້ມີພິທີມອບ-ຮັບເຄື່ອງຊ່ວຍເຫຼືອ ຈາກບໍລິສັດ ເອບີ ກໍ່ສ້າງຂົວທາງ ແລະ ສ້ອມແປງເຄຫາສະຖານ ຈຳກັດຜູ້ດຽວ. ໂດຍການກ່າວຮັບຂອງທ່ານ ຮສຈ.ປອ. ສົມກຽດ ພະສີ ຫົວໜ້າກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ ແລະ ກ່າວມອບໂດຍທ່ານ ອາຊາງ ຜູ້ອຳນວຍການບໍລິສັດ ເອບີ ກໍ່ສ້າງຂົວທາງ ແລະ ສ້ອມແປງເຄຫາສະຖານ ຈຳກັດຜູ້ດຽວ. ຊຶ່ງໃຫ້ກຽດເຂົ້າຮ່ວມມີທ່ານ ປອ.ນ. ວຽງສະຫວັນ ດວງສະຫວັນ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ພ້ອມດ້ວຍພະນັກງານທີ່ກ່ຽວຂ້ອງ ຈາກສອງຝ່າຍ.

ເຄື່ອງທີ່ນຳມາມອບໃນຄັ້ງນີ້ ປະກອບມີ: ອຸປະກອນການຮຽນ, ອຸປະກອນກິລາ, ເຄື່ອງນຸ່ງຫົ່ມ, ໂຄມໄຟແສງຕາເວັນ ແລະ ອື່ນໆ ລວມມູນຄ່າທັງໝົດ ປະມານ 100 ລ້ານກີບ. ໂດຍມີຈຸດປະສົງ ມອບໃຫ້ຫ້ອງວ່າການສຳນັກງານນາຍົກລັດຖະມົນຕີ ເພື່ອນຳໄປຊ່ວຍເຫຼືອປະຊາຊົນ ຜູ້ເຄາະຮ້າຍປະສົບໄພພິບັດນ້ຳຖ້ວມ ປີ 2017 ໃນຂອບເຂດທົ່ວປະເທດ. ໃນໂອກາດດັ່ງກ່າວ, ທ່ານ ຮສຈ.ປອ. ສົມກຽດ ພະສີ ໄດ້ກ່າວສະແດງຄວາມຂອບໃຈ ຕໍ່ການຊ່ວຍເຫຼືອຂອງບໍລິສັດ ເອບີ ກໍ່ສ້າງຂົວທາງ ແລະ ສ້ອມແປງເຄຫາສະຖານ ຈຳກັດຜູ້ດຽວ ໃນຄັ້ງນີ້ ພ້ອມທັງ ໃຫ້ຄຳໝັ້ນສັນຍາວ່າ ຈະນຳເອົາເຄື່ອງທີ່ໄດ້ຮັບການຊ່ວຍເຫຼືອດັ່ງກ່າວ ໄປແຈກຢາຍໃຫ້ເຖິງ ແລະ ຖືກເປົ້າໝາຍຢ່າງແທ້ຈິງ. ໃນຂະນະດຽວກັນ, ທ່ານ ຮສຈ.ປອ. ສົມກຽດ ພະສີ ຍັງຫວັງຢ່າງຍິ່ງວ່າ ທາງບໍລິສັດ ເອບີ ກໍ່ສ້າງຂົວທາງ ແລະ ສ້ອມແປງເຄຫາສະຖານ ຈຳກັດຜູ້ດຽວ ຈະສືບຕໍ່ໃຫ້ການຊ່ວຍເຫຼືອຜູ້ທຸກຍາກ, ຜູ້ເຄາະຮ້າຍປະສົບໄພທຳມະຊາດ-ໄພພິບັດຕ່າງໆ ແລະ ດ້ອຍໂອກາດ ກໍ່ຄື ສັງຄົມຕື່ມອີກ ໃນອະນາຄົດ.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.