Header Ads

ຄູ ມີບົດບາດສຳຄັນໃນການສິດສອນ ແລະ ພັດທະນາ ຊັບພະຍາກອນມະນຸດ



ຄູ​ເປັນ​ຜູ້​ທີ່​ມີ​ບົດບາດ​ສຳຄັນ​ ໃນ​ການ​ສິດສອນ ກໍ​ຄື ການ​ພັດທະນາ​ຊັບພະຍາກອນ​ມະນຸດ ​​ໂດຍ​ການຖ່າຍ​ທອດ​ວິຊາ​ຄວາມ​ຮູ້​, ຄວາມສາມາດ, ສະຕິປັນຍາ, ຄວາມເປັນແບບຢ່າງ ​ໃຫ້​ແກ້​ຜູ້​ສຶກສາ​ຮໍ່າຮຽນ ຖ້າ​ບໍ່​ມີ​ຄູ ຄົນ​ເຮົາ​ກໍ​ຈະ​ບໍ່​ມີ​ຄວາມ​ຮູ້ ​ແລະ ບໍ່ມີໃຜໃນໂລກນີ້ ຈະປະຕິເສດບົດບາດຂອງຄູໄດ້ ນັບແຕ່ພະນັກງານຂັ້ນສູງ ຫລື ນັກທຸລະກິດ ຜູ້ທີ່ປະສົບຜົນສໍາເລັດ ໂດຍປາສະຈາກຄູ.

ທ່ານ​ ນາງ ​ແສງ​ເດືອນ ຫລ້າ​ຈັນທະ​ບູນ ລັດຖະມົນຕີ​ກະຊວງ​ສຶກສາ​ທິການ ​ແລະ ກິລາ ​ໄດ້​ກ່າວ​ໃນ​ໂອກາດໃຫ້​ສຳພາດ​ຕໍ່​ສື່​ມວນ​ຊົນ ​ໃນ​ວັນ​ທີ 4 ຕຸລາ 2017 ນີ້ວ່າ: ​ໂດຍ​ເຫັນ​ໄດ້​ບົດບາດ​ສຳຄັນ ​ຂອງ​ຄູ ​ແລະ ​ເພື່ອ​ໃຫ້ຄູ-ອາຈານ ​ໄດ້​ພັດທະນາ​ຕົນ​ເອງ​ໃຫ້​ດີ​ຂຶ້ນ ​ແລະ ປະຕິບັດ​ໜ້າ​ທີ່​ການ​ສິດສອນ​​ຢ່າງ​ເຕັມທີ່​ນັ້ນ ໄດ້ຮຽກຮ້ອງ​ໃຫ້​ອົງການ​ຈັດ​ຕັ້ງ​ທັງ​ພາກ​ລັດ ​ແລະ ພາກ​ເອກະ​ຊົນ ທັງ​ພາຍ​ໃນ ​ແລະ ຕ່າງປະ​ເທດ ກໍ​ຄື ທຸກ​ພາກສ່ວນ​ໃນ​ສັງຄົມ​ ຈົ່ງ​ພ້ອມ​ກັນ​ສ້າງ​ເງື່ອນ​ໄຂ ​ແລະ ​ເອື້​ອອຳນວຍຄວາມ​ສະດວກ​ດ້ານ​ຕ່າງໆ​ ໃຫ້​ແກ່​ເຂົາ​ເຈົ້າ​ ໄດ້​ຮັບ​ຕາມ​ນະ​ໂຍບາຍ​ທີ່​ໄດ້​ກຳນົດ ​ໃນ​ລະບຽບ​ກົດໝາຍ ​ເປັນ​ຕົ້ນ ການ​ຕອບ​ສະໜອງ​ເງິນ​ເດືອນ, ​ເງິນ​ນະ​ໂຍບາຍ​ຕ່າງ​ໆ​ ໃຫ້​ທັນ​ເວລາ, ການ​ຍົກ​ສູງ​ບົດບາດ​ຂອງ​ຄູ​ ຢູ່​ໃນ​ສັງຄົມ ​ແລະ ການ​ສະໜອງ​ທີ່​ພັກ​ອາ​ໄສ​ ຕາມ​ຄວາມ​ເໝາະ​ສົມ​ໃຫ້​ຄູ, ​ໂດຍ​ສະ​ເພາະ​ແມ່ນ​ຜູ້​ທີ່ຢູ່​ເຂດ​ຊົນ​ເຜົ່າ ​ແລະ ​ເຂດ​ຊົນນະບົດຫ່າງ​ໄກ​ສອກຫລີກ.

ທ່ານ​ລັດຖະມົນຕີ​ ​ໃຫ້​ຮູ້​ຕື່ມວ່າ: ​ເພື່ອ​ຮັບປະກັນ​ຄຸນ​ນະພາ​ບການ​ສຶກສາ​ ໃຫ້​ດີ​ຂຶ້ນ​ຢ່າງ​ຕໍ່​ເນື່ອງນັ້ນ, ຄູ​-ອາຈານ ຈະ​ຕ້ອງ​ໄດ້​ຕັ້ງໜ້າ​ຝຶກ​ຝົນ​ຫລໍ່​ຫລອມ ​ແລະ ພັດທະນາ​ຕົນ​ເອງ​ໃຫ້​ທັນ​ກັບ​ຍຸກ​ສະ​ໄໝ, ​ໂດຍ​ສະ​ເພາະ ​ແມ່ນ​ພັດທະນາ​ວິທີ​ການ​ສິດສອນ ​ແລະ ການ​ຄົ້ນຄວ້າ​ວິ​ໄຈ ​ທາງ​ດ້ານ​ວິທະຍາສາດ, ​ ​ເຊິ່ງຄູຕ້ອງ​ພັດທະນາ​ ການ​ສິດສອນ​ຂອງ​ຕົນ​ດ້ວຍ​ຫລາກຫລາຍ​ວິທີ ​ເພາະ​ບໍ່​ມີ​ວິທີ​ການ​ສິດສອນ​ໃດ ​ທີ່​ເປັນ​ຫລັກການ​ຕາຍ​ຕົວ ແລະ ອື່ນໆ.

ຂ່າວ: ຈັນທະ​ລອນ; ພາບ: ສະຫວາດ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.