Header Ads

ກົມສ່ວຍສາອາກອນ ຮ່ວມກັບ ທຄຕລ ຊຳລະຄ່າທຳນຽມທາງຜ່ານລະບົບທະນາຄານ



ກົມ​ສ່ວຍ​ສາ​ອາກອນ ກະຊວງ​ການ​ເງິນ ລົງ​ນາມ​ໃນ​ສັນຍາວ່າ​ດ້ວຍ​ການ​ເປີດ​ການ​ນຳ​ໃຊ້​ລະບົບ​ທັນ​ສະໄໝ​ເກັບ​ຄ່າ​ທຳນຽມ ທາງ​ກັບ​ທະນາຄານ​ການ​ຄ້າຕ່າງປະເທດ​ມະຫາຊົນ (​ທຄຕລ) ໂດຍ​ເບື້ອງ​ຕົ້ນ​ສາມາດ​ຊຳລະຜ່ານ​ປ່ອງ​ບໍລິການ BCEL ONE ແລະ ຕູ້​ເອ​ທີ​ເອັມ ໂດຍ​ໄດ້ມີ​ການ​ທົດ​ລອງ​ແຕ່​​​ວັນ​ທີ 20 ຕຸລາ ຜ່ານ​ມາ ແລະ ຈະ​ເລີ່ມ​ເປີດໃຫ້​ບໍລິການ​ເປັນ​ທາງ​​​ການ​ໃນວັນ​ທີ 30 ຕຸລາ 2017.

ທ່ານ ພູ​ທະນູ​ເພັດ ໄຊ​ສົມບັດ ຫົວໜ້າ​ກົມ​ສ່ວຍ​ສາ​ອາກອນ ກ່າວ​ວ່າ: ກະຊວງ​ການ​ເງິນ ໄດ້ຕົກລົງ​ເຫັນ​ດີ​ໃຫ້​ກົມ​ສ່ວຍ​ສາ​ອາກອນ ແລະ ​ທຄຕລ ຮ່ວມ​ກັນ​ຄົ້ນຄວ້າ ແລະ ພັດທະນາ​ການ​ຊຳລະສະ​ສາງ​ຄ່າ​ທາງ ຜ່ານ​ລະບົບຂອງ ​ທຄຕລ ເຊິ່ງ​ເປັນ​ອີກ​ບາດກ້າວ​ໜຶ່ງ​ ໃນ​ການ​ປະຕິ​ຮູບ​ການຊຳລະ​ສະ​ສາງ​ຜ່ານ​ລະບົບ​ທະ​ນາຄານ​ໃຫ້​ຫຼາຍ​ຂຶ້ນ ເພື່ອ​ອຳນວຍຄວາມ​ສະດວກຄວາມ​ວ່ອງໄວ ຄວາມ​ປອດ​ໄພ ການ​ຊຳລະ​ຄ່າທາງ​ບໍ່​ສະເພາະ​ແຕ່​ລົດ​ທົ່ວ​ໄປ ແຕ່​ລົດ​ໃນ​ການ​ບໍລິຫານ​ຂອງ​ລັດ ຕ້ອງ​ໄດ້​ເສຍ​ເຊັ່ນ​ດຽວ​ກັນ ໃນນາມ​ຕາງໜ້າ ກະຊວງ​ການ​ເງິນ ກົມ​ສ່ວຍ​ສາ​ອາກອນ ຮຽກຮ້ອງມາ​ຍັງ​ທຸກ​ພາກສ່ວນ​ໃນ​ສັງ​​ຄົມ ຈົ່ງ​ພ້ອມ​ກັນ​ໃຫ້ການ​ຊຸກຍູ້ ກວດກາ​ພ້ອມ​ສົ່ງເສີມ ໂຄສະນາເຜີຍແຜ່ ແນະນຳ ແລະ ພ້ອມ​ກັນ​ເຂົ້າຮ່ວມ​ໃນ​ການຈັດຕັ້ງ​ປະຕິບັດ​ວຽກ​ງານ​ດັ່ງກ່າວ​ໃຫ້​ມີ​ປະ​ສິດທິ​ຜົນ. ທ່ານ ພູ​ໂຂງ ຈັນທະ​ຈັກ ຜູ້​ອຳນວຍ​ການ​ໃຫຍ່ ​ທຄຕລ ກ່າວ​ວ່າ:

ເນື່ອງ​ຈາກ​ການ​ບໍລິການ​ລະບົບດັ່ງກ່າວ ເປັນ​ການ​ບໍລິການ​ໃໝ່ ແລະ ນຳ​ໃຊ້​ຄວາມ​ທັນ​ສະໄໝ​ໃນການ​ເສຍ​ຄ່າ​ທຳນຽມ​ທາງ ເຊິ່ງຈະ​ຊ່ວຍ​ໃຫ້​ພາກ​ລັດ​ໃນ​ການ​ຈັດເກັບ​ລາຍ​ຮັບ​ເຂົ້າ​ງົບປະມານແຫ່ງ​ລັດ ​ໃຫ້​ທັນ​ກັບ​ເວລາ ຖືກຕ້ອງ ໂປ່ງ​ໃສ ແລະ ສາມາດກວດ​ສອບ​ໄດ້ ເຖິງ​ຢ່າງໃດ​ກໍ່​ຕາມ ໃນ​ເບື້ອງ​ຕົ້ນ ການ​ບໍລິການ​ອາດຍັງ​ບໍ່​ທັນ​ສາມາດ​ລົງ​ສູ່​ເຂດ​ຫ່າງໄກ​ສອກຫຼີກ​ໄດ້​ເທື່ອ ດັ່ງນັ້ນ ຜູ້​ທີ່ຢູ່​ຫ່າງ​ໄກ​ສອກຫຼີກ​ຈະ​ໄດ້​ເຂົ້າ​ມາໃຊ້​ບໍລິການ​ດັ່ງກ່າວ​ຜ່ານ​ຈຸດ​ບໍ​ລິການ ແລະ ຕູ້​ເອ​ທີ​ເອັມຂອງ ​ທຄຕລ ໃນ​ແຕ່​ລະ​ເຂດ​ກ່ອນ ສ່ວນ​ໃນ​ອະນາຄົດ​ພວກ​ເຮົາ​ຈະ​ມີການ​ແກ້​ໄຂ ໂດຍ​ຈະ​ຂະຫຍາຍຕົວ​ແທນ​ໂອນ​ເງິນ​ດ່ວນ​ຊຸມ​ຊົນ ຫຼື BCOME ຂອງ ​ທຄຕລ ໃຫ້ກວ້າງ​ອອກ ເພື່ອ​ເຮັດ​ໃຫ້ການ​ຊຳລະ​ຄ່າ​ທຳນຽມ​ທາງ​ມີ​ຄວາມ​ສະດວກ​ຍິ່ງ​ຂຶ້ນ.

ນອກ​ນັ້ນ ທາງ ​ທຄຕລ ຍັງຈະ​ໄດ້​ສືບຕໍ່​ພັດທະນາ​ໃຫ້​ສາມາດ​ຊຳລະ​ຜ່ານ​ຄົບ​ຕາມ 5 ຊ່ອງ​ທາງນັ້ນ ​ກໍ່​ຄື​ພັດທະນາ​ອີກ​ສອງ​ຊ່ອງທາງ ຄື: ຜ່ານ​ຕູ້​ຮັບ​ຊຳລະ​ອັດ​ຕະໂນ​ມັດ (KIOSK) ແລະ ຜ່ານຕົວ​ແທນ​ຂອງ BCOME. ສຳລັບ​ພິທີ​ເຊັນ​ສັນຍາ​ດັ່ງກ່າວ ​ມີ​ຂຶ້ນ​ໃນ​ວັນ​ທີ 26 ຕຸລາ ຜ່ານ​ມາ ທີ່​ໂຮງແຮມ​ລາວ​ພລາຊາ ໂດຍ​ການ​ລົງ​ນາມ​ລະຫວ່າງທ່ານ ພູ​ໂຂງ ຈັນທະ​ຈັກ ແລະ ທ່ານ ພູ​ທະນູ​ເພັດ ໄຊ​ສົມບັດ ໃຫ້ກຽດ​ເຂົ້າ​ຮ່ວມ​ຂອງ​ທ່ານ ສົມພາວ ໄຟ​ສິດ ຜູ້​ວ່າການ​ທະ​ນາຄານ​ແຫ່ງ ​ສປປ ລາວ ທ່ານ ບຸນໂຈມ ອຸບົນ​ປະເສີດ ຮອງ​ລັດ​ຖະມົນຕີ​ກະຊວງ​ການ​ເງິນ ພ້ອມພາກສ່ວນ​ກ່ຽວຂ້ອງ.

ຂ່າວ: ນສພ ວຽງຈັນໃຫ່ມ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.