Header Ads

ໜີ້ສາມແຈ ແມ່ນຫຍັງ? ທີ່ລັດຖະບານກຳລັງເລັ່ງແກ້ໄຂ



ມີແຟນເພຈ ຫຼາຍຄົນ ແຊັດມາຖາມ ກັບເລື່ອງ ໜີ້ສາມແຈ ທີ່ທາງລັດຖະບານ ກຳລັງເລັ່ງແກ້ໄຂ ແລະ ປ້ອງກັນ ບໍ່ໃຫ້ເກີດຂຶ້ນ. ເພາະປະຈຸບັນ ໄດ້ກາຍເປັນພາລະ ແລະ ໜີ້ສິນ ແກ່ລັດຖະບານ ຢ່າງຫຼວງຫຼາຍ.

ຈະມາເວົ້າໃຫ້ທຸກຄົນເຂົ້າໃຈແບບງ່າຍໆ ວ່າໜີ້ສາມແຈນັ້ນມັນແມ່ນຫຍັງກັນແທ້.

ໜີ້ສາມແຈ ໝາຍເຖິງ ປະກົດການ ທີ່ມີການຕິດໜີ້ກັນ ຊ້ອນ ຄື ທ້າວ ກ ເປັນ ໜີ້ ທ້າວ ຂ ແລະ ທ້າວ ຂ ໄປເປັນ ໜີ້ ທ້າວ ຄ.

ເຊິ່ງເຫດການ ທີ່ເປັນ ບັນຫາ ຄື ມີພາກເອກະຊົນ ກໍ່ຄື ທ້າວ ຂ ນັ້ນລະ ແມ່ນຍືນຂໍ້ສະເໜີ ເພື່ອ ເຮັດກິດຈະກຳໃດ ໜື່ງ ໂດຍບອກວ່າ ຈະໃຊ້ທຶນໂຕເອງ ໄປກ່ອນ ແລ້ວ ຈັ່ງໃຫ້ ທ້າວ ກ (ໃນທີ່ນີ້ ກໍ່ຄື ລັດຖະບານ) ໃຊ້ໜີ້ ຕາມຫຼັງ ໂດຍມີໄລຍະເວລາ ແລະ ເງື່ອນໄຂ ຂອງການໄຊ້ໜີ້. ແຕ່ວ່າ, ທ້າວ ຂ ພັດວ່າບໍ່ມີເງິນພຽງພໍ ໃນການເຮັດ ກິດຈະກຳ ທີ່ສະເໜີ ມານັ້ນ. ຫຼື ບາງລາຍ ກະອາດເວົ້າວ່າ ໄປຝອຍ ເອົາໂຄງການ ມາກ່ອນ. 

ຈາກນັ້ນ, ທ້າວ ຂ ກໍ່ເອົາເອກະສານ ທີ່ມີ ທ້າວ ກ ເຊັ່ນຮັບຮອງ ຈະຊຳລະໜີ້ ນີ້ ໄປຫາ ທ້າວ ຄ (ເຊິ່ງໃນທີ່ນີ້ ສ່ວນຫຼາຍ ຈະແມ່ນ ທະນາຄານ). ເພາະ ມີການຄໍ້າປະກັນ ຈາກພັກລັດ ທ້າວ ຄ ກະເລີຍ ປ່ອຍເງິນໃຫ້ ທ້າວ ຂ ທັນທີ ໂດຍບໍ່ທັນ ໄດ້ຄິດວ່າ ທ້າວ ກ ຈະຊຳລະເງິນ ໄດ້ຕາມແຜນ ຫຼືບໍ່. ເພາະ ທ້າວ ຄ ກະຊິໄດ້ດອກເບ້ຍ ຫັ້ນແລ້ວ.

ບັດນີ້! ບັນຫາ ກະເກີດຂຶ້ນ ເມື່ອ ການຊຳລະຂອງ ທ້າວ ກ ໃຫ້ ທ້າວ ຂ ບໍ່ທັນຕາມກຳນົດ. ກະເລີຍ ເຮັດໃຫ້ ທ້າວ ຂ ເລີ່ມມີບັນຫາ ແລ້ວ ບາດນີ້. ເພາະ ຕ້ອງໄດ້ ຈ່າຍດອກເບ້ຍ ໃຫ້ ທ້າວ ຄ.​ ເຮັດຈັ່ງໃດບາດນີ້. ກະເລີຍ ມີບາງໂຄງການ ທີ່ເຮັດ ໄປບໍ່ແລ້ວ ກະມີ, ເຮັດໄປເຄິ່ງທາງເງິນໝົດ. ຫຼື ບາງໂຄງການ ກະເຮັດໄປໜ້ອຍດຽວ ແລ້ວ ຊອກເງິນມາເຮັດຕໍ່ບໍ່ໄດ້ ກະໂຈະ.

ດັ່ງນັ້ນ ບັນຫາທີແທ້ຈິງ ຂອງການເກີດ ໜີ້ ສາມແຈ ແມ່ນ ຍ້ອນ ທ້າວ ຂ ນັ້ນລະທີ່ ມີເງິນ ບໍ່ພໍໃນເບື້ອງຕົ້ນ. ບວກກັບ ການປະເມີນ ການຊໍາລະ ຂອງ ທ້າວ ກ ໃຫ້ກັບ ທ້າວ ຂ ທີ່ອາດ ຂາດສະພາບຄ່ອງ ດ້ານການເງິນ ກະເລີຍວ່າ ຈ່າຍເງິນບໍ່ທັນ.

ນອກຈາກນີ້,​ ບັນຫາ ໃຫຍ່ຂອງ ໜີ້ສາມແຈ ແມ່ນເວົ້າເຖິງ ມູນຄ່າ ຂອງກິດຈະກຳ ທີ່ສູງເກີນລາຄາ ທົ່ວໄປ. ເວົ້າສັ້ນໆ ແມ່ນໂຄງການນັ້ນແພງເກີນໄປ, ແຕ່ຜົນໄດ້ຮັບແມ່ນຄຸນນະພາບຕໍ່າ. ເຊິ່ງ ມີຄໍາເວົ້າ ທີ່ ທ່ານ ນາຍົກ ທອງລຸນ ສີສຸລິດ ໄດ້ກ່າວວ່າ: Low Profile, High Profit. ກະຄືຊິແມ່ນ ເຮັດຕາມວາດ ພໍ່ແລ້ວ ເພື່ອໃຫ້ໄດ້ກຳໄລຫຼາຍ. ອັນນີ້ ກໍ່ເປັນບັນຫາ.

ສະນັ້ນ, ສິ່ງທີ່ລັດຖະບານ ກຳລັງຈະເລັ່ງແກ້ໄຂບັນຫາ ໜີ້ສາມແຈ ນີ້ແລ້ວ, ກະຕ້ອງໄດ້ ກວດຄືນໂຄງການຕ່າງໆ ທີ່ເຮັດໄປແລ້ວ ຖ້າວ່າ່ໂຄງການໃດ ບໍ່ມີຄຸນນະພາບ ຫຼື ບໍ່ເປັນໄປຕາມ ທີ່ຂຽນໄວ້ໃນສັນຍາ ກະຕ້ອງ ມາວ່່າກັນອີກວ່າມັນເປັນຍ້ອນຫຍັງ.

ນອກຈາກນີ້, ກໍຮຽກຮ້ອງໃຫ້ພາກລັດກວດສອບພະນັກງານ ຂອງລັດເອງ ເພາະ ເປັນຜູ່ທີ່ເຊັ່ນໃຫ້ບັນດາໂຄງການຕ່າງໆຜ່ານ ເວລາເຮັດສຳເລັດ. ກໍ່ຕ້ອງໄດ້ເບິ່ງຄືນ ວ່າ່ໄດ້ມີການກວດກາຄຸນນະພາບແທ້ ບໍ່ ຫຼື ວ່າເຊັນໄປຊື່ໆ ແບບວ່າ: ໄດ້ແລ້ວ ໄດ້ແລ້ວ. ອັນນີ້ກະບໍ່ເປັນໄດ໋.


ໂດຍ: ຮັກລາວ ໂທລະໂຄ່ງ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.