Header Ads

ຈັບໂຈນປຸ້ນທະນາຄານ ຂະຫຍາຍຄວາມໄດ້ພັກພວກທີ່ຮ່ວມກໍ່ເຫດນໍາກັນຕື່ມ !!!





ເຈົ້າໜ້າທີ່ ປກສ ເມືອງໄຊເສດຖາ ນະຄອນຫຼວງວຽງຈັນ ໄດ້ຕິດຕາມຈັບກຸ່ມກໍ່ເຫດປຸ້ນຊັບ ໃນນະຄອນຫຼວງວຽງຈັນ ໄດ້ເພີ່ມ 5 ຄົນ ຕາມການຊັດທອດຂອງທ້າວ ບຸນຈັນ ຜູ້ຖືກຫາທີ່ປຸ້ນໜ່ວຍບໍລິການ ຂອງທະນາຄານແຫ່ງໜຶ່ງ ຢູ່ເຂດບ້ານວຽງຈະເລີນ ເມືອງໄຊເສດຖາ ໂດຍຖືກເຈົ້າໜ້າທີ່ຈັບຕົວໄດ້ກ່ອນໜ້ານີ້.



ພັທ ສອນເພັດ ພິຈິດ ຮອງຫົວໜ້າກອງບັນຊາການ ປກສ ເມືອງໄຊເສດຖາ ນະຄອນຫຼວງວຽງຈັນ ໃຫ້ຮູ້ວ່າ: ພາຍຫຼັງມ້າງຄະດີຂອງທ້າວ ບຸນຈັນ ຜູ້ຖືກຫາປຸ້ນເອົາເງິນ 200 ກວ່າລ້ານກີບ ຂອງໜ່ວຍບໍລິການທະນາຄານ ໃນຕົ້ນເດືອນຕຸລາທີ່ຜ່ານມາ, ເຈົ້າໜ້າທີ່ໄດ້ທໍາການສອບສວນຂະຫຍາຍຜົນ ຜູ້ກ່ຽວໄດ້ຊັດທອດເຖິງພັກພວກທີ່ຮ່ວມປຸ້ນໃນຄັ້ງຜ່ານມາຄື: ປຸ້ນຮ້ານເກມ, ທັງເເອບອ້າງເປັນເຈົ້າໜ້າທີ່ ໄປຢຶດເອົາລົດຈັກບໍ່ມີເອກະສານ ທີ່ປະກາດຂາຍໃນສືອອນລາຍ ແລະ ນຳໄປຂາຍຕໍ່ໃຫ້ກັບພັກພວກ; ເຊິ່ງສາມາດກັກຕົວໄດ້ຈຳນວນ 5 ຄົນ: ຊື່ທ້າວ ຄຳອຸ່ນ ອາຍຸ 41 ປີ ຢູ່ບ້ານໃໝ່ ເມືອງບຸນເໜືອ ແຂວງຜົ້ງສາລີ, ທ້າວ ພອນປະເສີດ ອາຍຸ 32 ປີ ຢູ່ບ້ານຫົວຂົວ, ທ້າວ ອີ້ ອາຍຸ 35 ປີ, ທ້າວ ລີ້ມີ້ ອາຍຸ 30 ປີ ແລະ ທ້າວ ເລ້ ອາຍຸ 24 ປີ ທັງສາມຢູ່ບ້ານຮ່ອງສຸພາບ ທັງໝົດຢູ່ເມືອງໄຊເສດຖາ ນະຄອນຫຼວງວຽງຈັນ.

ຜ່ານການສອບສວນພວກກ່ຽວໃນເບື້ອງຕົ້ນ ໃຫ້ການສາລະພາບວ່າ: ໄດ້ຮ່ວມກັນກໍ່ເຫດປຸ້ນຊັບຂອງພົນລະເມືອງຮ່ວມກັບພັກພວກອີກປະມານ 8 ຄົນ ກໍ່ເຫດປຸ້ນຊັບພົນລະເມືອງມາແລ້ວ ປະມານ 10 ກວ່າຄັ້ງ. ປັດຈຸບັນ, ເຈົ້າໜ້າທີ່ ປກສ ເມືອງໄຊເສດຖາ ໄດ້ຢຶດລົດກະປ໋ອງສີຂາວ ທີ່ນໍາໃຊ້ເຄື່ອນໄຫວກໍ່ເຫດ ແລະ ກໍາລັງໄລ່ຊອກ-ໄລ່ຈັບພວກຮ່ວມຂະບວນການທີ່ກໍາລັງຫຼົບໜີ ມາດໍາເນີນຄະດີ.

ພາບ ແລະ ຂ່າວ: ນສພ ຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.