Header Ads

ຈັບຄາບ້ານພັກ ພ້ອມຂອງກາງຢາບ້າ 21 ມັດ (42 000 ເມັດ)ທີ່ ບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ





ໃນວັນທີ 19 ຕຸລາ 2017 ເຈົ້າໜ້າທີ່ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງບໍ່ແກ້ວ ໄດ້ຮັບແຫຼ່ງຂ່າວຈາກພົນລະເມືອງດີວ່າ: ຈະມີການຊື້ຂາຍຢາເສບຕິດຢູ່ບ້ານພັກແຫ່ງໜຶ່ງໃນຂອບເຂດບ້ານປ່າອ້ອຍ ເມືອງຫ້ວຍຊາຍ ແຂວງບໍ່ແກ້ວ.



ດັ່ງນັ້ນ, ທາງເຈົ້າໜ້າທີ່ຂອງພວກເຮົາຈຶ່ງໄດ້ແຕ່ງຕັ້ງກໍາລັງລົງກວດກາ-ຕິດຕາມແຫຼ່ງຂ່າວເຫັນວ່າມີມູນຄວາມຈິງ ພໍຕົກມາຮອດເວລາປະມານ 11 ໂມງ ຈຶ່ງເຂົ້າຈັບກຸມເປົ້າໝາຍຢູ່ໃນຫ້ອງພັກ ແລະ ໄດ້ພົບເຫັນຢາເສບຕິດ (ປະເພດຢາບ້າ) ຈໍານວນ 07 ເເພັກ ມີ 21 ມັດ ເທົ່າກັບ 42 000 ເມັດ ມີນໍ້າໜັກ 4 040 ກຼາມ ຊຸກເຊື່ອງຢູ່ໃນຖົງເຄື່ອງ ພ້ອມທັງກັກຕົວຜູ້ຖືກຫາ 03 ຄົນຄື: ທ້າວ ຈາຊິຕິ ອາຍຸ 40 ປີ ຢູ່ບ້ານຕາເລືອ ແລະ ທ້າວບູນ ອາຍຸ 30 ປີ ຢູ່ບ້ານປຸງ ທັງສອງເຊື້ອຊາດພະມ້າ ອາຊີບເຮັດນາ ຢູ່ເມືອງທ່າຂີ້ເຫຼັກ ແຂວງຈຽງຕຸງ ປະເທດມຽນມາ ແລະ ອີກ 01 ຄົນຊື່ທ້າວ ສົມສີ ອາຍຸ 23 ປີ ອາຊີບຂັບເຮືອ ເຊື້ອຊາດລາວ ຢູ່ບ້ານທ່າເດື່ອ ເມືອງໄຊຍະ ແຂວງໄຊຍະບູລີ.




ຜ່ານການສືບສວນ-ສອບສວນໃນເບື້ອງຕົ້ນທ້າວສົມສີໄດ້ໃຫ້ການວ່າ: ມີຄົນໂທລະສັບມາຫາຕິດຕໍ່ຊື້ຢາບ້າ ຈຶ່ງໄດ້ໂທລະສັບໄປຫາທ້າວບູນຄົນພະມ້າ ແລ້ວເອົາເບີຂອງທ້າວບູນໃຫ້ຜູ້ທີ່ມາຕິດຕໍ່ຊື້ຢາບ້າຈໍານວນດັ່ງກ່າວ ພໍຕົກມາຮອດວັນທີ 16 ຕຸລາ 2017 ທ້າວບູນໄດ້ຂ້າມມາແຕ່ມຽນມາ ແລ້ວພາກັນຂີ່ລົດໂດຍສານຈາກເມືອງຕົ້ນເຜິ້ງ ມາເມືອງຫ້ວຍຊາຍ ພໍມາຮອດຫ້ວຍຊາຍເວລາປະມານ 11:30 ນາທີ ກໍ່ໄດ້ພາກັນໄປນອນບ້ານພັກແຫ່ງໜຶ່ງເພື່ອລໍຖ້າ ຕົກມາຮອດວັນທີ່ 19 ຕຸລາ 2017 ກໍ່ມີຄົນຂັບຂີ່ລົດວີໂກສີຂາວ (ບໍ່ຮູ້ໝາຍເລກທະບຽນ) ມາຮັບໄປນອນບ້ານພັກບ່ອນໃໝ່ແຫ່ງໜຶ່ງໃນຂອບເຂດບ້ານປ່າອ້ອຍ ເມືອງ ຫ້ວຍຊາຍ ແຂວງບໍ່ແກ້ວ ເມື່ອໄປຮອດຫ້ອງພັກກໍ່ເຫັນທ້າວຈາຊິຕິ ຢູ່ໃນຫ້ອງພ້ອມກັບຖົງເຄື່ອງ 01 ຖົງທີ່ຊຸກເຊື່ອງຢາບ້າຈໍານວນ 23 ມັດໄວ້ເພື່ອນໍາມາສົ່ງ ແລ້ວຄົນທີ່ມາຮັບໄປບ້ານພັກດັ່ງກ່າວກໍ່ໄດ້ຂັບລົດອອກໄປ ພໍເວລາຜ່ານໄປພຽງຊົ່ວຄາວ ກໍ່ມີເຈົ້າໜ້າທີ່ເຂົ້າມາຈັບຕົວພວກກ່ຽວທັງສາມ ພ້ອມດ້ວຍຂອງກາງຢາເສບຕິດ (ປະເພດຢາບ້າ) ຈໍານວນ 21 ມັດ, ໃນການຊື້ຂາຍຢາເສບຕິດໃນຄັ້ງນີ້ທ້າວບູນເວົ້າວ່າ: ຖ້າໄດ້ຂາຍຢາບ້າສໍາເລັດແມ່ນຈະແບ່ງເງິນໃຫ້ທ້າວສົມສີແຕ່ຍັງບໍ່ຮູ້ຈໍານວນ.



ດັ່ງນັ້ນ, ທາງເຈົ້າໜ້າທີ່ຂອງພວກເຮົາຈຶ່ງໄດ້ຢຶດຂອງກາງຢາບ້າຈໍານວນ 21 ມັດ, ໂທລະສັບມືຖື 04 ໜ່ວຍ, ແຫວນຄໍາ 01 ວົງ ແລະ ໂມງ 01 ໜ່ວຍ ພ້ອມທັງກັກຕົວພວກກ່ຽວທັງສາມໄວ້ເພື່ອທໍາການສືບສວນ-ສອບສວນຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດລາຍນີ້ມາດໍາເນີນຄະດີຕາມລະບຽບກົດໝາຍຕໍ່ໄປ.






ຂ່າວ: ຮຕ ນາຊູ ອິນທະບັນດິດ  ( ປກສ ແຂວງບໍ່ແກ້ວ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





No comments

Powered by Blogger.