Header Ads

ປິດລ້ອມເຮືອນ ຈັບໄວລຸ້ນມົ້ວສຸມຢາເສບຕິດ ໄດ້ 18 ຄົນ


ປະຊາຊົນບ້ານໂພນສະຫວັນ ເມືອງນາຊາຍທອງ ນະຄອນຫຼວງວຽງຈັນ ໄດ້ເຂົ້າແຈ້ງຄວາມຕໍ່ເຈົ້າໜ້ທີ່ຕໍາຫຼວດ ປກສ ເມືອງນາຊາຍທອງ ວ່າ: ໃນໄລຍະທ້າຍເດືອນຕຸລາ-ພະຈິກ 2017 ມີໄວລຸ້ນຈໍານວນໜຶ່ງຂັບຂີ່ລົດຈັກທຽວເຂົ້າເຮືອນຂອງ ທ້າວ ບຸນເລັກ ຫຼື ເກັກ ອາຍຸ 26 ປີ ບ້ານໂພນສະຫວັນ ເປັນປະຈຳ ເຮັດໃຫ້ມີສຽງເນືອງນັນລົບກວນໃນເວລາຫຼັບນອນ.




ຈາກນັ້ນ, ເຈົ້າໜ້າທີ່ຕໍາຫຼວດວິຊາສະເພາະ ໄດ້ຈັດກໍາລັງເຂົ້າຕິດຕາມເຮືອນເປົ້າໝາຍດັ່ງກ່າວ. ຜ່ານການຕິດຕາມເຫັນວ່າ: ມີມູນຄວາມຈິງ ຮອດວັນທີ 6 ພະຈິກ 2017 ຈຶ່ງໄດ້ນໍາກໍາລັງປະສານສົມທົບກັບ ປກສ ກຸ່ມ ບ້ານ ແລະ ອຳນາດການປົກຄອງບ້ານ ເຂົ້າປິດລ້ອມເຮືອນຫຼັງດັ່ງກ່າວ ແລ້ວເຂົ້າກວດຄົ້ນພົບເຫັນໄວລຸ້ນທີ່ກໍາລັງມົ້ວສຸມຢາເສບຕິດ. ຈາກນັ້ນ, ຈຶ່ງຈັບຕົວໄດ້ທັງໝົດ 18 ຄົນ ພ້ອມອຸປະກອນເສບຢາຈໍານວນໜຶ່ງ. ພັຕ ຄອນສິດ ດວງພະຈັນ ຫົວໜ້າໜ່ວຍງານຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ເມືອງນາຊາຍທອງ ໄດ້ໃຫ້ຮູ້ວ່າ: ບັນດາໄວລຸ້ນທີ່ມົ້ວສຸມຢາເສບຕິດຈໍານວນດັ່ງກ່າວ ຊື່ທ້າວ ບຸນເລັກ ຫຼື ເກັກ ອາຍຸ 26 ປີ ( ເຈົ້າຂອງເຮືອນ), ທ້າວ ພູນສຸກ ຫຼື ຈ່ອຍ ອາຍຸ 23 ປີ, ທ້າວ ວິມານ ຫຼື ດໍາ ອາຍຸ 31 ປີ, ທ້າວ ເອກະໄຊ ຫຼື ຕິ່ງ ອາຍຸ 23 ປີ, ທ້າວ ສຸກສັນ ຫຼື ຫວຽດ ອາຍຸ 25 ປີ, ທ້າວ ລຸດ ອາຍຸ 25 ປີ, ທ້າວ ລັດຕະນະ ຫຼື ນະ ອາຍຸ 21 ປີ, ທ້າວ ລໍາພັນ ຫຼື ພັນ ອາຍຸ 28 ປີ, ທ້າວ ນຽນ ອາຍຸ 37 ປີ ຢູ່ບ້ານໂພນສະຫວັນ, ທ້າວ ສີສະຫງວນ ອາຍຸ 40 ປີ 11 ຄົນຢູ່ບ້ານໂພນທາ, ທ້າວ ຄໍາຫຼ້າ ຫຼື ຫຼ້າ ອາຍຸ 19 ປີ ຢູ່ບ້ານໂພນຄໍາ, ທ້າວ ສົມໃຈ ຫຼື ອ້າຍ ອາຍຸ 22 ປີ, ທ້າວ ຖາວອນ ຫຼື ເຖົ້າ ອາຍຸ 27 ປີ, ທ້າວ ທອງກີ້ມ ອາຍຸ 17 ປີ, ທ້າວ ດໍາ ອາຍຸ 24 ປີ, ທ້າວ ທອງວິໄລ ຫຼື ຕູ່ ອາຍຸ 25 ປີ ແລະ ທ້າວ ໂຊດາ ຫຼື ດາ ອາຍຸ 39 ປີ ທັງ 6 ຢູ່ບ້ານຜາງແຫ້ງ ຢູ່ເມືອງນາຊາຍທອງ ນະຄອນຫຼວງວຽງຈັນ. ຜ່ານການສອບສວນ ພວກກ່ຽວສາລະພາບວ່າ: ແມ່ນໄດ້ພາກັນເສບຢາເສບຕິດ ປະເພດຢາບ້າແທ້ ໃນຂະນະທີ່ກໍາລັງແບ່ງປັນກັນເສບ ກໍຖືກເຈົ້າໜ້າທີ່ຕໍາຫຼວດຈັບຕົວກ່ອນ.

ຈາກນັ້ນ, ມາຮອດວັນທີ 8 ພະຈິກ 2017 ເຈົ້າໜ້າທີ່ຕໍາຫຼວດກອງບັນຊາການ ປກສ ເມືອງນາຊາຍທອງ ຈຶ່ງນໍາຕົວໄວລຸ້ນຈໍານວນດັ່ງກ່າວມາສຶກສາອົບຮົມກ່າວເຕື່ອນ ໂດຍຊ້ອງໜ້າຜູ້ປົກຄອງ ແລະ ອໍານາດການປົກຄອງບ້ານ ກ່ອນເຮັດບົດບັນທຶກ ແລ້ວມອບໃຫ້ຜູ້ປົກຄອງໄປສຶກສາອົບຮົມຕໍ່ໄປ. ໃນພິທີ, ພັຕ ຄອນສິດ ດວງພະຈັນ ໄດ້ຍົກເອົາເນື້ອໃນເອກະສານຜົນຮ້າຍຂອງຢາເສບຕິດ, ເອກະສານຄວາມຮູ້ພື້ນຖານກ່ຽວກັບຜົນຮ້າຍຂອງຢາເສບຕິດ ແລະ ກົດໝາຍວ່າດ້ວຍຢາເສບຕິດ ເອກະສານຕ່າງໆທີ່ນຳມາເຜີຍແຜ່ໃນຄັ້ງນີ້ ກໍເພື່ອໃຫ້ຜູ້ຖືກເຄາະຮ້າຍຈາກຢາເສບຕິດຈຳນວນ 18 ຄົນ ໄດ້ຮັບຮູ້ ແລະ ເຂົ້າໃຈຕໍ່ຜົນຮ້າຍຂອງຢາເສບຕິດ ແລະ ກົດໝາຍວ່າດ້ວຍຢາເສບຕິດ. ຈາກນັ້ນ, ຈຶ່ງເຮັດບົດບັນທຶກຄໍ້າປະກັນ ແລ້ວມອບໃຫ້ຜູ້ປົກຄອງນໍາໄປສຶກສາອົບຮົມຕໍ່ ໂດຍພາຍໃຕ້ການຕິດຕາມກວດກາຂອງເຈົ້າໜ້າທີ່ແຕ່ລະໄລຍະຈົນກວ່າຈະຢຸດເຊົາແທ້ ແລະ ກາຍເປັນຄົນດີຂອງຄອບຄົວ, ສັງຄົມ ແລະ ປະເທດຊາດ ແລະ ກໍລະນີບໍ່ມາຮັບເອົາແມ່ນຈະໄດ້ສົ່ງໄປບຳບັດຢູ່ສູນບໍາບັດຜູ້ຕິດຢາເສບຕິດ ນະຄອນຫຼວງວຽງຈັນ (ສູນສົມສະຫງ່າ) ຈົນກ່ວາໝົດທາດຢາເສບຕິດ ຈຶ່ງຈະປ່ອຍຕົວອອກໄປ.

ໃນໂອກາດດຽວກັນ, ພັຕ ຄອນສິດ ດວງພະຈັນ ຮຽກຮ້ອງມາຍັງປະຊາຊົນ ຈົ່ງເອົາໃຈໃສ່ຕິດຕາມໃກ້ສິດລູກຫຼານໃຫ້ດີ ເພື່ອຫຼີກລ່ຽງບໍ່ໃຫ້ໄປຫຍຸ້ງກ່ຽວກັບຢາເສບຕິດ ແລະ ຮຽກຮ້ອງມາຍັງບັນດານັກທຸລະກິດທີ່ດໍາເນີນກິດຈະການໃດໜຶ່ງ ທີ່ເຫັນວ່າ: ກຳມະກອນ ຫຼື ພະນັກງານຢູ່ໃນການຄຸ້ມຄອງຂອງຕົນ ມີການເສບຢາເສບຕິດ ຫຼື ມົ້ວສຸມຢາເສບຕິດ ແມ່ນໃຫ້ແຈ້ງຕໍ່ເຈົ້າໜ້າທີ່ພາກສ່ວນທີ່ກ່ຽວຂ້ອງ ເພື່ອຈະຊອກຫາວິທີແກ້ໄຂໃຫ້ຖືກຕ້ອງ ເຮັດໃຫ້ສະພາບການດັ່ງກ່າວໃຫ້ຫຼຸດນ້ອຍຖອຍລົງໄປເລື້ອຍໆ.

ແຫຼ່ງຂ່າວ: ນສພ ຄວາມສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.