Header Ads

ທ່ານຮອງນາຍົກລັດຖະມົນຕີ ສືບຕໍ່ເຮັດວຽກ ແລະ ຢ້ຽມຢາມ ແຂວງ ຕຽນຢາງ ສສ ຫວຽດນາມ





ໃນຕອນແລງຂອງວັນທີ 26 ຕຸລາ 2017 ທີ່ຜ່ານມານີ້ ສະຫາຍ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ, ພ້ອມດ້ວຍຄະນະ ໄດ້ສືບຕໍ່ເດີນທາງ ໄປຢ້ຽມຢາມ ແລະ ເຮັດວຽກຢູ່ ແຂວງ ຕຽນຢາງ ໂດຍມີ ສະຫາຍ ຫງວຽນວັນແທງ ກໍາມະການສູນກາງພັກກອມມູນິດຫວຽດນາມ, ເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍ ຄະນະນຳແຂວງ, ບັນດາພະແນກການ ໃຫ້ການຕ້ອນຮັບຢ່າງອົບອຸ່ນ.





ກ່ອນອື່ນ ສະຫາຍເລຂາພັກແຂວງ, ປະທານສະພາປະຊາຊົນແຂວງ ກໍ່ໄດ້ສະແດງຄວາມຍິນດີຕ້ອນຮັບ ຢ່າງອົບອຸ່ນ ເຊິ່ງການມາຢ້ຽມຢາມ ແຂວງ ຕຽນຢາງ ຂອງຄະນະທ່ານ ຮອງນາຍົກລັດຖະ ມົນຕີລາວ ແມ່ນຢູ່ໃນໄລຍະທ່າມກາງບັນຍາກາດ ທີ່ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພວມຮ່ວມກັນສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2017 ກໍ່ຄື ສອງວັນປະຫວັດສາດ:ຄົບຮອບ 40 ປີ ແຫ່ງການເຊັນສົນທິສັນຍາມິດຕະພາບ ແລະ ການຮ່ວມມື ແລະ 55 ປີ ແຫ່ງ ການສ້າງຕັ້ງສາຍພົວພັນການທູດ ລະຫວ່າງ ສອງປະເທດ.




ໃນໂອກາດນີ້, ສະຫາຍ ເລວັນເຫ໋ງຍ ຮອງປະທານກໍາມະການປະຊາຊົນ ແຂວງ ຕຽນຢາງ ກໍ່ໄດ້ລາຍງານ ກ່ຽວກັບສະພາບການພົວພັນຮ່ວມມື ກັບບາງທ້ອງຖິ່ນ ຂອງ ສປປ ລາວ ເວົ້າລວມ, ເວົ້າສະ ເພາະ ແມ່ນການພົວພັນຮ່ວມມື ກັບແຂວງຄໍາມ່ວນ ໃນໄລຍະຜ່ານມາ ເຊິ່ງເຫັນວ່າການພົວພັນຮ່ວມມືດັ່ງກ່າວ ນັບມື້ນັບໄດ້ຮັບການເສີມຂະຫຍາຍ ເຊິ່ງໄດ້ມີການພົວພັນແລກປ່ຽນ ໃນຂົງເຂດວຽກງານປຸກຝັງ ແລະ ລ້ຽງສັດ, ກິລາ, ວັດທະນະທໍາ-ສັງຄົມ.....ບົນພື້ນຖານບົດບັນທຶກ ການຮ່ວມມືຂອງສອງຝ່າຍ ມູນຄ່າການສົ່ງອອກ ມາ ສປປ ລາວ ໃນປີ 2016 ບັນລຸ 278.000 ໂດລາສະຫະລັດ, ສະເພາະ 9 ເດືອນ ປີ 2017 ບັນລຸ 163.000 ໂດລາສະຫະລັດ. ສໍາລັບການຮ່ວມມື ໃນຕໍ່ໜ້ານັ້ນ, ສະຫາຍ ຮອງປະທານກໍາມະການ ປະຊາຊົນ ແຂວງຕຽນຢາງ ຍັງຫວັງວ່າພັກ, ລັດຖະບານ ແລະ ປະຊາຊົນລາວ ຈະສືບຕໍ່ ສ້າງເງື່ອນໄຂ, ຊ່ວຍເຫຼືອ, ສະໜັບສະໜູນ, ການພົວພັນຮ່ວມມື ກັບບັນດາ ທ້ອງຖິ່ນຂອງລາວ ໃຫ້ນັບມື້ນັບແໜ້ນແຟ້ນຂຶ້ນກວ່າເກົ່າ.

ສໍາລັບການພັດທະນາ ເສດຖະກິດ ຂອງແຂວງນັ້ນ, ສະຫາຍ ເລວັນເຫ໋ງຍ ຍັງໄດ້ລາຍງານໃຫ້ຊາບວ່າ: ແຂວງຕຽນຢາງ ເປັນແຂວງໜຶ່ງທີ່ຕັ້ງຢູ່ ທົ່ງພຽງແມ່ນໍ້າຂອງ ແລະ ເປັນແຂວງ ທີ່ນອນຢູ່ໃນເຂດທີ່ມີທ່າແຮງ ທາງດ້ານເສດຖະກິດ, ຫ່າງຈາກນະຄອນໂຮ່ຈິມີນ ໄປທາງທິດໃຕ້ ປະມານ 70 ກິໂລແມັດ, ມີເນື້ອທີ່ 2.508 ກິໂລຕາແມັດ; ປະກອບມີ 11 ເມືອງ, ມີພົນລະເມືອງປະມານ 1,7 ລ້ານຄົນ. ໃນນັ້ນ, ມີກໍາລັງແຮງງານ ກວມ 74% ຂອງຈໍານວນ ພົນລະເມືອງທັງໝົດ. ແຂວງຕຽນຢາງ ຖືກຂະໜານນາມວ່າ ເປັນເຂດສະໜອງໝາກໄມ້ຫຼາຍຊະນິດ ທີ່ໃຫຍ່ທີ່ສຸດ ຂອງ ສສ ຫວຽດນາມ ໃນຈໍານວນເນື້ອທີ່ 87.000 ເຮັກຕາ, ຜົນຜະລິດ ບັນລຸໄດ້ 1,3 ລ້ານໂຕນ/ປີ. ນອກຈາກນັ້ນ, ແຂວງຍັງໄດ້ສະໜອງ ສະບຽງອາຫານ ຕື່ມອີກ ເຊິ່ງເຮັດໃຫ້ເສດຖະກິດ ໄດ້ມີການຂະຫຍາຍຕົວຢ່າງຕໍ່ເນື່ອງ ຊີວິດການເປັນຢູ່ ຂອງປະຊາຊົນ ກໍ່ໄດ້ຮັບການປັບປຸງ ແລະ ຍົກສູງຂຶ້ນເປັນກ້າວໆ ລວມຍອດຜະລິດຕະພັນພາຍໃນ ບັນລຸ 9,1%, ລາຍໄດ້ສະເລ່ຍປະມານ 2.000 ໂດລາສະຫະລັດຕໍ່ຄົນຕໍ່ປີ.

ຜ່ານການຮັບຟັງ ການລາຍງານ, ກ່ອນອື່ນສະຫາຍ ຮອງນາຍົກລັດຖະມົນຕີ ກໍ່ໄດ້ແຈ້ງຈຸດປະສົງຂອງ ການເດີນທາງມາຢ້ຽມຢາມເຮັດວຽກຢູ່ ສສ ຫວຽດນາມ ຄັ້ງນີ້ ແລະ ຕີລາຄາສູງ ຕໍ່ສາຍພົວພັນມິດຕະພາບ ອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ໂດຍແມ່ນ ປະ ທານ ໂຮ່ຈິມິນ ຜູ້ຍິ່ງໃຫຍ່, ປະທານ ສຸພານຸວົງ ແລະ ປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກ ເປັນຜູ້ສ້າງ ຕັ້ງຂຶ້ນນັ້ນ ສືບຕໍ່ໄດ້ຮັບການເສີມຂະຫຍາຍ ເຂົ້າສູ່ລວງເລິກ ແທດເໝາະຕົວຈິງ ແລະ ຖືໂອກາດດຽວກັນ ກໍ່ໄດ້ສະແດງຄວາມຂອບໃຈ ເປັນຢ່າງສູງ ມາຍັງອໍານາດການປົກຄອງ ແລະ ປະຊາຊົນພາຍໃນແຂວງ ທີ່ສ້າງເງື່ອນໄຂ ອໍານວຍຄວາມສະດວກ ຕະຫຼອດໄລຍະເຄື່ອນໄຫວເຮັດວຽກ ຢູ່ແຂວງ. ຕໍ່ກັບການພັດທະນາ ເສດຖະກິດ-ສັງຄົມ ຂອງແຂວງ ນັ້ນ, ສະຫາຍຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍຢ່າງຈິງໃຈ ຕໍ່ບັນດາຜົນສຳເລັດ ທີ່ສາມາດຍາດມາໄດ້ຢ່າງໃຫຍ່ຫຼວງ ໂດຍນໍາໃຊ້ທ່າແຮງບົ່ມຊ້ອນຂອງຕົນ ຈົນສາມາດເຮັດມີຜະລິດຕະພັນ ໝາກໄມ້ສົ່ງອອກ, ສິ່ງສໍາຄັນຊີວິດການເປັນຢູ່ ຂອງປະຊາຊົນ ໄດ້ຮັບການປັບປຸງດີຂຶ້ນ.

ສໍາລັບການພົວພັນຮ່ວມມື ກັບ ສປປ ລາວ ນັ້ນສະເໜີໃຫ້ແຂວງ ສືບຕໍ່ແລກປ່ຽນບົດຮຽນຮ່ວມກັນ ກັບບັນດາແຂວງ ແລະ ຂະແໜງການຕ່າງໆ ຂອງສປປ ລາວ ໃຫ້ຫຼາຍຂຶ້ນຕື່ມອີກ. ໂດຍສະເພາະ ແມ່ນບົດຮຽນກ່ຽວກັບ ການປູກຝັງ ເຊິ່ງເຫັນວ່າຢູ່ບາງແຂວງຂອງລາວ ກໍ່ມີທ່າແຮງດ້ານນີ້ ແລະ ຖືໂອກາດນີ້ ເຊື້ອເຊີນການນໍາຂອງແຂວງ ແລະ ບັນດາບໍລິສັດ, ຜູ້ປະກອບການຕ່າງໆ ໄປຢ້ຽມຢາມ ແລະ ສຶກສາສໍາຫຼວດ ຄວາມເປັນໄປໄດ້ ເພື່ອຂະຫຍາຍແນວພັນ ການປູກຕົ້ນໄມ້ໃຫ້ໝາກ ເວົ້າສະເພາະ, ເວົ້າລວມ ແມ່ນການລົງທຶນເຂົ້າໃນຂົງເຂດກະສິກໍາ ຢູ່ ສປປ ລາວ ຕື່ມອີກ.

ໃນໄລຍະເຄື່ອນໄຫວເຮັດວຽກຢູ່ ແຂວງດັ່ງກ່າວ ສະຫາຍ ຮອງນາຍົກລັດຖະມົນຕີ ພ້ອມດ້ວຍຄະນະຍັງໄດ້ໄປຢ້ຽມຢາມ ສະຖາບັນຄົ້ນຄວ້າ ແນວພັນໄມ້ໃຫ້ໝາກພາກໃຕ້ ແລະ ສະຖານທີ່ທ່ອງທ່ຽວ ລ້ຽງສັດປ່າ ຂອງແຂວງຕື່ມອີກ.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.