Header Ads

ເອກອັກຄະລັດຖະທູດ ແຫ່ງ ສປປລາວ ຍືນສານຕາຕັ້ງ ຕໍ່ ປະທານາທິບໍດີ ເບລາຣຸດສ


ໃນຕອນເຊົ້າຂອງວັນທີ 02/10/2017, ເວລາ 10:30 ໂມງ ຕາມເວລາທ້ອງຖິ່ນ,  ທີ່ ທໍານຽບປະທານາທິບໍດີ ໃນນະຄອນຫລວງ ມິນສ, ທ່ານ ສີວຽງເພັດ ເພັດວໍຣະສັກ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປ ລາວ ປະຈໍາ ສະຫະພັນ ຣັດເຊຍ, ໄດ້ຍື່ນສານຕາຕັ້ງ ຕໍ່ພະນະທ່ານ ອາເລັກຊັງເດີ ກຣີກໍຣີອີວີຊ ລູກາເຊັນໂກ, ປະທານາທິບໍດີ ສາທາລະນະລັດ ເບລາຣຸດສ, ເພື່ອດໍາລົງຕໍາແຫ່ນງເປັນເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສປປ ລາວ ຄົນໃຫມ່ ປະຈໍາ ສ. ເບລາຣຸສ, ໂດຍມີສໍານັກງານຕັ້ງຢູ່ ນະຄອນຫລວງມົດສະກູ, ສ.ຣັດເຊຍ.

ໃນໂອກາດເຂົ້າຍື່ນສານຕາຕັ້ງ ໃນຄັ້ງນີ້, ທ່ານທູດ ສີວຽງເພັດ ເພັດວໍຣະສັກ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ, ພ້ອມທັງໄດ້ນຳເອົາຄວາມຢື້ຢາມຖາມຂ່າວ ແລະ ພອນໄຊອັນປະເສີດຈາກ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ, ສົ່ງເຖິງ ພະນະທ່ານ ອາເລັກຊັງເດີ ກຣີກໍຣີອີວີຊ ລູກາເຊັນໂກ, ປະທານາທິບໍດີ ສາທາລະນະລັດ ເບລາຣຸສ, ແລະ ໂດຍຜ່ານ ພະນະທ່ານ ອາເລັກຊັງເດີ ກຣີກໍຣີອີວີຊ ລູກາເຊັນໂກ ໄປຍັງ ລັດຖະບານ ແລະ ປະຊາຊົນ ເບລາຣຸສ ທຸກຖ້ວນຫນ້າ.


ປະທານາທິບໍດີ ເບລາຣຸສ ໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ລະຫວ່າງ ສ. ເບລາຣຸສ ແລະ ສປປ ລາວ ໃນໄລຍະຜ່ານມາ ກໍຄືປັດຈຸບັນ, ພ້ອມທັງໄດ້ສະແດງຄວາມຊົມເຊີຍຕໍ່ ທ່ານ ສີວຽງເພັດ ເພັດວໍຣະສັກ ທີ່ໄດ້ຖືກແຕ່ງຕັ້ງໃຫ້ດໍາລົງຕໍາແຫນ່ງເປັນ ເອກອັກຄະລັດຖະທູດວິສາມັນຜູ້ມີອຳນາດ ເຕັມ ແຫ່ງ ສປປ ລາວ ຄົນໃໝ່ ປະຈຳ ສາທາລະນະລັດ ເບລາຣຸສ ແລະ ອວຍພອນໃຫ້ທ່ານທູດ ຈົ່ງປະສົບຜົນສຳເລັດໃນການ ປະຕິບັດໜ້າທີ່ວຽກງານ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ເບລາຣຸດ ແລະ ລາວ ໃຫ້ນັບມື້ຂະຫຍາຍຕົວຍິ່ງໆຂຶ້ນ. ຜູ້ນໍາເບລາຣຸສ ໄດ້ແຈ້ງໃຫ້ທູດເຮົາຊາບວ່າ ຫວ່າງບໍ່ດົນນີ້, ທີ່ ນະຄອນຫລວງ ມິນສ, ສອງຝ່າຍ ໄດ້ຈັດກອງປະຊຸມ JC ເບລາຣຸສ-ລາວ ຊຶ່ງໄດ້ຢັ້ງຢືນໃຫ້ເຫັນຄວາມພ້ອມຂອງສອງປະເທດ ທີ່ພົບປະກັນຢ່າງ ກົງໄປກົງມາ ແລະ ແບບສ້າງສັນ.

ຜູ້ນໍາ ເບລາຣຸສ ຍັງໄດ້ກ່າວອີກວ່າ ໃນ 2 ປີ ຕໍ່ຫນ້າ  ສອງປະເທດ ຈະສາມາດຍົກ ລະດັບການພົວພັນຮ່ວມມືສູ່ລະດັບໃຫມ່ ທີ່ມີຄວາມຫມາຍເລິກເຊິ່ງສໍາລັບສອງຝ່າຍ, ສ່ວນເບລາຣຸດ ກໍກຽມພ້ອມຈະ ຮ່ວມມືກັບ ສປປ ລາວ. ສປປ ລາວ ແລະ ສ. ເບລາຣຸສ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 07 ກຸມພາ 1994.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.