Header Ads

ນາຍົກ ຢ້ຽມຢາມ ຫວຽດນາມ ຫັດແໜ້ນມິດຕະພາບ, ເສດຖະກິດ ແລະ ການຮ່ວມດ້ານຕ່າງໆ



ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ, ພ້ອມດ້ວຍພັນລະຍາ ແລະ ຄະນະ ໄດ້ເດີນທາງຢ້ຽມຢາມ ສສ ຫວຽດນາມ ເປັນການພາຍໃນ ແຕ່ວັນທີ 02-06 ຕຸລາ 2017, ເພື່ອຮັດແໜ້ນສາຍພົວພັນມິດຕະພາບ ອັນເປັນມູນເຊື້ອຍາວນານ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສປປ ລາວ ແລະ ສສ ຫວຽດນາມ. ການຢ້ຽມຢາມຄັ້ງນີ້, ແມ່ນກິດຈະກຳໜຶ່ງ ທີ່ປະກອບສ່ວນອັນສຳຄັນ ໃຫ້ແກ່ການສະເຫລີມສະຫລອງ ປີສາມັກຄີມິດ ຕະພາບ ລາວ-ຫວຽດນາມ, ຫວຽດນາມ-ລາວ 2017.

​ການ​ຢ້ຽມຢາມ​ຄັ້ງ​ນີ້, ຄະນະຜູ້ແທນຂັ້ນສູງຂອງລັດຖະບານ ແຫ່ງ ສປປ ລາວ ໄດ້ພົບປະເຮັດວຽກຮ່ວມກັບຄູ່ຕໍ່າແໜງ ທ່ານ ຫງວຽນ ຊັວນ ຟຸກ ນາຍົກລັດຖະມົນຕີ ແຫ່ງ ສສ ຫວຽດ ນາມ ເພື່ອທົບທວນການລົງທຶນ ແລະ ຊຸກຍູ້ການຈັດຕັ້ງປະຕິບັດບັນດາໂຄງການ ການຮ່ວມມື, ການຊ່ວຍເຫລືອ ຂອງສອງປະເທດ ທີ່ໄດ້ຕົກລົງ ໃນກອງປະຊຸມຄະນະກຳມະການຮ່ວມມື ທະວິພາຄີ ຄັ້ງທີ 39 ຜ່ານມາ ເປັນຕົ້ນ: ໂຄງການທາງດ່ວນວຽງຈັນ-ຮ່າໂນ້ຍ; ໂຄງການທ່າ ເຮືອຫວຸງອາງ; ໂຄງການສາງພັກ ແລະ ທໍ່ສົ່ງນໍ້າມັນຮອນລາ; ໂຄງການກໍ່ສ້າງຫໍສະພາແຫ່ງຊາດ ຂອງຂວັນຈາກພັກ-ລັດຖະບານ ຫວຽດນາມ ແລະ ໂຄງການພະລັງງານ ແລະ ເຊື່ອມຈອດອື່ນໆ ຈຳນວນໜຶ່ງ. ພິເສດ ສອງຝ່າຍເຫັນດີຮ່ວມກັນສົ່ງ ເສີມການຮ່ວມມືດ້ານກະສິກຳ ແລະ ການພັດທະນາຊັບ ພະຍາກອນມະນຸດ ໃຫ້ເພີ່ມຂຶ້ນໃນອະນາຄົດ.

ສອງນາຍົກລັດຖະມົນຕີຢືນຢັນຄືນ ຈະຮ່ວມກັນເອົາໃຈໃສ່ສຶກສາອົບຮົມ ຄົນຮຸ່ນຫລັງໃຫ້ເຂົ້າໃຈ ໄດ້ຄວາມໝາຍຄວາມສຳຄັນຂອງ ສາຍພົວພັນມິດຕະພາບ ອັນເປັນມູນເຊື້ອທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານລາວ-ຫວຽດນາມ ແລະ ສືບຕໍ່ປົກປັກຮັກສາມູນມໍລະດົກອັນລໍ້າຄ່ານີ້ ໃຫ້ຮຸ້ນລູກຮຸ່ນຫລານຕໍ່ໄປ.




ໃນໂອກາດດຽວ​ກັນ, ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມຄະນະ ໄດ້ເຂົ້າຢ້ຽມຂໍ່ານັບສະຫາຍ ເລຂາທິການໃຫຍ່ ຫງວຽນ ຝູ ຈ໋ອງ, ສະຫາຍ ປະທານປະເທດ ເຈິ່ນ ດ້າຍ ກວາງ, ສະຫາຍ ປະທານສະພາແຫ່ງຊາດ ຫງວຽນ ຖິ ກີມ ເງິນ. ນອກນີ້ ຄະນະຍັງໄດ້ຢ້ຽມຢາມອະດີດການນຳພັກ-ລັດ ຫວຽດນາມ ແລະ ພົບປະກັບ ອະດີດຊ່ຽວຊານ ແລະ ທະຫານອາສາສະໝັກຫວຽດນາມ ທີ່ເຄີຍຊ່ວຍການປະຕິວັດຢູ່ລາວ ໃນໄລຍະຕໍ່ສູ້ກູ້ຊາດ ກໍຄື ໄລຍະປົກປັກຮັກສາ ແລະ ສ້າງສາພັດທະ ນາປະເທດຊາດໃນປະຈຸບັນ. ພ້ອມ​ນີ້, ທ່ານນາຍົກລັດຖະມົນຕີ ພ້ອມດ້ວຍຄະນະ ​ໄດ້ສືບຕໍ່ຢ້ຽມ ຢາມບາງແຂວງພາກໃຕ້ຂອງຫວຽດນາມ ເພື່ອຢ້ຽມຢາມພື້ນຖານການຜະລິດ, ການລົງທຶນ, ເຂດອຸດສາຫະກຳ ຂອງ ສສ ຫວຽດນາມ ເພື່ອຖອດຖອນ ບົດຮຽນ ການຈັດການບໍລິຫານການລົງທຶນ, ເຂດອຸດສາຫະກຳ ກໍຄື ບົດຮຽນດຶງດູດການລົງທຶນຂອງຫວຽດນາມ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




loading...

No comments

Powered by Blogger.