Header Ads

ພະແນກ ຍທຂ ທຸ້ມງົບກໍ່ສ້າງເສັ້ນທາງ ໄກສອນ ພົມວິຫານ ໃນມູນຄ່າ 18 ຕື້ກີບ



ແຂວງຫຼວງພະບາງ : ໃນວັນທີ 19 ຕຸລາ ຜ່ານມານີ້, ທີ່ພະແນກໂຍທາທິການ ແລະ ຂົນສົ່ງ ແຂວງຫຼວງພະບາງ ໄດ້ມີພິທີເຊັນສັນຍາການກໍ່ສ້າງເສັ້ນທາງ ໄກສອນ ພົມວິຫານ ໂດຍການເປັນປະທານຂອງ ທ່ານ ປອ ບົວຄົງ ນາມມະວົງ ຮອງເຈົ້າແຂວງຫຼວງພະບາງ, ມີຫົວໜ້າ, ຮອງຫົວໜ້າພະແນກການ, ກົມກອງ, ຫົວໜ່ວຍທຸລະກິດທີ່ກ່ຽວຂ້ອງ ຕະຫຼອດຮອດພະນັກງານວິຊາການຂອງພະແນກໂຍທາທິການ ແລະ ຂົນສົ່ງເຂົ້າຮ່ວມຢ່າງພ້ອມພຽງ.



ໃນພິທີທ່ານ ບຼົງວ່າງ ຫວ່າງເຈຍຊາ ຮອງຫົວໜ້າພະແນກໂຍທາທິການ ແລະ ຂົນສົ່ງ ໄດ້ລາຍງານສະພາບ ແລະ ຄວາມເປັນໄປໄດ້ຂອງໂຄງການວ່າ: ໂຄງການກໍ່ສ້າງເສັ້ນທາງ ໄກສອນ ພົມວິຫານ ແມ່ນເປັນຖະໜົນສາຍຫຼັກ ຂອງເທດສະບານແຂວງຫຼວງພະບາງ ມີລົດແລ່ນ ແລະ ຈອດຫຼາຍສະພາບໜ້າທາງມີການແຕກແຫງ, ຍ້ອນບໍ່ມີລະບົບລະບາຍນໍ້າເຮັດໃຫ້ນັບມື້ຊຸດ ໂຊມລົງເລື້ອຍໆໂດຍຈະມີການຂະຫຍາຍຄວາມກ້ວາງຂອງເສັ້ນທາງ ອອກເປັນ 4 ຊ່ອງທາງຈໍລະຈອນ ແລະ ຊ່ອງຈອດລົດ, ສ້ອມແປງຈຸດເປ່ເພ, ສ້ອມແປງທາງຍ່າງ ແລະ ປູຢາງຂົ້ວທັບ ເພື່ອເຮັດໃຫ້ການສັນຈອນມີຄວາມສະດວກຂື້ນຕື່ມ. ສຳລັບການກໍ່ສ້າງຕົວຈີງ ຈະມີການຂຸດລອກໜ້າທາງ ແລະ ສີ່ງກີດຂວາງຕ່າງໆ ຈາກນັ້ນ ຈະໄດ້ປັບລະດັບໜ້າທາງ ເພື່ອລົງຢາງຂົ້ວທີ່ໄດ້ມາດຕະຖານ ໃນນີ້ໜ້າວຽກທີ່ຕ້ອງເຮັດປະກອບມີ:ຂູດຮື້ຈຸດທີ່ເປ່ເພ ກໍ່ສ້າງຄືນໃໝ່ຂະຫຍາຍໜ້າທາງໃຫ້ໄດ້ 17.7 ແມັດ, ກໍ່ສ້າງລະບົບລະບາຍນໍ້າ, ກໍ່ສ້າງທາງຍ່າງ 2 ຂ້າງທາງປູຢາງຂົ້ວທັບທັງໝົດລວງຍາວ 1,090 ແມັດ; ກວ້າງ 17,7 ແມັດ, ຄວາມກວ້າງໜ້າທາງ: 4ຊ່ອງຈະລາຈອນ 3,5 ລວມ 14 ແມັດ, 2 ຊ່ອງຈອດລົດ 1,85 ລວມ 3,7ແມັດ, ລວມທັງໝົດ: 17,7 ແມັດ ມູນຄ່າລວມທັງໝົດ 18,000,000,000 ກີບ ໃນນີ້ວຽກກໍ່ສ້າງ 17,655,000,000 ກີບ, ຄຸ້ມຄອງໂຄງການ 95,000,000 ກີບ, ທີ່ປຶກສາ 250,000,000 ກີບ, ໂດຍແມ່ນບໍລິສັດວອນທະບີງກໍ່ສ້າງຂົວທາງຈຳກັດເປັນຜູ້ຮັບເໝົາກໍ່ສ້າງ ພາຍຫຼັງເຊັນສັນຍາໂຄງການສຳເລັດແລ້ວແມ່ນຈະເລີ້ມລົງມືໃນທ້າຍເດືອນຕຸລານີ້ ແລະ ຈະໃຫ້ສຳເລັດໃນກາງປີ 2018. ໃນການລົງນາມບົດບັນທຶກສັນຍາກໍ່ສ້າງໂດຍແມ່ນ ທ່ານ ບຼົງວ່າງ ຫວ່າງເຈຍຊາ ຮອງຫົວໜ້າພະແນກໂຍທາທິການ ແລະ ຂົນສົ່ງ ແລະ ທ່ານ ນາງ ມົນທອງ ວອນທະບີງ ຮອງປະທານບໍລິສັດວອນທະບີງ ໂດຍຊ້ອງໜ້າຜູ້ເຂົ້າຮ່ວມເປັນສັກຂີພິຍານ.



ຂ່າວຍັງແຈ້ງໃຫ້ຮູ້ອີກວ່າ: ໂຄງການຍົກລະດັບເສັ້ນທາງແຕ່ຫົວເດີ່ນບິນຫາບ້ານກອກຫວານໄດ້ເລີ້ມລົງມືກໍ່ສ້າງແລ້ວມາແຕ່ຕົ້ນເດືອນກັນຍາປີ 2017 ນີ້ ໃນໄລຍະທາງ 20 ກວ່າກິໂລແມັດ, ໃນນີ້ປະກອບມີໜ້າວຽກທີ່ຕ້ອງປະຕິບັດມີຕັດໜ້າທາງໃໝ່, ຍົກລະດັບໜ້າທາງ, ວາງທໍ່ລະບາຍນ້ຳ ວຽກທັງໝົດນີ້ໃຊ້ງົບປະມານ 1 ຕື້ 36 ກວ່າລ້ານກີບ, ໃນນີ້ທຶນສົມທົບຂອງກະຊວງໂຍທາທິການ ແລະ ຂົນສົ່ງ 91,3% ແລະ ທຶນຂອງພະແນກໂຍທາທິການ ແລະ ຂົນສົ່ງ 8,7% ປະຈຸບັນແມ່ນໄດ້ສຳເລັດໜ້າວຽກໄປແລ້ວ 11% ແລະ ຄາດວ່າຈະໃຫ້ສຳເລັດໃນທ້າຍເດືອນ ທັນວາ ນີ້./.





ພາບ-ຂ່າວ ໂດຍ: ໄຊຍະສອນ/ຂ່າວສານຫຼວງພະບາງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.