Header Ads

ຖວທ ໄດ້ຈັດພິທີ ຍ່າງ ເພື່ອສຸຂະພາບ ເນື່ອງໃນວັນສະເຫລີມສະຫລອງ ວັນທ່ອງທ່ຽວໂລກ ແລະ ປີສາກົນແຫ່ງການທ່ອງທ່ຽວແບບຢືນຍົງເພື່ອພັດທະນາ



ກະຊວງຖະແຫລງຂ່າວວັດທະນະທຳ ແລະ ທ່ອງທ່ຽວ ໄດ້ຈັດພິທີ ຍ່າງ ເພື່ອສຸຂະພາບ ເນື່ອງໃນວັນສະເຫລີມສະຫລອງ ວັນທ່ອງທ່ຽວໂລກ, ປີສາກົນແຫ່ງການທ່ອງທ່ຽວແບບຢືນຍົງເພື່ອພັດທະນາ ຂຶ້ນໃນວັນທີ 30 ກັນຍານີ້ ທີ່ສວນປະຕູໄຊ ນະຄອນຫລວງວຽງຈັນ ໂດຍເປັນກຽດເຂົ້າຮ່ວມ ຂອງ ສາດສະດາຈານ ດອກເຕີ ບໍແສງຄຳ ວົງດາລາ ລັດຖະມົນຕີ ກະຊວງ ຖະແຫລງຂ່າວວັດທະນະທຳ ແລະທ່ອງທ່ຽວ ພ້ອມດ້ວຍ ຮອງລັດຖະມົນຕີ, ຫົວໜ້າກົມ, ຮອງກົມ ແລະມວນຊົນຊາວນະຄອນຫລວງວຽງຈັນເຂົ້າຮ່ວມ 700 ຄົນ.



ໂອກາດກ່າວເປີດພິທີ ສາດສະດາຈານ ດອກເຕີ ບໍແສງຄຳ ວົງດາລາ ໄດ້ກ່າວວ່າ: ການທ່ອງທ່ຽວເປັນອຸດສະຫະກຳໜຶ່ງ ທີ່ມີການຂະຫຍາຍຕົວ ຢ່າງວ່ອງໄວ ແລະກວ້າງຂວາງຢູ່ບັນດາປະເທດໃນໂລກ. ໃນປະຈຸບັນມີຫລາຍປະເທດໄດ້ເອົາໃຈໃສ່ເປັນພິເສດຕໍ່ການພັດທະນາ ແລະສົ່ງເສີມການທ່ອງທ່ຽວ ແລະຖືເປັນຂະແໜງເສດຖະກິດປາຍແຫລມ ເພື່ອພັດທະນາເສດຖະກິດສັງຄົມຂອງປະເທດຕົນ. ໂດຍເຫັນໄດ້ຄວາມສຳຄັນ ຂອງອຸດສະຫະກຳທ່ອງທ່ຽວ ໃນປີ 1975 ອົງການທ່ອງທ່ຽວໂລກ ໄດ້ຮັບການສ້າງຕັ້ງຂຶ້ນ ເພື່ອປ່ຽນແທນສະຫະພັນທ່ອງທ່ຽວສາກົນທີ່ສ້າງຕັ້ງຂຶ້ນ ໃນປີ 1925 ໃນເວລານັ້ນມີສະມາຊິກພຽງແຕ່ 109 ປະເທດ ມາຮອດປະຈຸບັນອົງການທ່ອງທ່ຽວໂລກ ມີສະມາຊິກທັງໝົດ 156 ປະເທດ, 7 ເຂດພິເສດຕົນເອງ, ສະມາຊິກຮ່ວມ ຈາກພາກສ່ວນທຸລະກິດ ແລະສະຖາບັນສຶກສາ ອີກ 500 ແຫ່ງ. ໃນນັ້ນ ລາວໄດ້ເຂົ້າເປັນສະມາຊິກຖາວອນ ຂອງອົງການທ່ອງທ່ຽວໂລກ ໃນປີ 1971 ເປັນຕົ້ນມາ.



ໃນປີ 2016 ມີນັກທ່ອງທ່ຽວ ທົ່ວໂລກ 1.235 ລ້ານຄົນ ສ້າງລາຍຮັບຕໍ່ການທ່ອງທ່ຽວ 32.000 ຕື້ ໂດລາສະຫະລັດ ປະກອບສ່ວນເຂົ້າໃນ GDP ຂອງໂລກ 10%, 7% ຂອງການສົ່ງອອກ ທົ່ວໂລກ ແລະສ້າງວຽກເຮັດງານທຳໄດ້ເຖິງ 10% ຂອງຈຳນວນແຮງງານທົ່ວໂລກ. ຈຳນວນນັກທ່ອງທ່ຽວ ເຂົ້າມາຢ້ຽມຢາມລາວ ປີ 2016 ມີທັງໝົດ 4.239.047 ຄົນ ລາຍຮັບຈາກການທ່ອງທ່ຽວ ແມ່ນ 725.365.681 ໂດລາ . ທຸກໆປີບັນດາປະເທດສະມາຊິກອົງການທ່ອງທ່ຽວໂລກ ຈະໄດ້ຈັດສະເຫລີມສະຫລອງວັນທ່ອງທ່ຽວໂລກ ດ້ວຍການຈັດກິດຈະກຳຫລາຍຮູບແບບ ຕາມເງື່ອນໄຂ ແລະຄວາມເໝາະສົມຂອງແຕ່ລະປະເທດ.




ພາບ ແລະ ຂ່າວ: ວິທະຍຸກະຈາຍສຽງແຫ່ງຊາດ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.