Header Ads

ສະຫາຍຮອງນາຍົກລັດຖະມົນຕີ ສືບຕໍ່ເຮັດວຽກ ແລະ ຢ້ຽມຢາມ ແຂວງເບນແຈ ສສ ຫວຽດນາມ





 ໃນຕອນເຊົ້າຂອງວັນທີ 26 ຕຸລາ 2017 ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ພ້ອມດ້ວຍຄະນະ ໄດ້ສືບຕໍ່ເດີນທາງໄປຢ້ຽມຢາມ ແລະ ເຮັດວຽກຢູ່ ແຂວງເບນແຈ ໂດຍມີ ສະຫາຍ ຫວໍ ແທງ ດ້າວ ເລຂາພັກແຂວງ, ປະທານສະພາປະຊາຊົນແຂວງ  ພ້ອມດ້ວຍຄະນະນຳແຂວງ ໃຫ້ການຕ້ອນຮັບຢ່າງອົບອຸ່ນ.


ໃນການເດີນທາງໄປຢ້ຽມຢາມ ແລະ ເຮັດວຽກຂອງຄະນະສະຫາຍ ຮອງນາຍົກລັດຖະມົນຕີ ໃນຄັ້ງນີ້, ກ່ອນອື່ນສະຫາຍ ເລຂາພັກແຂວງ, ປະທານສະພາປະຊາຊົນແຂວງ ກໍ່ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ເຊິ່ງຢູ່ໃນໄລຍະທ່າມກາງບັນຍາກາດ ທີ່ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມຮ່ວມກັນສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2017 ກໍ່ຄື ສອງວັນປະຫວັດສາດ: ຄົບຮອບ 40 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ແລະ 55 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສອງປະເທດ. ຖືໂອກາດນີ້, ສະຫາຍເລຂາພັກແຂວງ, ປະທານສະພາປະຊາຊົນ ແຂວງເບນແຈ ກໍ່ໄດ້ລາຍງານ ກ່ຽວກັບສະພາບຈຸດພິເສດທີ່ຕັ້ງ ແລະ ການພັດທະນາເສດຖະກິດ-ສັງຄົມຂອງແຂວງ. ແຂວງເບນແຈ ເປັນແຂວງໜຶ່ງທີ່ຕັ້ງຢູ່ເຂດລຸ່ມສຸດ ຂອງທົ່ງພຽງແມ່ນໍ້າຂອງ ແລະ ສ່ວນໃຫຍ່ ຖືກອ້ອມຮອບໄປດ້ວຍແມ່ນໍ້າລໍາເຊ, ເຊິ່ງມີທີ່ຕັ້ງຫ່າງຈາກນະຄອນໂຮ່ຈິມີນ ປະມານ 87 ກິໂລແມັດ ໂດຍຜ່ານ ແຂວງຕຽນຢາງ ແລະ ແຂວງລອງບຽນ; ປະກອບມີ 9 ເມືອງ, ມີພົນລະເມືອງປະມານ 1,5 ລ້ານຄົນ, ສະພາບການພັດທະນາເສດຖະກິດ-ສັງຄົມ ກໍ່ໄດ້ມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນ ກໍ່ໄດ້ ຮັບການປັບປຸງ ແລະ ຍົກສູງຂຶ້ນເປັນກ້າວໆ, ລາຍໄດ້ສະເລ່ຍປະມານ 2.000 ໂດລາສະຫະລັດຕໍ່ຄົນຕໍ່ປີ. ທ່າແຮງຕົ້ນຕໍ ທີ່ເປັນລາຍຮັບທາງດ້ານເສດຖະກິດ ແມ່ນດ້ານກະສິກໍາ ເຊິ່ງກວມເອົາ 3 ໜ້າວຽກທີ່ສໍາຄັນ ເປັນຕົ້ນ: ການປະມົງສິນຄ້າທາງທະເລ, ຜະລິດຕະພັນໝາກພ້າວ, ການປູກຝັງ ແລະ ລ້ຽງສັດ ຢູ່ລຽບຝັ່ງແມ່ນໍ້າເຄັມ.

ໃນນັ້ນ, ທ່າແຮງການຜະລິດຕະພັນໝາກພ້າວ ໄດ້ກວມເອົາເນື້ອທີ່ດິນຂອງແຂວງເປັນສ່ວນໃຫຍ່; ອົງປະກອບທາງດ້ານເສດຖະກິດ ມີ: ຂະແໜງກະສິກໍາ ກວມເຖິງ 40%, ຂະແໜງອຸດສາຫະກໍາ ກວມ 20%, ສ່ວນທີ່ຍັງເຫຼືອແມ່ນຂະແໜງການອື່ນໆ; ສໍາລັບແແຜນໃນຕໍ່ໜ້າ ໂດຍອີງໃສ່ຈຸດພິເສດ, ທີ່ຕັ້ງ ແລະ ທ່າແຮງ ຂອງແຂວງແລ້ວ ຈະໄດ້ຖືເອົາການພັດທະນາວຽກງານການທ່ອງທ່ຽວ ເພື່ອສາມາດສ້າງເປັນລາຍຮັບຂອງແຂວງ ໂດຍຕິດພັນກັບການທ່ອງທ່ຽວ ທາງດ້ານວັດທະນະທໍາ ແລະ ກະສິກໍາ ຕື່ມອີກ. ເຖິງແນວໃດກໍ່ດີ, ສະຫາຍເລຂາພັກແຂວງ, ປະທານສະພາປະຊາຊົນແຂວງ ຍັງໄດ້ແຈ້ງໃຫ້ຊາບກ່ຽວກັບບັນດາບັນຫາ ທີ່ເປັນສິ່ງທ້າທາຍ ແລະ ມີຜົນກະທົບ ຕໍ່ການພັດທະນາເສດຖະກິດ-ສັງຄົມ ຂອງແຂວງ ເວົ້າລວມ, ເວົ້໋າສະເພາະ ຜົນກະທົບຕໍ່ດ້ານຜະລິດດ້ານກະສິກໍາ ແມ່ນບັນຫາການປ່ຽນແລວທາງຂອງການໄຫຼນໍ້າ ຂອງແມ່ນໍ້າຂອງ ແລະ ບັນຫານໍ້າເຄັມຍູ້ເຂົ້າມາຫາ ດິນປູກຝັງຂອງປະຊາຊົນ ແລະ ຖືໂອກາດນີ້ ຕາງໜ້າໃຫ້ການນໍາຂອງແຂວງ, ປະຊາຊົນຊາວແຂວງເບນແຈ ຂໍສະແດງຄວາມຂອບໃຈເປັນຢ່າງສູງ ມາຍັງພັກ, ລັດຖະບານ ແລະ ປະຊາຊົນລາວ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອແຂວງເບນແຈ ໃນໄລຍະຜ່ານມາ ເວົ້າລວມ, ເວົ້າສະເພາະ ກໍ່ຄືການແລກປ່ຽນຖອດຖອນບົດຮຽນ, ການປົກປັກຮັກສາ ແລະ ການຄຸ້ມຄອງໃຊ້ນໍ້າຂອງ ພ້ອມທັງ ຫວັງຢ່າງຍິ່ງວ່າ ໃນຕໍ່ໜ້າ ພັກ  ແລະ ລັດຖະບານລາວ ກໍ່ຄື ປະຊາຊົນລາວບັນດາເຜົ່າ ຍັງຈະໃຫ້ການສະໜັບສະໜູນຊ່ວຍເຫຼືອ ໃນການປົກປັກຮັກສາ, ຄຸ້ມຄອງແຫຼ່ງນໍ້າດັ່ງກ່າວ ເພື່ອເຮັດໃຫ້ການນໍາໃຊ້ແມ່ນໍ້າຂອງ ໃຫ້ເກີດປະໂຫຍດສູງສຸດ ທັງເປັນການປະກອບສ່ວນເຂົ້າ ໃນການພັດທະນາເສດຖະກິດ ຂອງສອງປະເທດ.




ໃນໂອກາດນີ້, ສະຫາຍຮອງນາຍົກລັດຖະມົນຕີ ກໍ່ໄດ້ສະແດງຄວາມຂອບໃຈເປັນຢ່າງສູງ ມາຍັງອໍານາດການປົກຄອງ ແລະ ປະຊາຊົນແຂວງເບນແຈ ທີ່ສ້າງເງື່ອນໄຂອໍານວຍຄວາມສະດວກ ຕະຫຼອດໄລຍະເຄື່ອນໄຫວເຮັດວຽກ ຢູ່ແຂວງເບນແຈ ແລະ ໂອກາດດຽວກັນ ສະຫາຍຮອງນາຍົກລັດຖະມົນຕີ ກໍ່ໄດ້ແຈ້ງຈຸດປະສົງຂອງ ການເດີນທາງມາຢ້ຽມຢາມ ແລະ ເຮັດວຽກຂອງຄະນະ ຢູ່ ສສ ຫວຽດນາມ ຄັ້ງນີ້ ໃຫ້ແກ່ຄະນະນໍາຂອງແຂວງເບນແຈ ໄດ້ຮັບຊາບ.


ຕໍ່ກັບການພັດທະນາເສດຖະກິດ-ສັງຄົມ ຂອງແຂວງນັ້ນ, ສະຫາຍຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍຢ່າງຈິງໃຈ ຕໍ່ບັນດາຜົນສຳເລັດ ຂອງອຳນາດການປົກຄອງແຂວງ ແລະ ປະຊາຊົນ ພາຍໃນແຂວງ ສາມາດຍາດມາໄດ້ຢ່າງໃຫຍ່ຫຼວງ ແລະ ຕີລາຄາສູງຕໍ່ສາຍພົວພັນການຮ່ວມມືຂອງສອງປະເທດ ໃນໄລຍະຜ່ານມາ ແລະ ຖືໂອກາດນີ້ ເຊື້ອເຊີນການນໍາຂອງແຂວງ ແລະ ບັນດາບໍລິສັດ, ຜູ້ປະກອບການຕ່າງໆ ໄປຢ້ຽມຢາມ ແລະ ສຶກສາສໍາຫຼວດຄວາມເປັນໄປໄດ້ ໃນການລົງທຶນເຂົ້າໃນຂົງເຂດກະສິກໍາ ກໍ່ຄື ຂົງເຂດອື່ນໆ ຕາມຄວາມສາມາດຕົວຈິງ ແລະ ທ່າແຮງບົ່ມຊ້ອນ ຂອງ ສປປ ລາວ ທັງນີ້ ກໍ່ເພື່ອເປັນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນແບບພິເສດ ແລະ ການຮ່ວມມືຮອບດ້ານ ຂອງສອງປະເທດ ເວົ້າລວມ, ເວົ້າ ສະເພາະ ແມ່ນການພົວພັນຮ່ວມມື ລະຫວ່າງ ແຂວງເບນແຈ ກັບບັນດາແຂວງຢູ່ທ້ອງຖິ່ນຂອງ​ ສປປ ລາວ ໃຫ້ນັບມື້ນັບຮັດແໜ້ນ ແລະ ກ້າວສູ່ລວງເລິກຕົວຈິງຫຼາຍຂຶ້ນກວ່າເກົ່າ.

ໃນໄລຍະເຄື່ອນໄຫວເຮັດວຽກຢູ່ ແຂວງດັ່ງກ່າວ ສະຫາຍຮອງນາຍົກລັດຖະມົນຕີ ຍັງໄດ້ໄປຢ້ຽມຢາມ ໂຮງງານປຸງແຕ່ງໝາກພ້າວ ເລືອງເກີຍ ຕື່ມອີກ.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.