Header Ads

ແຂວງຈໍາປາສັກກຽມຄວາມພ້ອມສະຫຼອງປີທ່ອງທ່ຽວລາວ 2018




ການຈັດ ປີທ່ອງທ່ຽວລາວ 2018 ທີ່ແຂວງຈໍາປາສັກ ປັດຈຸບັນແມ່ນໄດ້ກະກຽມຄວາມພ້ອມໃນແຕ່ລະດ້ານ ແລະ ບັນດາກິດຈະກໍາຕ່າງໆ ເພື່ອຮັບປະກັນເຮັດໃຫ້ການສະຫຼອງປີດັ່ງກ່າວມີບັນຍາກາດ ທັງສາມາດເຮັດໃຫ້ນັກທ່ອງທ່ຽວທີ່ເຂົ້າມາແຂວງຈໍາປາສັກມີຄວາມປະທັບໃຈ.

ທ່ານ ນາງ ມາລາ ຈັນທະລາມ ຮອງຫົວໜ້າ ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງຈໍາປາສັກ ຜູ້ຊີ້ນໍາວຽກງານທ່ອງທ່ຽວໃຫ້ຮູ້ວ່າ: ການກະກຽມຄວາມພ້ອມໃນການຈັດສະຫຼອງປີທ່ອງທ່ຽວລາວຄັ້ງນີ້ແມ່ນໄດ້ກະກຽມໃນຫຼາຍດ້ານ ເພື່ອແນໃສ່ເຮັດໃຫ້ງານດັ່ງກ່າວດໍາເນີນໄປຢ່າງມີບັນຍາກາດ ແລະ ມີຜົນສໍາເລັດ ເປັນຕົ້ນ: ມີໂຮງແຮມ 66 ແຫ່ງ, ຣີສອດ 8 ແຫ່ງ, ເຮືອນພັກ 161 ແຫ່ງ, ຮ້ານອາຫານ 34 ແຫ່ງ; ມີແຫຼ່ງທ່ອງທ່ຽວທາງທໍາມະຊາດ 116 ແຫ່ງ, ແຫຼ່ງທ່ອງທ່ຽວປະຫວັດສາດ 40 ແຫ່ງ, ແຫຼ່ງທ່ອງທ່ຽວທາງວັດທະນະທໍາ 60 ແຫ່ງ; ມີບໍລິສັດທ່ອງທ່ຽວ ໃນນັ້ນບໍລິສັດແມ່ 30 ບໍລິສັດ, ສາຂາ 7 ບໍລິສັດ, ມີລົດບໍລິການນັກທ່ອງທ່ຽວ 119 ຄັນ, ມີບຸກຄະລາກອນພຽງພໍໃນການບໍລິການທ່ອງທ່ຽວເຊັ່ນ: ມີພະນັກງານນໍາທ່ຽວລະດັບຊາດ 206 ຄົນ, ພະນັກງານນໍາທ່ຽວມໍລະດົກ 20 ຄົນ, ລະດັບແຂວງ 26 ຄົນ. ພ້ອມນີ້ກໍ່ໄດ້ຊຸກຍູ້ພາກທຸລະກິດປັບປຸງດ້ານຄຸນນະພາບສະຖານທີ່ພັກແຮມ, ສະຖານທີ່ທ່ອງທ່ຽວ, ດ້ານການຂົນສົ່ງນັກທ່ອງທ່ຽວ ພ້ອມທັງຂອດການບໍລິການໃຫ້ມີຄວາມສະດວກ, ວ່ອງໄວ, ແລະ ປະທັບໃຈ.

ໃນການຈັດປີທ່ອງທ່ຽວລາວ 2018 ຢູ່ແຂວງຈໍາປາສັກ ປະກອບມີກິດຈະກໍາຕ່າງໆຄື: ງານນະມັດສະການຜາສາດຫີນວັດພູ ວັນທີ 29-31 ມັງກອນ 2018 ຊຶ່ງກໍານົດເອົາງານບຸນນີ້ເປັນການເລີ່ມຕົ້ນສະຫຼອງປີທ່ອງທ່ຽວຢູ່ແຂວງຈໍາປາສັກຢ່າງເປັນທາງການ. ພ້ອມນີ້ກໍ່ມີບຸນຊ້າງບ້ານກຽດໂງ້ງ ເມືອງປະທຸມພອນ, ມີຄາລາວານລົດຖີບໄປສະຖານທ່ີທ່ອງທ່ຽວ, ບຸນພະເວດ ເມືອງຊະນະສົມບູນ, ບຸນບັ້ງໄຟ ເມືອງໂພນທອງ, ບຸນປີໃໝ່ລາວ ເມືອງປາກເຊ, ງານເທດສະການໝາກໄມ້ສົດ ເມືອງບາຈຽງຈະເລີນສຸກ, ງານບຸນອອກພັນສາປະວໍລະນາ ແລະ ຊ່ວງເຮືອປາກເຊ./.


ພາບ ແລະ ຂ່າວ: ຈັນທະວີສັກ/ວິທະຍຸກະຈາຍສຽງແຂວງຈໍາປາສັກ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.