Header Ads

ເມືອງລະຄອນເພັງ ຈູດທຳລາຍສິນຄ້າໝົດອາຍຸ-ປອມແປງ ມູນຄ່າ 19 ລ້ານກວ່າກີບ








ຫ້ອງການອຸດສາຫະກຳ ແລະການຄ້າເມືອງລະຄອນເພັງ ໄດ້ມີພິທິທຳລາຍສິນຄ້າໝົດອາຍຸ ແລະສິນຄ້າປອມແປງ , ຊື່ງໄດ້ຈັດຂຶ້ນໃນວັນທີ 1 ພະຈິກ 2017 ຢູ່ເດີນຕະຫຼາດເທດສະບານເມືອງ, ໂດຍການເຂົ້າຮ່ວມຂອງ ທ່ານ ພູນສຸກ ຣັດຖະເຮົ້າ ຮອງເຈົ້າເມືອງໆລະຄອນເພັງ ຜູ້ຊີ້ນຳວຽກງານເສດຖະກິດເມືອງ, ມີ ທ່ານ ສຸລິໃສ ແກ້ວທິດາ ຮັກສາການຫົວໜ້າຂະແໜງການຄ້າພາຍໃນ, ພ້ອມດ້ວຍຫົວໜ້າຫ້ອງການ, ຄະນະກຳມະການກວດກາສິນຄ້າຂັ້ນເມືອງ, ຜູ້ປະກອບການ ແລະພະນັກງານວິຊາການເຂົ້າຮ່ວມ.





ພາຍຫຼັງທີ່ຄະນະກຳມະການກວດສິນຄ້າເມືອງລະຄອນເພັງ ໄດ້ລົງເຄື່ອນໄຫວຕິດຕາມ, ກວດກາສິນຄ້າຕາມຫ້າງຮ້ານ, ຫົວໜ່ວຍທຸລະກິດ, ຜູ້ປະກອບການນ້ອຍ-ໃຫຍ່ພາຍໃນເມືອງ ນັບແຕ່ເດືອນກັນຍາເປັນຕົ້ນມາ, ໂດຍສະເພາະສິນຄ້າທີ່ໝົດອາຍຸ, ເຊື່ອມຄຸນນະພາບ, ສິນຄ້າປອມແປງ ແລະສິນຄ້າທີ່ລອກລຽນແບບ, ມີສານເຈືອປົນໃນອາຫານ ແລະປະເພດສິນຄ້າທີ່ຕ້ອງຫ້າມຄ້າຂາຍ. ຜ່ານການກວດກາຂອງເຈົ້າໜ້າທີ່ສາມາດກວດສິນຄ້າຂອງຜູ້ປະກອບການທັງໝົດພາຍໃນເມືອງ ຈຳນວນ 42 ຫົວໜ່ວຍ ລວມີ 54 ລາຍການ ມີມູນຄ່າ 19.334.000 ກີບ ໃນ 3 ໝວດໃຫຍ່ຂອງປະເພດສິນຄ້າຄື: ສິນຄ້າເຄື່ອງອາໄຫຼ່ຈັກສະຕິນ ແລະທາດເຄມີປະກອບອາວຸດລ້າເນື້ອ, ສິນຄ້າປະເພດອາຫານ, ເຄື່ອງດື່ມ ແລະສິນຄ້າປະເພດເຄື່ອງສຳອາງ ແລະຢາສູບ. ທັງນີ້ຮ່ວມກັນປະຕິບັດຕາມກົດໝາຍສະບັບເລກທີ 02/ສພຊ ວ່າດ້ວຍການປົກປ້ອງຜູ້ຊົມໃຊ້, ປາສະຈາກການນຳໃຊ້ສິນຄ້າທີ່ເປັນອັນຕະລາຍຕໍ່ສຸຂະພາບຂອງຜູ້ອຸປະໂພກ-ບໍລິໂພກ ແລະຮັບປະກັນຄວາມປອດໄພຈາກການຊົມໃຊ້ສິນຄ້າ ແລະສົ່ງເສີມຜະລິດຕະພັນພາຍໃນ, ການນຳເຂົ້າສິນຄ້າ-ຈຳໜ່າຍ ແລະບໍລິການໃຫ້ໄດ້ມາດຖານ, ຖືກຕ້ອງ ແລະສອດຄ່ອງຕາມລະບຽບກົດໝາຍ ແນໃສ່ເຮັດໃຫ້ສັງຄົມມີຄວາມຫງົບ, ເປັນລະບຽບ ແລະຍຸຕິທຳ.





ສຳລັບແຜນການທິດທາງໃນຕໍ່ໜ້າຄະນະກຳມະການກວດສິນຄ້າໄດ້ມີແຜນການສືບຕໍ່ເຜີຍແຜ່ບັນດານິຕິກຳ ແລະລະບຽບການຕ່າງໆໃຫ້ຜູ້ປະກອບການຮັບຮູ້, ເຂົ້າໃຈຕໍ່ບັນດາເນື້ອໃນວຽກງານດັ່ງກ່າວ, ຊຸກຍູ້ໃຫ້ຜູ້ປະກອບການ, ຫົວໜ່ວຍທຸລະກິດ ເຄື່ອນໄຫວຢ່າງຖືກຕ້ອງຕາມລະບຽບຫຼັກການ, ຮັບປະກັນການດຳເນີນກິດຈະການ, ບໍລິການໃຫ້ຜູ້ຊົມໃຊ້ພາຍໃນເມືອງ. ສືບຕໍ່ຕິດຕາມກວດກາການນຳເຂົ້າ-ຈຳໜ່າຍສິນຄ້າທີ່ຕ້ອງຫ້າມ ໂດຍສະເພາະຢາສູບທີ່ຈຳໜ່າຍບໍ່ຖືກຕ້ອງໃຫ້ເຂົ້າສູ່ລະບົບ ແລະສິນຄ້າອື່ນໆຢ່າງເຂັ້ມງວດ.




ພາບ ແລະ ຂ່າວ: ໜັງສືພິມ ສາລະວັນ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.