Header Ads

ບໍລິຄຳໄຊ ຫາລືການແກ້ໄຂບັນຫາລົດນຳເຂົ້າທີ່ບໍ່ຖືກຕ້ອງ ຍັງຄ້າງ 503 ຄັນ



ກອງປະຊຸມໄດ້ຈັດຂຶ້ນໃນທີ 14 ພະຈິກ 2017 ຢູ່ຫ້ອງປະຊຸມເບີ 2, ພາຍໃຕ້ການເປັນປະທານຂອງທ່ານ ປອ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີຄະນະຮັບຜິດຊອບ ແກ້ໄຂລົດນໍາເຂົ້າຊື້-ຂາຍບໍ່ຖືກຕ້ອງຂັ້ນແຂວງເຂົ້າຮ່ວມ.
 
ທ່ານ ຄຳແຫວນ ປັນຍານຸວົງ ຫົວໜ້າພະແນກການເງິນແຂວງ ຄະນະຮັບຜິດຊອບແກ້ໄຂລົດນໍາເຂົ້າຊື້-ຂາຍບໍ່ຖືກຕ້ອງຂັ້ນແຂວງ ໄດ້ລາຍງານການແກ້ໄຂພາຫະນະນຳເຂົ້າຊື້-ຂາຍບໍ່ຖືກຕ້ອງທັງໝົດມີ 638 ຄັນ ລົດກະບະ 171 ຄັນ, ຈົດຈິບ 21 ຄັນ, ລົດເກັງ 8 ຄັນ, ລົດຕູ້ 1 ຄັນ ແລະ ລົດຈັກ 437 ຄັນ,ໃນນັ້ນແກ້ໄຂໄດ້ແລ້ວ 135 ຄັນ ເທົ່າກັບ 21,5% ມີລົດກະບະ 30 ຄັນ, ລົດຈິບ 1 ຄັນ, ລົດເກັງ 2 ຄັນ, ລົດຈັກ 102 ຄັນ ເປັນເງິນ 1,521 ຕື້ກວ່າກີບ, ຢຶດພາຫະນະຈຳນວນ 2 ຄັນ ທີ່ມີເລກຈັກ, ເລກຖັງຊໍ້າກັນ, ມີລົດກະບະ 1 ຄັນ ແລະ ລົດຈັກ 1 ຄັນ.
 
ມາຮອດປະຈຸບັນຍັງຄ້າງ 503 ຄັນ, ມີປະເພດລົດໃຫຍ່ 168 ຄັນ, ລົດຈັກ 335 ຄັນ. ໃນນັ້ນ, ຂົງເຂດ ປກສ 275 ຄັນ, ລົດໃຫຍ່ 132 ຄັນ, ລົດຈັກ 143 ຄັນ; ຂົງເຂດ ປກຊ 111 ຄັນ, ລົດໃຫຍ່ 18 ຄັນ, ລົດຈັກ 93 ຄັນ ແລະ ພະແນກການອ້ອມຂ້າງແຂວງ 117 ຄັນ, ລົດໃຫຍ່ 18 ຄັນ ແລະ ລົດຈັກ 99 ຄັນ.
 
ສະນັ້ນເພື່ອສືບຕໍ່ແກ້ໄຂພາຫະນະທີ່ຍັງຄ້າງຈຳນວນດັ່ງກ່າວໃຫ້ສຳເລັດຕາມຄາດໝາຍໃນທ້າຍເດືອນທັນວາ 2017 ນີ້ຄະນະຜູ້ແທນກອງປະຊຸມໄດ້ປະກອບຄຳເຫັນປຶກສາຫາລືຮ່ວມກັນ ໂດຍສະເພາະວິທີການ, ຂັ້ນຕອນ, ຄວາມອາດສາມາດໃນການສຳລະສາງ, ການຈັດຕັ້ງປະຕິບັດດ້ວຍເຫດ ແລະ ຜົນ ໂດຍອີງໃສ່ນິຕິກຳຂອງຂັ້ນເທິງ, ທັ້ງນີ້ກໍເພື່ອເປັນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດໃຫ້ປະກົດຜົນເປັນຈິງ.

ແຫຼ່ງຂ່າວ: ເສດຖະກິດ-ການຄ້າ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.