Header Ads

ພະແນກຖວທແຂວງຫຼວງພະບາງເຄື່ອນໄຫວຢ້ຽມຢາມ ແລະ ແລກປ່ຽນບົດຮຽນວຽກງານສື່ມວນຊົນກັບ 2 ແຂວງພາກໃຕ້




ແຂວງຫຼວງພະບາງ : ກາງເດືອນຕຸລາ 2017 ຄະນະທິມງານຈາກພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ປະຈຳແຂວງຫຼວງພະບາງ ນຳໂດຍ ທ່ານ ສຸລິທິບ ໜໍ່ຄູນຜົນ ຫົວໜ້າພະແນກ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແລະ ຄະນະ ຈຳນວນ 18 ສະຫາຍ, ໄດ້ເດີນທາງເຄື່ອນໄຫວຢ້ຽມຢາມ ແຂວງສະຫວັນນະເຂດ ແລະ ແຂວງຈຳປາສັກ. ເຊີ່ງໃນການຢ້ຽມຢາມ ແລະ ເຮັດວຽກຢູ່ແຂວງສະຫວັນນະເຂດ ນັ້ນກໍໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ສີຫາ ພັນນະວົງ ຮັກສາການຫົວໜ້າພະແນກ ຖວທ ແຂວງສະຫວັນນະເຂດ ພ້ອມຄະນະ, ສ່ວນ ແຂວງຈຳປາສັກ ຕ້ອນຮັບໂດຍ ທ່ານ ບົວທອງ ສຸວັນນະສານ ຫົວໜ້າພະແນກ ຖວທ ແຂວງຈຳປາສັກ ພ້ອມດ້ວຍຄະນະ.



ການພົບປະທັງ 2 ແຂວງ ໃນເທື່ອນີ້ ຈຸດປະສົງແມ່ນເພື່ອແລກປ່ຽນບົດຮຽນວຽກງານດ້ານສື່ມວນຊົນ ຂອງ 3 ພາກສ່ວນ ຄື: ວຽກງານໜັງສືພິມ, ວິທະຍຸ ແລະ ໂທລະພາບ. ເຊີ່ງວຽກງານໜັງສືພິມ ໄດ້ລົງເລີກວຽກງານການຕະຫຼາດ-ການຈຳໜ່າຍ ແລະ ການເກັບລາຍຮັບຈາກໜັງສືພິມ, ວຽກງານວິທະຍຸ ໄດ້ລົງເລີກວຽກງານການຈັດລາຍການ, ການຕະຫຼາດ ແລະ ການມີສ່ວນຮ່ວມຈັດລາຍການຈາກພາກສ່ວນອື່ນ ແລະ ວຽກງານໂທລະພາບ ລົງເລີກດ້ານການສົ່ງຂ່າວໃຫ້ສູນກາງ, ການຜະລິດລາຍການ ແລະ ການເກັບລາຍຮັບ. ພ້ອມນີ້ ຍັງໄດ້ແລກປ່ຽນບົດຮຽນທາງດ້ານການລົງເຄື່ອນໄຫວເກັບກຳຂ່າວ ຂອງສື່ມວນຊົນ, ບັນດາຮູບການການເຄື່ອນໄຫວຂອງນັກຂ່າວ, ການນຳສະເໜີຂ່າວ ແລະ ວຽກງານຫ້ອງປະຈຳການນັກຂ່າວນຳອີກ.


ການພົບປະໄດ້ດຳເນີນໄປດ້ວຍບັນຍາກາດອັນອົບອຸ່ນ ແລະ ມີຄວາມໝາຍ ທັງສອງຝ່າຍໄດ້ພັດປ່ຽນກັນຂຶ້ນມີຄຳເຫັນແລກປ່ຽນບົດຮຽນຢ່າງກົງໄປກົງມາ ຕາມເນື້ອໃນຢ່າງຄົບຖ້ວນ. ຕອນທ້າຍກໍໄດ້ມີການມອບຂອງ ຂວັນ, ຂອງທີ່ລະນຶກໃຫ້ແກ່ກັນນຳອີກ.


ໂອກາດນີ້ ຄະນະຜູ້ແທນ ພະແນກ ຖວທ ແຂວງຫຼວງພະບາງ ກໍໄດ້ໄປທ່ຽວຊົມບັນດາສະຖານທີ່ທ່ອງທ່ຽວທີ່ຂຶ້ນຊື່ ຂອງແຂວງສະຫວັນນະເຂດ ແລະ ແຂວງຈຳປາສັກ ດ້ວຍຄວາມເບີກບານໃຈ ກ່ອນກັບສູ່ແຂວງຫຼວງພະບາງ ດ້ວຍຄວາມສະຫວັດດີພາບ./.


ຂ່າວ-ພາບ: ເກສອນ ແກ້ວລາ (ຂ່າວສານຫຼວງພະບາງ)


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.