Header Ads

ນາຍົກຊີ້ທິດ ໃຫ້ຫຼວງພະບາງ ກະກຽມສອງວຽກສຳຄັນ ໃນການສ້າງນະຄອນຫຼວງພະບາງ ແລະ ປີທອງທ່ຽວລາວ 2018


ລາຍງານຈາກ ຫ້ອງການລັດຖະບານໃຫ້ຮູ້ວ່າ ໃນ​ວັນ​ທີ 05-06 ພະຈິກ 2017 ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ ພ້ອມ​ດ້ວຍ​ພັນ​ລະ​ຍາ ​ແລະ ຄະນະ ​ກໍ່ໄດ້​ສືບຕໍ່ເດີນທາງ​ໄປ​ເຄື່ອນ​ໄຫວ​ຢ້ຽມຢາມ ​ແລະ ​ເຮັດ​ວຽກ ຢູ່​ແຂວງຫຼວງພະ​ບາງ ພາຍຫຼັງສຳເລັດວຽກງານທີ່ ແຂວງອຸດົມໄຊ. ​ເຊິ່ງມີ ທ່ານ ຄຳ​ຂັນ ຈັນທະ​ວີ​ສຸກ ເຈົ້າ​ແຂວງໆຫຼວງພະ​ບາງ ມີ​ບັນດາ​ຄະ​ນະພັກ-ຄະນະ​ນຳ​ແຂວງ, ພະ​ແນ​ກການ​ທີ່​ກ່ຽວຂ້ອງ, ພະນັກງານຫຼັກ​ແຫຼ່ງ ​ແລະ ປະຊາຊົນ​ຊາວ​ແຂວງຫຼວງພະ​ບາງ ໃຫ້ການ​ຕ້ອນຮັບຢ່າງ​ອົບ​ອຸ່ນ​.

​​ໃນ​ການ​ເດີນທາງ​ມາ​ຢ້ຽມຢາມ​ຄັ້ງນີ້, ທ່ານ ຄຳ​ຂັນ ຈັນທະ​ວີ​ສຸກ ກໍ່​ໄດ້​ລາຍ​ງານ​ໃຫ້​ຊາບ​ເຖິງ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ​ໃນ​ໄລຍະ 9 ເດືອນຜ່ານມາ ​ແລະ ການ​ກະກຽມ​ໃຫ້​ແກ່​ປີ​ທ່ອງ​ທ່ຽວລາວ 2018 ​ເຊິ່ງ​ເຫັນ​ວ່າ ເສດຖະກິດໃນປີ 2017 ຍັງສືບ​ຕໍ່ຂະຫຍາຍຕົວຕໍ່​ເນື່ອງ ດ້ວຍຈັ່ງຫວະດີ​ສົມຄວນ ໃນລະດັບ 8,4% ຕໍ່ປີ, ສະ​ເລ່ຍລາຍ​ຮັບ​ຕໍ່​ຫົວ​ຄົນໄດ້ 1.746 ໂດລາສະຫະລັດຕໍ່ຄົນ​ຕໍ່ປີ, ສາມາດ​ເກັບລາຍຮັບງົບປະມານ​ໄດ້ 250 ກວ່າ​ຕື້ກີບ ​ເທົ່າ​ກັບ 94 % ຂອງ​ແຜນການ, ດ້ານ​ການ​ລົງທຶນ: ສໍາລັບປີ 2017 ສະພາແຫ່ງຊາດໄດ້ອານຸມັດງົບປະມານລົງທຶນຂອງລັດ ໃຫ້ແຂວງຫຼວງພະບາງຈໍານວນ 283 ໂຄງການ ມູນຄ່າ 81,345 ຕື້ກີບ, ສາມາດດຶງດູດການລົງທຶນຂອງເອກະຊົນພາຍໃນ ແລະ ຕ່າງປະເທດ ​ໄດ້ 252 ໂຄງການ, ມູນຄ່າ 529,365 ຕື້ກີບ ເທົ່າກັບ 46,97% ຂອງແຜນການປີ, ຈາກການເຕີບໂຕດັ່ງກ່າວ ໄດ້ປະກອບສ່ວນ​ເຂົ້າ​ໃນ​ການແກ້ໄຂຄວາມທຸກຍາກຂອງປະຊາຊົນ​ ຊຶ່ງປະຈຸບັນ ຍັງຄອບຄົວທຸກຍາກ 4.197 ຄອບຄົວ, ເທົ່າກັບ 5,39% ​ແລະ ພວມກະກຽມປະກາດເມືອງວຽງຄໍາ ເປັນເມືອງພົ້ນທຸກໃນຈໍານວນ 4 ເມືອງທຸກຍາກຂອງແຂວງ; ກ່ຽວກັບການກະກຽມປີທ່ອງທ່ຽວ ປີ 2018 ຢູ່ແຂວງຫຼວງພະບາງ ​ແມ່ນໄດ້ແຕ່ງຕັ້ງຄະນະຮັບຜິດຊອບກະກຽມການສະເຫຼີມສະຫຼອງປີທ່ອງທ່ຽວ ​ແລະ ບັນດາກິດຈະກໍາທີ່ຈະເຄື່ອນໄຫວ ​ເຊິ່ງມີ 5 ກິດຈະກຳໃຫຍ່ ​ແລະ 10 ກິດຈະກຳ​ປິ່ນ​ອ້ອມ ​ແລະ ຈະ​ໄດ້ຈັດງານສະເຫຼີມສະຫຼອງປີທ່ອງທ່ຽວລາວ 2016 ຢູ່ຫຼວງພະບາງ ຄາດຄະເນຈັດໃສ່ຕົ້ນເດືອນ​ເມສາ 2018.



​​ໂອກາດ​ນີ້, ທ່ານ ທອງ​ລຸນ ສີ​ສຸ​ລິດ ກໍ່​ໄດ້​ສະ​ແດງ​ຄວາມ​ຊົມ​ເຊີຍ​ ຕໍ່​ຄະນະ​ພັກ-ຄະນະ​ນຳ​ແຂວງ ​ແລະ ​ປະຊາຊົນ​ຊາວ​ແຂວງຫຼວງພະ​ບາງ ທີ່ຍາດມາ​ໄດ້ຫຼາຍຜົນ​ງານ ​ໃນ​ການ​ການ​ພັດທະນາ​ແຂວງ. ພ້ອມ​ນີ້, ທ່ານ​ນາຍົກລັດຖະມົນຕີ ຍັງ​ໄດ້​ຍົກ​ໃຫ້​ເຫັນ 02 ວຽກທີ່​ສຳຄັນ ທີ່​ຈະ​ໄດ້​ພ້ອມ​ກັນ​ເອົາ​ໃຈ​ໃສ່ ຄື: ການ​ປະກາດ​ໃຫ້​ເມືອງຫຼວງພະ​ບາງ ​ເປັນ​ນະຄອນ-ຫຼວງພະ​ບາງ ທີ່​ໄດ້​ຜ່ານ​ການ​ພິຈາລະນາ​ຈາກ​ກອງ​ປະຊຸມ​ລັດຖະບານສະ​ໄໝສາມັນ​ ປະຈໍາເດືອນ​ຕຸລາ​ທີ່​ຜ່ານ​ມາ ທີ່​ໄປ​ຕາມ​ການ​ພັດທະນາ​ໃນ​ໄລຍະ​ໃໝ່ ກໍ່ຄື​ມາດຖານການສະ​ເໜີຂຶ້ນ​ເປັນ​ນະຄອນ ທີ່​ກຳນົດ​ໄວ້​ໃນ​ກົດໝາຍ ວ່າ​ດ້ວຍການ​ປົກຄອງ​ທ້ອງ​ຖິ່ນ ​ແລະ ຄາດ​ວ່າຈະ​ປະກາດ​ເປັນ​ທາງ​ການ ​ໃນ​ເດືອນ​ເມສາ 2018 ທີ່​ຈະ​ມາ​ເຖິງນີ້;


ອີກ​ວຽກງານໜຶ່ງ ​ແມ່ນ​ການ​ກະກຽມ​ໃຫ້​ແກ່​ປິ​ທ່ອງ​ທ່ຽວລາວ 2018 ​ໃນ​ນັ້ນ, ​ໃຫ້​ເບິ່ງ​ຄືນ​ກ່ຽວກັບ​ບັນດາ​ກິດຈະກຳ​ເຫຼົ່ານັ້ນ ວ່າ​ຈະ​ມີ​ການ​ປັບປຸງ, ປົວ​ແປງ ​ແລະ ຍົກ​ລະດັບ​ຂຶ້ນ​ແນວ​ໃດ ອັນ​ສຳ​ຄັນ ​ແມ່ນ​ບໍ່​ໃຫ້​ກະທົບ​ໃສ່​ວັດຖຸບູຮານ ​ແລະ ປະ​ເພນີຮີດຄອງ​ອັນ​ດີງາມ-​ເກົ່າ​ແກ່​ຂອງ​ແຂວງ ກໍ່ຄື​ຂອງ​ຊາດ; ​ໃຫ້​ປົກ​ປັກ​ຮັກສາ​ເອກະລັກ​ດ້ານ​ອາຫານ​ການ​ກິນ​ຂອງ​ແຂວງ ​ເຖິງ​ວ່າ​ຈະ​ມີ​ການ​ປັບປຸງ​ສູດໃຫ້​ເປັນ​ສາກົນ ​ແລະ ມາດຕະຖານ​ການ​ປຸງ​ແຕ່ງ​ຂຶ້ນກໍ່ຕາມ ກໍ່ຕ້ອງມີ​ວິທີ​ການ​ຮັກສາ​ໄດ້​ ລົດ​ຊາດ​ທີ່​ເປັນ​ເອກະລັກ ​ແລະ ສູດ​ດັ້ງ​ເດີມ​ຂອງ​ທ້ອງ​ຖິ່ນ, ​ເອົາ​ໃຈ​ໃສ່​ປົກ​ປັກ​ຮັກສາ​ພືດ​ຜັກ ​ແລະ ໝາກ​ໄມ້ ທີ່​ເປັນ​ພັນ​ພື້ນບ້ານ​ເອກະລັກທີ່​ດີ​ຂອງ​ທ້ອງ​ຖິ່ນ ​ເພື່ອ​ສົ່ງ​ເສີມ​ໃຫ້​ເປັນ​ສິນຄ້າ​ຕ້ອນຮັບ​ນັກ​ທ່ອງ​ທ່ຽວ, ອັນ​ສຳຄັນ ຕ້ອງ​ໄດ້​ອົບຮົມ​ບົ່ມ​ສອນ​ລູກຫຼານຂອງ​ພວກ​ເຮົາ ​ໃຫ້​ອະນຸລັກ​ຮັກສາ​ປະ​ເພນີ​ການ​ນຸ່ງ​ຖື ທີ່​ເປັນ​ເອກະລັກ​ຂອງ​ຊາວ​ແຂວງຫຼວງພະ​ບາງ ​ເສີມ​ຂະຫຍາຍ​ໄປ​ສູ່​ການ​ຜະລິດ​ເປັນ​ສິນຄ້າ 1 ບ້ານ 1 ຜະລິດ​ຕະພັນ (ODOP). ທ່ານ​ນາຍົກລັດຖະມົນຕີ ຍັງ​ໄດ້​ຍົກ​ໃຫ້​ເຫັນ ສະພາບ​ການ​ພົ້ນ​ເດັ່ນ ທີ່​ເກີດ​ຂຶ້ນ​ໃນ​ພາກພື້ນ ​ແລະ ສາກົນ ອັນ​ສົ່ງ​ຜົນ​ກະທົບ​ທັງ​ດ້ານ​ບວກ ​ແລະ ດ້ານ​ລົບ ຕໍ່ປະ​ເທດ​ເຮົາ.




​ໃນ​ຕອນ​ທ້າຍ, ທ່ານ​ຍັງ​ໄດ້​ເນັ້ນ​ໃນດ້ານ​ການຈັດຕັ້ງປະຕິບັດ​ທິດ 3 ​ເປີດ ຄື: ​ເປີດ​ປະຕູ, ​ເປີດ​ສິ່ງ​ກີດຂວາງ ​ແລະ ​ເປີດ​ໃຈ ​ເພື່ອ​ສ້າງ​ເງື່ອນ​ໄຂ​ສະດວກ ​ແລະ ດຶງ​ດູດ​ການ​ລົງທຶນ​ໃນ​ແຂວງ ​ໃຫ້​ນັບ​ມື້​ນັບຫຼາຍຂຶ້ນ, ​ເອົາ​ໃຈ​ໃສ່​ແກ້​ໄຂ​ປະກົດ​ການ​ຫຍໍ້​ທໍ້​ໃນ​ສັງຄົມ, ສຸມ​ໃສ່​ປັບປຸງ​ແກ້​ໄຂ​ບັນດາ​ກົນ​ໄກ​, ການ​ຄຸ້ມ​ຄອງ​ບໍລິຫານ ທີ່​ເປັນ​ບັນຫາ​ກົດໜ່ວງ ​ແລ້ວ​ຫັນ​ໄປ​ສູ່​ຄຸນ​ນະພາ​ບ-ຫັນ​ໄປ​ສູ່​ປະສິດທິ​ຜົນ.

​ນອກຈາກ​ນີ້, ທ່ານ​ນາຍົກລັດຖະມົນຕີ ພ້ອມ​ດ້ວຍ​ພັນ​ລະ​ຍາ ​ແລະ ຄະນະ ຍັງ​ໄດ້​ເດີນ​ທາງ​ໄປຕິດຕາມ ​ແລະ ​ຢ້ຽມຊົມ ​ໂຄງການ​ກໍ່ສ້າງ​ທາງ​ລົດ​ໄຟ ລາວ-ຈີນ ທີ່​ຈຸດວາງ​ສິລາ​ລືກ ທີ່​ໄດ້​ມີ​ການ​ເຈາະ​ອຸ​ໂມງ ​ແລະ ຈຸດກໍ່ສ້າງ​ທາງ​ລົດ​ໄຟ​ຂ້າມ​ແມ່ນ້ຳຂອງ ​ເປັນ​ສອງ​ຈຸດ​ທີ່​ພວມ​ດຳ​ເນີນ​ການກໍ່ສ້າງ ​ໃນ​ໄລຍະ​ທາງ​ທັງໝົດ 80 ກິ​ໂລ​ແມັດ ທີ່​ມີ​ເສັ້ນທາງ​ລົດ​ໄຟ​ຜ່ານ​ແຂວງຫຼວງພະ​ບາງ, ມີ​ທັງໝົດ 5 ສະຖານີນ້ອຍ ​ແລະ 1 ສະຖານີ​ໃຫຍ່ ​ໂດ​ຍຜ່ານທັງໝົດ 28 ບ້ານ​ຂອງ 3 ​ເມືອງ ຄື: ​ເມືອງ​ຈອດ​ເພັດ, ​ເມືອງຫຼວງພະ​ບາງ ​ແລະ ​ເມືອງ​ຊຽງ​ເງິນ. ​ໃນ​ນັ້ນ, ມີ​ການ​ເຈາະ​ອຸ​ໂມງ​ເຖິງ 22 ​ແຫ່ງ ​ແລະ ຂົວ​ຂ້າມ​ນ້ຳ 30 ​ແຫ່ງ ກວມ 78,93% ຂອງ​ໄລຍະ​ທາງ​ລົດ​ໄຟ​ຜ່ານ​ແຂວງຫຼວງພະ​ບາງ.



​ຫຼັງຈາກ​ນັ້ນ, ກໍ່​ໄດ້​ເດີນທາງ​ໄປ​ຢ້ຽມຢາມໂຄງການກໍ່ສ້າງເຂື່ອນໄຟຟ້ານໍ້າອູ 1 ທີ່ຕັ້ງ​ຢູ່ບ້ານ​ຄອນ​ຄຳ, ເມືອງ​ປາກ​ອູ ມີກໍາລັງຕິດຕັ້ງ 180 ເມກາວັດ, ​ເລີ່​ມດຳ​ເນີນ​ການກໍ່ສ້າງ​ມາ​ແຕ່​ເດືອນ​ຕຸລາ 2016 ຄາດ​ວ່າ​ຈະ​ໃຫ້​ສຳ​ເລັດ ​ແລະ ຂາຍ​ກະ​ແສໄຟ​ໄດ້ ​ໃນ​ປີ 2020-2021 ພ້ອມໆກັບ​ເຂື່ອນ​ໄຟຟ້າ​ນ້ຳອູ 3, 5 ​ແລະ 7 ດ້ວຍ​ໄລຍະ​ສຳ​ປະທານ 29 ປີ. ພ້ອມ​ນີ້, ທ່ານ​ນາຍົກລັດຖະມົນຕີ ກໍ່​ໄດ້​​ໄປ​ຢ້ຽມຢາມ ​ແລະ ພົບ​ປະ​ກັບ​ປະຊາຊົນ​ບ້ານ​ຫ້ວຍ​ໂລ ​ເມືອງ​ປາກ​ອູ ທີ່​ເປັນ 1 ​ໃນ 17 ບ້ານທີ່ຖືກຜົນກະທົບຈາກ​ໂຄງການກໍ່ສ້າງເຂື່ອນໄຟຟ້ານໍ້າອູ 1. ໃນນັ້ນ, ເມືອງປາກອູ ມີ 13 ບ້ານ ​ແລະ ເມືອງງອຍ 4 ບ້ານ ມີ 1.921 ຄອບຄົວ, ​ເປັນບ້ານທີ່ຖືກຍົກຍ້າຍ 7 ບ້ານ 386 ຄອບຄົວ, ໃນນັ້ນມີບ້ານຫ້ວຍໂລ 134 ຄອບຄົວ, ບ້ານລາດທ່າແຮ່ 78 ຄອບຄົວ ​ເຊິ່ງທ່ານ​ນາຍົກລັດຖະມົນຕີ ​ໄດ້​ຍົກ​ໃຫ້​ເຫັນ​ຄວາມ​ຈຳ​ເປັນ​ໃນ​ການ​ພັດທະນາ​ໃນ​ໄລຍະ​ໃໝ່, ຄວາມ​ພະຍາຍາມ​ຂອງ​ພັກ-ລັດ ກໍ່ຄື​ຄະນະ​ນຳ​​ແຂວງ ທີ່​ຈະ​ຊອກ​ຫາ​ວິທີ​ທາງ ​ໃນ​ການ​ຍົກ​ລະດັບ​ຊີວິດ​ການ​ເປັນ​ຢູ່​ຂອງ​ປະຊາຊົນ ​ໃຫ້​ດີ​ຂຶ້ນ​ເລື້ອຍໆ ​ໂດຍ​ການ​ພັດທະນາ​ ​ແລະ ​ໃຊ້​ປະ​ໂຫຍດ ຈາກສາຍ​ນ້ຳອູ ​ໃຫ້​ມີ​ປະສິດທິພາບ ​ແລະ ປະສິດທິ​ຜົນ​ສູງ​ສຸດ ຈຶ່ງ​ຮຽກຮ້ອງ​ມາ​ຍັງ​ອຳນາດ​ການ​ປົກຄອງ​ບ້ານ ​ແລະ ພໍ່​ແມ່​ປະຊາຊົນ ຈົ່ງ​ໄດ້​ໃຫ້ການ​ຮ່ວມ​ມື ​ເພື່ອ​ພັດທະນາ​ໂຄງການ​ດັ່ງກ່າວ ​ອັນ​ກາຍ​ເປັນ​ຜົນ​ປະ​ໂຫຍ​ດ ທັງ​ພາກ​ລັດ, ພາກ​ເອກະ​ຊົນ ​ແລະ ປະຊາຊົນ​ໃນ​ທ້ອງ​ຖິ່ນ.

ດ້ານໜຶ່ງ ການ​ບົກ​ຍ້າຍ​ຈັດ​ສັນ​ທີ່ຢູ່​ໃຫ້​ໃໝ່ ກໍ່​ເປັນ​ໂອກາດ​ອັນ​ດີ ​ໃນ​ການຍົກຍ້າຍ​ຈາກ​ຊີວິດ​ດັ້ງ​ເດີມ-ປະຖົມ​ປະ​ຖານ ມາ​ເຕົ້າ​ໂຮມ​ເປັນ​ບ້ານ​ໃຫຍ່ທີ່​ທັນ​ສະ​ໄໝຂຶ້ນ ມີ​ການ​ບໍລິການ, ມີ​ການ​ປະກອບອາຊີບ ​ແລະ ທຳ​ການ​ຜະ​ລິດອັນໃໝ່ ລວມ​ເຖິງ​ການ​ຂະຫຍາຍ​ໄປ​ສູ່​ອາຊີບ​ໃໝ່ໆ. ​ພ້ອມ​ນີ້, ກໍ່ຮຽກຮ້ອງ​ໃຫ້​ພໍ່​ແມ່​ປະຊາຊົນ ຈົ່ງ​ພ້ອມ​ກັນ​ບຸກບືນ ແລະ ຢືນຂຶ້ນ ດ້ວຍລຳແຄ່ງຂອງຕົນເອງ ບໍ່​ໃຫ້​ຄອງ​ຄອຍ​ແຕ່​ການ​ຊ່ວຍ​ເຫຼືອພຽງຢ່າງ​ດຽວ, ສ້າງ​ໃຫ້​ໄດ້​ຜະລິດ​ຕະພັນ ​ແລະ ສິນຄ້າ ທີ່​ເປັນ​ເອກະລັກ​ຂອງ​ຕົນ ​ເພື່ອ​ການ​ພັດທະນາ​ທີ່​ຍືນ​ຍົງ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.