Header Ads

ເຈົ້າໜ້າທີ່ ປກສ ເມືອງໄຊເຊດຖາ ຈັບສາມສ່ຽວ ຮ່ວມກັນຄ້າຂາຍຢາເສບຕິດລາຍຍ່ອຍ





ບັນດາກຸ່ມໄວລຸ້ນທີ່ເຄື່ອນໄຫວລັກລອບຊື້-ຂາຍຢາເສບຕິດລາຍຍ່ອຍ ແມ່ນມີຫຼາຍຮູບແບບ ແລະ ປິດລັບ. ສ່ວນຫຼາຍພວກເຂົາແມ່ນນັດຈຸດຊື້-ຂາຍໃຫ້ກັນຢູ່ຕາມຮ້ານບັນເທີງ, ຮ້ານເກມ, ຮ້ານສະໜຸກເກີ, ໂຮງແຮງ, ເຮືອນພັກ ແລະ ເຂດຊຸມຊົນ ເພື່ອຫຼີກລ່ຽງການຈັບກຸ່ມຂອງເຈົ້າໜ້າທີ່ກ່ຽວຂ້ອງ. ດັ່ງຄະດີນີ້, ເຈົ້າໜ້າທີ່ ປກສ ເມືອງໄຊເຊດຖາ ນະຄອນຫຼວງວຽງຈັນ ຕິດຕາມກັກຕົວກຸ່ມໄວລຸ້ນທີ່ຊື້-ຂາຍຢາເສບຕິດ ປະເພດຢາບ້າລາຍຍ່ອຍ ຈຳນວນ 3 ຄົນຄື: ທ້າວ ສີສຸພັນ ອາຍຸ 25 ປີ ຢູ່ບ້ານແສງສະຫວ່າງ ມີຂອງກາງຢາບ້າ 367 ເມັດ, ທ້າວ ຄຳຕັ້ນ ອາຍຸ 29 ປີ ຢູ່ບ້ານໜອງບອນ ມີຢາບ້າ 101 ເມັດ ແລະ ທ້າວ ຂັນຄຳ ອາຍຸ 29 ປີ ຢູ່ບ້ານຮອງແກ ພ້ອມຂອງກາງ 16 ເມັດ, ທັງສາມຂຶ້ນກັບເມືອງໄຊເສດຖາ ໃນທ້າຍເດືອນກໍລະກົດ 2017 ໂດຍພວກກ່ຽວສາລະພາບວ່າ: ໄດ້ຮ່ວມກັນລັກລອບຊື້-ຂາຍຢາເສບຕິດມາຫຼາຍຄັ້ງ ສ່ວນຫຼາຍແມ່ນຈຳໜ່ວຍຢູ່ຕາມຮ້ານເກມ.

ຜ່ານການສອບສວນ ທ້າວ ສີສຸພັນ ສາລະພາບວ່າ: ເລີ່ມເຄື່ອນໄຫວເສບຢາເສບຕິດ ມາແຕ່ປີ 2016 ເສບມື້ລະ 1-2 ເມັດ ໂດຍຊື້ນຳໄວລຸ້ນທີ່ພົວພັນກັບຢາເສບຕິດນຳກັນພາຍໃນບ້ານ ແລະ ບ້ານທາດຫຼວງ, ມາເດືອນມີນາ 2017 ຜູ້ກ່ຽວຈຶ່ງເລີ່ມຄ້າຂາຍຢາເສບຕິດ ໂດຍຊື້ນຳ ທ້າວ ກູດ ຢູ່ບ້ານຄຳສະຫວາດ ເມືອງໄຊເສດຖາ ຄັ້ງລະ 10-20 ເມັດ ຈຸດຊື້-ຂາຍແມ່ນຢູ່ຕາມຮ້ານເກມ ແລະ ຮ້ານສະນຸກເກີ ເມື່ອໄດ້ຢາບ້າມາແລ້ວ ກໍນຳໄປຂາຍໃຫ້ກັບໄວ້ລຸ່ນທີ່ເຄີຍມົ້ວສຸມຢາເສບຕິດນຳກັນຢູ່ຕາມຮ້ານເກມ ເຂດບ້ານທາດຫຼວງ ສ່ວນເງິນທີ່ໄດ້ຈາກການຊື້-ຂາຍຢາບ້ານັ້ນ ແມ່ນໃຊ້ຈ່າຍຫຼິ້ນເກມໝົດ. ຜ່ານມານັ້ນ, ເຄີຍໄປຊື້ຢາບ້ານຳ ທ້າວ ກູດ ຫຼາຍຄັ້ງຈົນບໍ່ສາມາດຈື່ໄດ້, ມາວັນທີ 24 ກໍລະກົດ 2017 ໄດ້ຊື້ຢາບ້າຢູ່ຮ້ານເກມ ບ້ານທາດຫຼວງ ຈຳນວນ 367 ເມື່ອໄດ້ຢາບ້າແລ້ວ ກໍນຳມາເກັບຮັກສາໄວ້ ພ້ອມທັງຂາຍຍ່ອຍໃຫ້ກັບໄວ້ລຸ້ນທີ່ຕ້ອງການເສບຢາບ້າ. ຈາກນັ້ນ, ຈຶ່ງຖືກເຈົ້າໜ້າທີ່ກັກຕົວ ແລະ ກວດຄົ້ນພົບຂອງກາງຢາບ້າ ຈຳນວນ 367 ເມັດ ມາດຳເນີນຄະດີ.

ທ້າວ ຄຳຕັ້ນ ສາລະພາບວ່າ: ໃນຕົ້ນເດືອນເມສາ 2017, ໄດ້ໄປຫຼິ້ນເກມຢູ່ຮ້ານເກມ ເຂດບ້ານທາດຫຼວງ ແລ້ວໄດ້ຮູ້ຈັກ ທ້າວ ກູດ ຈຶ່ງໄດ້ຊັກຊວນກັນເຄື່ອນໄຫວເສບຢາບ້າ. ນັບຈາກນັ້ນມາ, ກໍເລີ່ມຄ້າຂາຍຢາເສບຕິດ ໂດຍຮັບເອົານຳ ທ້າວ ກູດ ຄັ້ງລະ 50-100 ເມັດ ແລ້ວຂາຍໃຫ້ກັບໄວລຸ້ນທີ່ມົ້ວສຸມທົ່ວໄປ, ມາວັນທີ 24 ກໍລະກົດ 2017 ທ້າວ ຄຳຕັ້ນ ໄປຊື້ຢາບ້ານຳ ທ້າວ ກູດ ຢູ່ຮ້ານເກມ ຈຳນວນ 500 ເມັດ ແລ້ວນຳໄປຂາຍໃຫ້ກັບໄວລຸ້ນພາຍໃນບ້ານ ຄັ້ງລະ 2-5 ເມັດ ແລະ ເສບເອງຈຳນວນໜຶ່ງ ກ່ອນຖືກເຈົ້າໜ້າທີ່ກັກຕົວພ້ອມຂອງກາງຢາບ້າທີ່ຍັງເຫຼືອຈາກການຂາຍ ຈຳນວນ 101 ເມັດ ມາດຳເນີນຄະດີ.

ສ່ວນ ທ້າວ ຂັນຄຳ ເລີ່ມເສບຢາບ້າ ແຕ່ປີ 2016 ເປັນຕົ້ນມາ ໂດຍເສບຄັ້ງລະ 1-2 ເມັດ ຢາບ້າທີ່ນຳມາເສບນັ້ນ ແມ່ນໄດ້ຊື້ນຳໄວລຸ້ນ ແລະ ພັກພວກທີ່ຮ່ວມຂະບວນການນຳກັນ ຢູ່ບ້ານທາດຫຼວງ ຄັ້ງລະ 1-5 ເມັດ, ມາໃນໄລຍະເດືອນພຶດສະພາ 2017 ທ້າວ ຂັນຄຳ ໄດ້ຮູ້ຈັກກັບ ທ້າວ ໂຕ້ ຢູ່ບ້ານແສງສະຫວ່າງ; ຈາກນັ້ນ, ກໍເລີ່ມພົວພັນຊື້-ຂາຍຢາບ້າໃຫ້ກັນ ຄັ້ງລະ 10-20 ເມັດ ແລະ ໄດ້ພົວພັນກັນຫຼາຍຄັ້ງຈົນບໍ່ສາມາດຈື່ໄດ້, ສ່ວນການຊື້-ຂາຍແມ່ນໄດ້ໂທລະສັບຕິດຕໍ່ຫາກັນ ເພື່ອນັດຈຸດຊື້-ຂາຍ ສ່ວນຫຼາຍແມ່ນຢູ່ຕາມແຄມທາງ ແລະ ຮ້ານເກມ, ມາວັນທີ 24 ກໍລະກົດ 2017 ທ້າວ ຂັນຄຳ ໄປຊື້ຢາບ້ານຳ ທ້າວ ໂຕ້ ຈຳນວນ 10 ເມັດ ໂດຍນັດຈຸດຊື້-ຂາຍຢູ່ຮ້ານເກມຄືເກົ່າ, ແລ້ວນຳມາເສບເອງຈຳນວນ 4 ເມັດ; ຈາກນັ້ນ, ກໍກັບໄປຊື້ຢາບ້ານຳ ທ້າວ ໂຕ້ ຈຳນວນ 10 ເມັດອີກ ລວມທັງໝົດ 16 ເມັດ ຈຶ່ງເກັບຮັກສາໄວ້, ຮອດເວລາ 14:00 ໂມງ ຈຶ່ງຖືກເຈົ້າໜ້າທີ່ກັກຕົວ ພ້ອມຂອງກາງຢາບ້າຈຳນວນດັ່ງກ່າວ.

ເຈົ້າໜ້າທີ່ ປກສ ເມືອງໄຊເສດຖາ ຍັງໃຫ້ຮູ້ອີກວ່າ: ຄະດີດັ່ງກ່າວນີ້, ເຈົ້າໜ້າທີ່ວິຊາສະເພາະ ກຳລັງລົງຕິດຕາມຫາພັກພວກ ກໍຄື ທ້າວ ກູດ ແລະ ຜູ້ອື່ນໆ ທີ່ມົ້ວສຸມຢາເສບຕິດນັ້ນ ພ້ອມທັງຂຶ້ນເປົ້າໝາຍຕິດຕາມຫາຂະບວກການ ແລະ ທີ່ມາຂອງຢາເສບຕິດດັ່ງກ່າວ ໃຫ້ໝົດໄປຈາກສັງຄົມເທື່ອລະກ້າວ.

ພາບ ແລະ ຂ່າວ : ນສພ ຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.