Header Ads

ຜົນສຳເລັດກອງປະຊຸມຫົວໜ້າກົມຕຳຫລວດກວດຄົນເຂົ້າ-ອອກເມືອງ ຮ່ວມກັບຫົວໜ້າພະແນກກົງສຸນອາຊຽນ ຄັ້ງທີ 21 ແລະ ກອງປະຊຸມທີ່ກ່ຽວຂ້ອງທີ່ ສປປ.ລາວ ໄດ້ຮັບກຽດເປັນເຈົ້າພາບ






ກອງປະຊຸມຫົວໜ້າກົມຕຳຫລວດກວດຄົນເຂົ້າ-ອອກເມືອງ ຮ່ວມກັບຫົວໜ້າພະແນກກົງສຸນອາຊຽນ ຄັ້ງທີ 21 ແລະ ກອງປະຊຸມທີ່ກ່ຽວຂ້ອງທີ່ ລາວ ໄດ້ຮັບກຽດເປັນເຈົ້າພາບຈັດຂຶ້ນຢູ່ນະຄອນຫລວງວຽງຈັນໃນວັນທີ 21 ຫາ 23 ພະຈິກນີ້ ໂດຍມີຫົວໜ້າກົມ ຕຳຫລວດກວດຄົນເຂົ້າ-ອອກເມືອງ ແລະ ຫົວໜ້າພະແນກກົງສຸນຈາກບັນດາປະເທດສະມາຊິກອາຊຽນພ້ອມຄະນະ ແລະ ກອງເລຂາອາຊຽນເຂົ້າຮ່ວມ.
ພັນໂທ ສາຍສະໝິງ ສີວິໄລ, ຫົວໜ້າກົມຕຳຫລວດກວດຄົນເຂົ້າ-ອອກເມືອງ, ກະຊວງ ປ້ອງກັນຄວາມສະຫງົບ ໄດ້ຖະແຫລງຂ່າວກ່ຽວກັບຜົນສຳເລັດຂອງກອງປະຊຸມຕໍ່ສື່ມວນຊົນວ່າ: ກອງປະຊຸມຄັ້ງນີ້ລວມມີ 4 ກອງປະຊຸມສຳຄັນ ຄື: 


 
1. ກອງປະຊຸມສືບຂ່າວຕຳຫລວດກວດຄົນເຂົ້າ-ອອກເມືອງອາຊຽນ ຄັ້ງທີ 13 ໄດ້ເນັ້ນໃສ່ຄວາມສຳຄັນຂອງການແລກປ່ຽນຂໍ້ມູນຂ່າວສານສືບຂ່າວຂອງຕຳຫລວດກວດຄົນເຂົ້າ-ອອກເມືອງພາຍໃນປະເທດສະມາຊິກອາຊຽນ ໂດຍສະເພາະການແກ້ໄຂບັນຫາການລັກລອບຄ້າມະນຸດ, ການເຂົ້າເມືອງຜິດກົດໝາຍ, ການເຄື່ອນໄຫວຂອງກຸ່ມກໍ່ການຮ້າຍ ແລະ ອາດຊະຍາກຳຂ້າມຊາດ. 
 
2. ກອງປະຊຸມໜ່ວຍງານວິຊ່າການກ່ຽວກັບວິຊ່າລວມອາຊຽນ ຄັ້ງທີ 2 ໄດ້ສຸມໃສ່ປຶກສາຫາລືກ່ຽວກັບທິດທາງໃນຕໍ່ໜ້າສຳລັບຄວາມເປັນໄປໄດ້ກ່ຽວກັບແນວຄິດລິເລີ່ມການສ້າງຕັ້ງວິຊ່າລວມຂອງອາຊຽນ. 
 
3. ກອງປະຊຸມຫົວໜ້າກົມຕຳຫລວດກວດຄົນເຂົ້າ-ອອກເມືອງ ຮ່ວມກັບຫົວໜ້າພະແນກກົງສຸນອາຊຽນ ຄັ້ງທີ 21. ໄດ້ແລກປ່ຽນກ່ຽວກັບບັນດາສິ່ງທ້າທາຍ ແລະ ຄວາມຄືບໜ້າຂອງວຽກງານກວດຄົນເຂົ້າ-ອອກເມືອງຂອງແຕ່ລະປະເທດ, ການສ້າງຂີດຄວາມສາມາດ ແລະ ການແລກປ່ຽນພາກປະຕິບັດທີ່ດີກ່ຽວກັບການຄຸ້ມຄອງຊາຍແດນ, ວຽກງານກົງສຸນ ແລະ ການກວດຄົນເຂົ້າ-ອອກເມືອງ, ປຶກສາຫາລືກ່ຽວກັບການຮ່າງລະບຽບການສຳລັບການຊ່ວຍເຫລືອດ້ານກົງສຸນໃຫ້ແກ່ພົນລະເມືອງອາຊຽນຢູ່ປະເທດທີສາມ, ການສ້າງບັດເດີນທາງທຸລະກິດອາຊຽນ ແລະ ຂໍ້ລິເລີ່ມການສ້າງວິຊ່າລວມອາຊຽນ ( ASEAN Common Visa ) ໂດຍກອງປະຊຸມເຫັນດີສືບຕໍ່ປຶກສາຫາລືກ່ຽວກັບບັນຫາດັ່ງກ່າວໃນກອງປະຊຸມຄັ້ງຕໍ່ໄປ. ນອກນີ້ ໃນກອງປະຊຸມຄັ້ງນີ້ ລາວ ໄດ້ສະເໜີຂໍ້ລິເລີ່ມໃໝ່ ຄື: ການສ້າງຕັ້ງຈຸດປະສານງານເພື່ອອຳນວຍຄວາມສະດວກໃຫ້ແກ່ການສົ່ງຜູ້ເຂົ້າເມືອງຜິດກົດໝາຍກັບຄືນປະເທດຕົ້ນທາງ ຊຶ່ງບັນຫາດັ່ງກ່າວຈະໄດ້ສືບຕໍ່ປຶກສາຫາລືໃນກອງປະຊຸມຄັ້ງຕໍ່ໄປ.

4.ກອງປະຊຸມ ຫົວໜ້າກົມຕຳຫລວດກວດຄົນເຂົ້າ-ອອກເມືອງ ຮ່ວມກັບຫົວໜ້າພະແນກກົງສຸນອາຊຽນ ບວກ ອົດສຕາລີ ຄັ້ງທີ 13 ໄດ້ຮັບຊາບກ່ຽວກັບຜົນສຳເລັດຂອງການຈັດຕັ້ງປະຕິບັດບັນດາກິດຈະກຳໃນສົກ 2016 ຫາ 2017 ແລະ ເຫັນດີຮັບຮອງເອົາແຜນກິດຈະກຳສຳລັບສົກ 2017 ຫາ 2018, ຮັບຮອງເອົາເອກະສານພາລະບົດບາດຂອງຄະນະກຳມະການເຝິກອົບຮົມວຽກງານກວດຄົນເຂົ້າ-ອອກເມືອງຂອງອາຊຽນ ແລະ ອົດສຕາລີ ເພື່ອສ້າງຕັ້ງຄະນະກຳມະການເຝິກອົບຮົມສະເພາະວຽກງານກວດຄົນເຂົ້າ-ອອກເມືອງໂດຍອົດສຕາລີຈະຊ່ວຍເຫລືອດ້ານວິຊ່າການ ແລະ ງົບ ປະມານ ແນໃສ່ສ້າງຄວາມສາມາດໃຫ້ແກ່ເຈົ້າໜ້າທີ່ກວດຄົນເຂົ້າ-ອອກເມືອງຂອງບັນດາປະເທດສະ ມາຊິກອາຊຽນ. ນອກນີ້ ອາຊຽນ ແລະ ອົດສຕາລີເຫັນດີສຶບຕໍ່ຮ່ວມມືດ້ານວຽກງານກວດຄົນເຂົ້າ-ອອກເມືອງໃນພາກພື້ນ, ລວມທັງການສ້າງມາດຕະການຕ່າງຯ ເພື່ອສະໜັບສະໜູນການສ້າງປະຊາຄົມເສດຖະກິດອາຊຽນ.

ພາບ ແລະ ຂ່າວ: ວິທະຍຸປະຈາຍສຽງແຫ່ງຊາດ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.