Header Ads

ກໍ່ເຫດລັກຊັບຖືກ ປກສ ບ້ານຈັບສົ່ງກອງຄະດີ



ກໍາລັງປ້ອງກັນຄວາມສະຫງົບບ້ານ ແມ່ນກໍາລັງວິຊາສະເພາະໜຶ່ງເຮັດໜ້າທີ່ຮັກສາຄວາມເປັນລະບຽບຮຽບຮ້ອຍ ແລະ ແກ້ໄຂປະກົດການຫຍໍ້ທໍ້ທີ່ເກີດຂື້ນພາຍໃນບ້ານຢ່າງທັນການ ເພື່ອເຮັດໃຫ້ບ້ານມີຄວາມສະຫງົບ. ເຊິ່ງຜ່ານ ມາກໍາລັງດັ່ງກ່າວສາມາດແກ້ໄຂຄະດີໄດ້ຫຼາຍລາຍ ແລະ ກັກຕົວຜູ້ຖືກຫາມາຫຼາຍຄົນ ລວມທັງຄະດີໃນວັນທີ 2 ພະ ຈິກ 2017 ເຈົ້າໜ້າທີ່ ປກສ ກຸ່ມຫົວຊຽງ ເມືອງໄຊເສດຖາ ໄດ້ຮັບແຈ້ງຄວາມຈາກຜູ້ຖືກເສຍຫາຍຢູ່ບ້ານຫົວຊຽງ ວ່າ: ມີຄົນຮ້າຍລັກລົກຈັກ. ຈາກນັ້ນ, ໄດ້ນໍາກໍາລັງອອກກວດກາຈຸດເກີດເຫດ. ຜ່ານການຕິດຕາມຢູ່ເຂດສະຖານ ທີ່ດັ່ງກ່າວ ພົບເຫັນຜູ້ກໍ່ເຫດ 1 ຄົນ ທີ່ກໍາລັງຈູງລົດໄປຕາມແຄມທາງ. ຈາກນັ້ນ. ຈຶ່ງໄດ້ກັກຕົວ ທ້າວ ຄໍາພູວຽງ ຫຼື ອື່ງ ຢູ່ບ້ານບຶງຂະຫຍອງ  ນະຄອນຫຼວງວຽງຈັນ ພ້ອມກັບລົດຈັກ ສົ່ງໃຫ້ກອງຄະກີເມືອງ. ມາວັນທີ 5 ພະຈິກ 2017 ເຈົ້າໜ້າທີ່ສຶບສວນ-ສອບສວນ ເມືອງໄຊທານີ ກໍ່ຕິດຕາມກັກຕົວຜູ້ຮ່ວມຂະບວນການໄດ້ຢູ່ເຂດບ້ານໂຄກສະຫວ່າງ ເມືອງໄຊທານີ ອີກ 1 ຄົນຊື່ທ້າວ ແກ້ວດວງໃຈ ຫຼື ເລີ້ ອາຍຸ 31 ປີ ຢູ່ບ້ານດອນກອຍ ເມືອງໄຊເສດຖາ ນະຄອນຫຼວງ ວຽງຈັນ ແລ້ວນໍາສົ່ງໃຫ້ກອງບັນຊາກອງດໍາເນີນຄະດີຂັ້ນຕໍ່ໄປ.


ເຈົ້າໜ້າທີ່ ປກສ ເມືອງໄຊທານີ ໄດ້ເປີດເຜີຍໃຫ້ຮູ້ວ່າ: ຜ່ານການສອບສວນ ທ້າວ ຄໍາພູວຽງ ສາລະພາບວ່າ: ຜູ້ກ່ຽວ ໄດ້ກໍເຫດລັກລົດຈັກຂອງປະຊາຊົນຢູ່ບ້ານຫົວຊຽງແທ້. ເຊິ່ງໄດ້ຮ່ວມກັບທ້າວ ແກ້ວດວງໃຈ, ແຕ່ກໍ່ຖືກຈັບຕົວກ່ອນ. ນອກນີ້, ຍັງໄດ້ຮ່ວມກັນເຄື່ອນໄຫວລັກລົດຈັກກັບ​ ທ້າວ ເສັງ ແລະ ທ້າວ ທະວີ ຈໍານວນ 2-3 ຄັ້ງ ໄດ້ລົດຈັກ 3 ຄັນ ຄື: ໃນວັນທີ 27 ຕຸລາ 2017 ເວລາປະມານ 20:00 ໂມງ ຜູ້ກ່ຽວໄດ້ຮ່ວມກັບທ້າວ ແກ້ວດວງໃຈ ພາກັນໄປລັກເອົາ ລົດຈັກເວບ 100 ສີເທົາ ຢູ່ເຂດບ້ານໄຮຄໍາ ເມືອງໄຊເຊດຖາ ນະຄອນຫຼວງວຽງຈັນ. ຈາກນັ້ນ, ກໍນໍາເອົາລົດຈັກຄັນ ດັ່ງກ່າວໄປໃຫ້ທ້າວ ທະວີ ໄປຂາຍຕໍ່ໄດ້ເງິນ 2.500.000 ກີບ; ມາວັນທີ 28 ຕຸລາ 2017 ເວລາປະມານ 16:00 ໂມງ ຜູ້ກ່ຽວໄດ້ຮ່ວມກັບທ້າວ ແກ້ວດວງໃຈ ໄປລັກເອົາລົດຈັກເວບ 100 ສີຂຽວດໍາ ຢູ່ເຂດທາງ 450 ປີ ຢູ່ເຂດບ້ານ ໂຊກໃຫຍ່ ເມືອງໄຊເສດຖາ ນະຄອນຫຼວງວຽງຈັນ. ແລ້ວນໍາລົດຈັກໄປໃຫ້ທ້າວ ທະວີ ໄປຂາຍ ແລະ ຕົກມາວັນທີ 2 ພະຈີກ 2017 ຜູ້ກ່ຽວໄດ້ຮ່ວມກັບທ້າວ ແກ້ວດວງໃຈ ໄປຊອກຫາລັກລົດຈັກເຂດບ້ານຫົວຊຽງ ເມືອງໄຊເສດຖາ ພໍໄປຮອດໄດ້ເຫັນລົດຈັກເວບ 100 ສີແດງດໍາ ຈອດຢູ່ແຄມທາງ ຈຶ່ງໄດ້ພາກັນລັກເອົາລົດຄັນດັ່ງກ່າວ ແຕ່ຕິດລົດ ຈັກບໍ່ໄດ້ຈຶ່ງພາກັນຈູງເຂົ້າໄປໃນປ່າໄປປະມານ 50 ແມັດ. ຫຼັງຈາກນັ້ນ, ໄດ້ໃຫ້ທ້າວ ແກ້ວດວງໃຈ ຂີ່ລົດໄປນໍາທ້າວ ເສັງ ແລະ ທ້າວ ທະວີ ມາຢັນເອົາລົດຄັນດັ່ງກ່າວ. ພໍໄດ້ປະມານ 30 ນາທີ ກໍໄດ້ມີເຈົ້າຂອງລົດ ແລະ ເຈົ້າໜ້າທີ່ ປກສ ກຸ່ມບ້ານ ຫົວຊຽງ ມາພົບຈຶ່ງໄດ້ກັກຕົວແລ້ວສົ່ງໃຫ້ຄະດີເມືອງ. ນອກນີ້, ຜູ້ກ່ຽວຍັງສາລະພາບອີກວ່າ: ເງິນທີ່ໄດ້ ຈາກການເຄື່ອນໄຫວລັກຊັບແຕ່ລະຄັ້ງແມ່ນພາກັນເອົາໄປຊື້ຢາບ້າມາເສບ ແລະ ທ້າວ ຄໍາພູວຽງ ຍັງຕົກເປັນທາດ ຂອງຢາເສບຕິດແຕ່ປີ 2015 ເປັນຕົ້ນມາ, ເສບມື້ລະ 2-3 ເມັດ ຢາບ້າທີ່ນໍາມາເສບແມ່ນຊື້ນໍາໄວລຸ້ນພາຍໃນບ້ານ, ສ່ວນເງິນທີ່ນໍາໄປຊື້ຢາບ້າມາເສບແມ່ນອາໄສຮັບຈ້າງເປັນກໍາມະກອນ ແຕ່ມືໃດບໍ່ມີເງິນກໍຊອກຫາລັກຊັບ.
ທ້າວ ແກ້ວດວງໃຈ ສາລະພາບວ່າ: ຜູ້ກ່ຽວໄດ້ເລີ່ມເສບຢາບ້າມາແຕ່ 2015 ເປັນຕົ້ນມາ, ເສບມື້ລະ 2-4 ເມັດ ຢາບ້າທີ່ນໍາມາເສບແມ່ນຊື້ນໍາໄວລຸ້ນພາຍໃນບ້ານ, ສ່ວນເງິນທີ່ນໍາໄປຊື້ຢາບ້າມາເສບແຕ່ລະຄັ້ງແມ່ນຊອກຫາຮັບ ຈ້າງເປັນກໍາມະກ່ອນກໍ່ສ້າງທົ່ວໄປ. ມາຮອດເດືອນຕຸລາ 2017 ຜູ້ກ່ຽວຢຸດເຊົາເຮັດວຽກຈຶ່ງບໍ່ມີເງິນຊື້ຢາບ້າ ແຕ່ໝູ່ ຊື້ທ້າວ ຄໍາພູວຽງ ໄດ້ຊັກຊວນໄປຊອກຫາລັກຊັບຂອງພົນລະເມືອງ ຈຶ່ງໄດ້ຕົກລົງຮ່ວມຊອກເຄື່ອນໄຫວລັກລົດຈັກ, ເຊິ່ງໄດ້ລັກລົດຈັກສໍາເລັດມາແລ້ວ ຈໍານວນ 3 ຄັ້ງ ໄດ້ລົດ 3 ຄັນ ພາຍຫຼັງລັກມາແລ້ວ ກໍນໍາໄປໃຫ້ທ້າວ ທະວີ ແລະ ທ້າວ ເສັ່ງ ນໍາໄປຂາຍ. ມາຄັ້ງຫຼ້້າສຸດໃນວັນທີ 2 ພະຈິກ 2017 ຜູ້ກ່ຽວໄດ້ຮ່ວມກັບທ້າວ ຄໍາພູວຽງ ໄປຫາລັກລົດຈັກ ເວບ 100 ສີແດງດໍາ ຢູ່ເຂດບ້ານຫົວຊຽງ. ພາຍຫຼັງລັກມາແລ້ວ ກໍຈູງໄປຊຸກເຊື່ອງໄວໃນປ່າ ແລ້ວໃຫ້ທ້າວ ຄໍາພູວຽງ ເບິ່ງລົດເພາະລົດຕິດຈັກບໍ່ໄດ້ ສ່ວນຜູ້ກ່ຽວແມ່ນໄປນໍາເອົາທ້າວ ທະວີ ແລະ ທ້າວ ເສັງ ມາຢັນເອົາລົດຈັດຄັນດັ່ງກ່າວ ພໍກັບມາໄດ້ຮູ້ວ່າທ້າວ ຄໍາພູວຽງ ໄດ້ຖືກກັກຕົວ ຈຶ່ງໄດ້ເອົາຕົວຫຼົບໜີ. ຈາກນັ້ນ, ມາວັນທີ 5 ພະຈິກ 2017 ຜູ້ກ່ຽວ ຈຶ່ງຖືກເຈົ້າໜ້າທີ່ກັກຕົວມາດໍາເນີນຄະດີ.
ສ່ວນທ້າວ ເສັງ ແລະ ທ້າວ ທະວີ ເຈົ້າໜ້າທີ່ ປກສ ເມືອງໄຊທານີ ກໍາລັງເລັ່ງຕິດຕາມຈັບຕົວມາດໍາເນີນຄະດີຕາມ ກົດໝາຍ. ຈາກນັ້ນ, ມາໃນວັນທີ 24 ພະຈິກ 2017 ເຈົ້າໜ້າທີ່ ປກສ ເມືອງໄຊທານີ ໄດ້ນໍາລົດຈັກເວບ 100 ຈໍານວນ 3 ຄັນ ທີ່ເກັບກູ້ມາໄດ້ຈາກຄະດີດັ່ງກ່າວນໍາມາມອບຄືນເຈົ້າຂອງເດີມ, ກ່າວມອບໂດຍ ພັຕ ພຸດທະວົງ ອິນຍະວົງ ຮອງກອງບັນຊາການ ປກສ ເມືອງໄຊທານີ.
ພາບ ແລະ ຂ່າວ: ນສພ ສະຫງົບ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.