Header Ads

ສະຫະພັນແມ່ຍິງໄອຍະການເຊກອງສຳເລັດກອງປະຊຸມໃຫຍ່ຄັ້ງທີ II




ກອງປະຊຸມໃຫຍ່ຄັ້ງທີ II ຂອງໜ່ວຍສະຫະພັນແມ່ຍິງອົງການໄອຍະການປະຊາຊົນແຂວງເຊກອງ ໄດ້ດຳເນີນໃນວັນທີ 10 ຕຸລາ 2017 ຜ່ານມານີ້ ໂດຍມີທ່ານ ນາງ ວິໄລວັນ ດາລາສິນ ຮອງປະທານສະຫະພັນແມ່ຍິງແຂວງ, ທ່ານ ສໍລະເສີນສັກ ຟອງສານຸວົງ ຮອງເລຂາໜ່ວຍພັກ, ຮອງຫົວໜ້າອົງການໄອຍະການປະຊາຊົນແຂວງ, ມີຄະນະໜ່ວຍພັກ, ຕາງໜ້າອົງການຈັດຕັ້ງມະຫາຊົນ, ສະມາຊິກສະຫະພັນແມ່ຍິງພາຍໃນໜ່ວຍ ແລະ ແຂກຖືກເຊີນເຂົ້າຮ່ວມ.



ໃນວາລະດຳເນີນກອງປະຊຸມ ທ່ານ ນາງ ຄຳໃບ ແສງວົງໄຊ ປະທານໜ່ວຍສະຫະພັນແມ່ຍິງ ອົງການໄອຍະການປະຊາຊົນແຂວງເຊກອງ ກໍໄດ້ຂຶ້ນຜ່ານບົດລາຍງານການເມືອງ ແລະ ບົດສຳຫຼວດການຊີ້ນຳໆພາຂອງໜ່ວຍຕະຫຼອດໄລຍະ 3 ປີຜ່ານມາ (ແຕ່ປີ 2014-2017) ໃນນີ້ໄດ້ຍົກໃຫ້ເຫັນການນໍາພາຂອງໜ່ວຍອັນພົ້ນເດັ່ນແມ່ນ: ໜ່ວຍສະຫະພັນແມ່ຍິງ ໄດ້ຖືເອົາການສຶກສາອົບຮົມການແນວຄິດເປັນບັນຫາສຳຄັນມີການລວມຈຸ-ລວມໜ່ວຍ, ມີການສໍາຫຼວດກວດກາ-ຕຳນິສົ່ງຂ່າວ ເພື່ອເປັນການກໍ່ສ້າງຊ່ວຍເຫຼືອເຊິ່ງກັນ ແລະ ກັນ ຊຶ່ງເຮັດໃຫ້ພະນັກງານ-ລັດຖະກອນ ກໍ່ຄືເອື້ອຍ-ນ້ອງແມ່ຍິງພາຍໃນໜ່ວຍມີຄວາມສາມັກຄີ, ມີສະຕິຕໍ່ການຈັດຕັ້ງ, ເຂັ້ມງວດຕໍ່ລະບຽບວິໄນ ແລະ ເຊື່ອໝັ້ນຕໍ່ການນຳພາຂອງຄະນະພັກ-ຄະນະນຳອົງການໄອຍະການປະຊາຊົນແຂວງ, ພ້ອມກັນປະຕິບັດໜ້າທີ່ວຽກງານວິຊາສະເພາະທີ່ໄດ້ຮັບມອບໝາຍໃນແຕ່ລະຂະແໜງການທີ່ຕົນສັງກັດຢູ່ຢ່າງມີຜົນສຳເລັດ ແລະ ທ່ວງທັນຕາມກຳນົດເວລາ ຊຶ່ງສະແດງອອກໃນການຄັດເລືອກຜົນງານການຈັດຕັ້ງປະຕິບັດຂໍ້ແຂ່ງຂັນ 3 ດີ ໂດຍມີສະມາຊິກສະຫະພັນແມ່ຍິງ 3 ດີປະເພດ I ຈຳນວນ 9 ຄົນ ແລະ 3 ດີປະເພດ II ມີຈຳນວນ 4 ຄົນ.



ກອງປະຊຸມ ຍັງໄດ້ມີການປ່ອນບັດຄັດເລືອກເອົາຄະນະໜ່ວຍສະຫະພັນແມ່ຍິງອົງການໄອຍະການປະຊາຊົນຊຸດໃໝ່ ໂດຍມີຜູ້ສະໜັກ 5 ທ່ານ, ເລືອກເອົາ 3 ທ່ານ ກອງປະຊຸມໄດ້ເລືອກເອົາທ່ານ ນາງ ຄຳໃບ ແສງວົງໄຊ ເປັນປະທານໜ່ວຍສະຫະພັນແມ່ຍິງອົງການໄອຍະການປະຊາຊົນອີກສະໄໝ, ເລືອກເອົາທ່ານ ນາງ ເພັດສະໝອນ ມະນີວົງ ເປັນຮອງປະທານ ແລະ ເລືອກເອົາທ່ານ ນາງ ອຸດາວອນ ທອງວຽງ ເປັນປະທານກວດກາ.




ຕອນທ້າຍຂອງພິທີ ທ່ານ ນາງ ວິໄລວັນ ດາລາສິນ ກໍໄດ້ມີຄຳເຫັນໂອ້ລົມ ຊຶ່ງທ່ານໄດ້ສະແດງຄວາມຊົມເຊີຍຕໍ່ຜົນສຳເລັດກອງປະຊຸມ ແລະ ຜົນງານຂອງໜ່ວຍທີ່ຍາດໄດ້. ພ້ອມນັ້ນ ທ່ານຍັງໄດ້ເນັ້ນໃຫ້ຄະນະໜ່ວຍສະຫະພັນແມ່ຍິງອົງການໄອຍະການແຂວງຊຸດໃໝ່ ຕ້ອງໄດ້ເພີ່ມທະວີແບບແຜນການນຳພາ-ແບບແຜນວິທີເຮັດວຽກ ໂດຍຍຶດໝັ້ນຫຼັກການລວມສູນປະຊາທິປະໄຕ, ຕົກລົງບັນຫາເປັນໝູ່ຄະນະ, ມີການແບ່ງງານ-ແບ່ງຄວາມຮັບຜິດຊອບ, ມີການຕິດຕາມກວດກາປະເມີນຜົນ ຕິດພັນກັບການປະຕິບັດໜ້າທີ່ວຽກງານວິຊາການ-ວິຊາສະເພາະທີ່ໄດ້ຮັບມອບໝາຍໃຫ້ສຳເລັດ.


ຂ່າວ-ພາບ : ສັນຍາ ແກ້ວໄຊຍະວົງ/ຂ່າວແຂງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.