Header Ads

ປະຊາຊົນກຸມພັດທະນາສວນຫຼວງ ເມືອງຊຽງເງິນຮ່ວມກັນ ສ້າງຂົວໄມ້ແບບປະຖົມປະຖານຂ້າມນ້ຳຄານ



ວັນທີ 26 ຕຸລາ 2017ນີ້,ອົງການປົກຄອງບ້ານສວນດາລາ ກຸມພັດທະນາສວນຫຼວງ ເມືອງຊຽງເງິນ,ໄດ້ນຳພາປະຊາຊົນພາຍໃນບ້ານ 100 ກວ່າຄົນ ຈັດຕັ້ງການອອກແຮງງານລວມສ້າງຂົວໄມ້ (ຫຼືຂົວລອຍ) ແບບປະຖົມປະຖານຂ້າມນໍ້າຄານ ດ້ວຍທຶນຮອນຂອງຊາວບ້ານເອງ,ໃນມູນຄ່າ 10.000.000ກວ່າກີບ,ທີ່ໄດ້ປະກອບສ່ວນລວມທັງດ້ານແຮງງານ ໃນການຕັດໄມ້ຈິງຈຳນວນ 387 ລຳ;ໄມ້ປ່ອງ 370 ລຳ;ເຫຼັກຕາປູ;ແຮງງານສ້າງຂົວຕົວຈິງ ແລະ ວັດສະດຸອື່ນໆ.






ທ່ານ ຄຳຜີວ ໄຊຍະວົງ ນາຍບ້ານບ້ານສວນດາລາ ໄດ້ກ່າວວ່າ: ໃນແຕ່ລະປີ ເມື່ອເຖີງລະດູແລ້ງແລ້ວ ຊາວບ້ານສວນດາລາຕ້ອງໄດ້ຊ່ວຍກັນສ້າງຂົວໄມ້ແບບປະຖົມປະຖານຂຶ້ນ,ໂດຍການປຸກລະດົມເງິນທຶນ ແລະ ແຮງງານຊາວບ້ານ,ປີລະ50.000ກີບຕໍ່ຄອບຄົວ ແລະ ປີນີ້ໄດ້ລະດົມເພີ່ມເປັນ 100.000ກີບຕໍ່ຄອບຄົວ ຍ້ອນຜົນກະທົບຈາກໄພທຳມະຊາດ ເຮັດໃຫ້ໜ້ານ້ຳກ້ວາງກວ່າເກົ່າ,ທັງຈະຕ້ອງໄດ້ໃຊ້ເວລາສ້າງຫຼາຍວັນກວ່າເກົ່າ .ທ່ານນາຍບ້ານສວນດາລາກ່າວຕື່ມວ່າ: ປະຈຸບັນນີ້ ບ້ານສວນດາລາມີເສັ້ນທາງລົດແລ່ນຜ່ານແລ້ວ ແຕ່ການສ້າງຂົວໄມ້ແບບປະຖົມປະຖານຂ້າມນ້ຳຄານ ,ກໍ່ຍັງມີຄວາມຈຳເປັນສຳລັບປະຊາຊົນຜູ້ບໍ່ມີພາຫະນະໃຊ້,ທັງເປັນການສະດວກໃຫ້ແກ່ການໄປໂຮງຮຽນຂອງລູກຫຼານ ແລະການໄປມາຫາສູ່ກັນ ລະຫວ່າງບ້ານຕໍ່ບ້ານຕື່ມອີກ.ການສ້າງຂົວໄມ້ແບບປະຖົມປະຖານຂ້າມນໍ້າຄານຄັ້ງນີ້ຄາດວ່າຈະໃຫ້ສໍາເລັດພາຍໃນອາທິດນີ້

ຂ່າວ: ເຫຼັກໄຊ ຄົດໄຊໂຍ (ຂ່າວສານຫຼວງພະບາງ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.