Header Ads

ເມືອງຈອມເພັດປະກາດບ້ານເກືອບ ເປັນບ້ານວັດທະນະທຳ




ວັນທີ່ 22 ພະຈິກນີ້ ຢູ່ບ້ານເກືອບ ເມືອງຈອມເພັດ ອົງການປົກຄອງເມືອງ ໄດ້ຈັດພິທີປະກາດບ້ານດັ່ງກ່າວ ເປັນບ້ານວັດທະນະທຳ ໂດຍມີ ທ່ານ ຈັນ ວັນນະສີ ເຈົ້າເມືອງຈອມເພັດ, ທ່ານ ສົມອົກ ພັນທະວົງ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ, ພ້ອມດ້ວຍພາກສ່ວນກ່ຽວຂ້ອງຂອງເມືອງ, ອົງການປົກຄອງບ້ານ ແລະ ປະຊາຊົນພາຍໃນບ້ານເຂົ້າຮ່ວມ.






ພິທີ ເພັດສະໝອນ ພັດທະນາ ນາຍບ້ານໆເກືອບ ໄດ້ຂື້ນຜ່ານບົດສະຫຼຸບ ການກໍ່ສ້າງຄອບຄົວ ແລະ ບ້ານວັດທະນະທຳຂອງບ້ານເກືອບ ທ່ານກ່າວວ່າ: ບ້ານເກືອບຢູ່ຫ່າງຈາກເທດສະບານເມືອງ ປະມານ 7 ກິໂລແມັດ ເປັນບ້ານຊົນປະສົມ ເຜົ່າລາວ ແລະ ເຜົ່າກື່ມມຸ ປະກອບມີ 63 ຄອບຄົວ, ພົນລະເມືອງ 326 ຄົນ, ຍີງ 201 ຄົນ, ອາຊີບສ່ວນໃຫຍ່ແມ່ນການປູກຝັງ ແລະ ລ້ຽງສັດ ອັນພົ້ນເດັ່ນ ແມ່ນການປູກເຂົ້າ, ປະຈຸບັນເສດຖະກິດຂອງບ້ານ ໄດ້ມີການເຕີບໂຕຕາມທ່າແຮງລວມຍອດຜະລິດຕະພັນພາຍໃນປີຜ່ານມາ ບັນລຸໄດ້ 2 ຕື້ 700 ລ້ານກ່ວາກີບ, ສະເລ່ຍໃສ່ຫົວຄົນໜື່ງໄດ້ 8 ລ້ານ ກ່ວາກີບ ຫຼື ເທົ່າກັບ 975 ໂດລາຕໍ່ຄົນຕໍ່ປີ, ໂດຍເຫັນໄດ້ເຖີງວັດທະນະທຳອັນດີງາມຂອງເຜົ່າ ປະຊາຊົນພາຍໃນບ້ານ ໄດ້ພ້ອມກັນປົກປັກຮັກສາ ຮີດຄອງປະເພນີອັນດີງາມຂອງເຜົ່າ ທີ່ເປັນເອກະລັກຂອງຊາດ ແລະ ຂອງທ້ອງຖີ່ນໄດ້ເປັນຢ່າງດີ, ເສີມຂະຫຍາຍວັນນະຄະດີທີ່ເປັນເອກະລັກທາງດ້ານວັດທະນະທຳ, ທີ່ມີມາແຕ່ດັ່ງເດີມ ຈົນມາເຖີງປະຈຸບັນ, ຜ່ານການຊຸກຍູ້ການສ້າງຄົນ, ຄອບຄົວ ແລະ ບ້ານວັດທະນະທຳ ຂອງຫ້ອງການຖະແຫຼງຂ່າວ ວັດທະນະທຳ ແລະ ທ່ອງທ່ຽວເມືອງ ເຫັນວ່າຄອບຄົວ ທີ່ຄົບຕາມ 5 ມາດຖານເງື່ອນໄຂອງຄອບຄົວວັດທະນະທຳ ທີ່ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວວາງອອກມີ 46 ຄອບຄົວ ກວມເກືອບ 73% ຂອງຈຳນວນຄອບຄົວທັງໝົດ. 



ໂອກາດນີ້ ທ່ານ ສົມອົກ ພັນທະວົງ ໄດ້ໃຫ້ຂື້ນມອບ ໃບຢັ້ງຢືນບ້ານວັດທະນະທຳ ໃຫ້ແກ່ອົງການປົກຄອງບ້ານຢ່າງສົມກຽດ. ຕອນທ້າຍ ທ່ານ ຈັນ ວັນນະສີ ໄດ້ມີຄຳເຫັນ ສະແດງຄວາມຊົມຊີຍທີ່ອົງການປົກຄອງບ້ານ ແລະ ປະຊາຊົນພາຍໃນບ້ານ ໄດ້ພ້ອມກັນເປັນເຈົ້າການສ້າງບ້ານຂອງຕົນເອງ ໃຫ້ກາຍເປັນບ້ານວັດທະນະທຳ ພ້ອມນີ້ ທ່ານໄດ້ເນັ້ນໜັກ ໃຫ້ອົງການປົກຄອງບ້ານ ສຸມໃສ່ ສ້າງເສດຖະກິດຕາມທ່າແຮງ ໂດຍນຳໃຊ້ເຕັກນິກວິທະຍາສາດເຂົ້າຊ່ວຍ ພ້ອມທັງເພີ່ມທະວີການອານຸລັກທາງດ້ານວັດທະນະທຳອັນດີງາມ ທັງປົກປັກຮັກສານາມມະຍົດ ບ້ານວັດທະນະທຳໃຫ້ຍືນຍົງຕະຫຼອດໄປ ເສີມຂະຫຍາຍມູນເຊື້ອປະເພນີຂອງເຜົ່າ ໃຫ້ຍືນຍົງຕະຫຼອດໄປ.


ຈາກນັ້ນ ຄະນະປະທານພ້ອມດ້ວຍແຂກຮັບເຊີນ ໄດ້ພ້ອມກັນລັ່ນຄ້ອງ 9 ບາດ ແລະ ເປີດປ້າຍບ້ານວັດທະນະທຳ ໃຫ້ແກ່ບ້ານເກືອບຢ່າງສົມກຽດ. 


ໂດຍ: ອາພຸດເດດ ບຸບຜາ (ວິທະຍຸກະຈາຍສຽງແຫ່ງຊາດ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.