Header Ads

ບ້ານ ບີໝີ ເມືອງເງິນ ແຂວງໄຊຍະບູລີ ເປັນບ້ານທຳອິດຂອງເມືອງ ໃນການປະຕິບັດ ທິດນຳ 3 ສ້າງ



ໂດຍປະຕິບັດຕາມ ມະຕິຂອງ ກົມການເມືອງສູນກາງພັກ ສະບັບເລກທີ 25, ຄຳສັ່ງຂອງນາຍົກລັດຖະມົນຕີ ສະບັບເລກທີ 34 ແລະ ຄຳສັ່ງແນະນຳຂອງທ່ານ ເຈົ້າແຂວງ ໄຊຍະບູລີ ສະບັບເລກທີ 198 ວ່າດ້ວຍການສືບຕໍ່ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານໃຫ້ເປັນຫົວໜ່ວຍພັດທະນາ.


ມາໃນຕອນເຊົ້າຂອງວັນທີ 31 ຕຸລາ 2017 ນີ້ ຢູ່ທີຫໍປະຊຸມບ້ານບີໝີ ເມືອງເງິນ ແຂວງ ໄຊຍະບູລີ ໄດ້ຈັດກອງປະຊຸມ ປະກາດຮັບຮອງເອົາບ້ານບີໝີ ເປັນບ້ານປະຕິບັດທິດນຳ 3  ສ້າງ ຂື້ນຢ່າງເປັນທາງການ. ເຂົ້າຮ່ວມເປັນກຽດ ມີທ່ານ ບຸນມີ ຈັນທິບ ກຳມະການພັກແຂວງ ເລຂາ ພັກເມືອງ ເຈົ້າເມືອງໆເງິນ, ມີທ່ານ ນ້ອຍຄຳເນນ ຈັນຖາວອນ ກຳມະການພັກເມືອງ ເລຂາ ໜ່ວຍພັກ ນາຍບ້ານໆບີໝີ, ມີຕາງໜ້າການນຳຂອງແຂວງ, ມີຫົວໜ້າຄະນະຮັບຜິດຊອບວຽກງານ 3 ສ້າງຂອງເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ເລຂາ ໜ່ວຍພັກ ນາຍບ້ານເທດສະບານ, ການຈັດຕັ້ງບ້ານ, ນັກທຸລະກິດ ແລະ ປະຊາຊົນພາຍໃນບ້ານເຂົ້າຮ່ວມ.





ການປະກາດຮັບຮອງເອົາບ້ານບີໜີ ເປັນບ້ານປະຕິບັດທິດນຳ 3 ສ້າງຄັ້ງນີ້ ທ່ານ ນ້ອຍຄຳເນນ ຈັນຖາວອນ ກຳມະການພັກເມືອງ ເລຂາໜ່ວຍພັກ ນາຍບ້ານໆບີໝີ ກໍ່ໄດ້ຂື້ນກ່າວເປີດກອງປະຊຸມ  ພ້ອມທັງຜ່ານບົດສະຫຼຸບ 9 ເດືອນ ແລະ ແຜນພັດທະນາເສດຖະກິດ-ສັງຄົມ ແຕ່ນີ້ຮອດປີ 2020. ບ້ານບີໝີ ປະກອບມີ 224 ຄອບຄົວ, ມີ 16 ໜ່ວຍຄຸ້ມຄອງພົນລະເມືອງ ມີພົນລະເມືອງທັງໝົດ 947 ຄົນ, ຍິງ 468 ຄົນ.ໄລຍະຜ່ານມາ ຄະນະພັກອົງການປົກຄອງເມືອງ ໄດ້ສົມທົບກັບ ຂະແໜ ຂອງບ້ານ ເພື່ອສຶກສາອົບຮົມການເມືອງ-ແນວຄິດ ໃຫ້ຄະນະພັກ, ອົງການປົກຄອງບ້ານ ແລະ ປະຊາຊົນພາຍໃນບ້ານ ໃຫ້ມີສະຕິຕໍ່ການຈັດຕັ້ງ ມີຄວາມຮັບຜິດຊອບຕໍ່ໜ້າທີວຽກງານຂອງບ້ານ, ເປັນເຈົ້າການໃນການສ້າງສາພັດທະນາຄອບຄົວ, ມີຄວາມສາມັກຄີ, ຮັກແພງຊ່ວຍເຫຼືອເຊີ່ງກັນ ແລະ ກັນ ເພື່ອແນໃສ່ເຮັດໃຫ້ການຈັດຕັ້ງບ້ານມີຄວາມເຂັ້ມແຂງຮອບດ້ານ.

    ສະແດງອອກ ບ້ານ ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ເສດຖະກິດຂະຫຍາຍຕົວຢ່າງຕໍ່ເນື່ອງ ລວມຍອດມູນຄ່າລາຍຮັບຈາກການຜະລິດບັນລຸໄດ້ 14.677.784.000 ກີບ. ສະເລ່ຍໃສ່ຫົວຄົນ 15.499.000 ກີບ/ຄົນ/ປີ. ເທົ່າກັບ 1.937 ໂດລາ. ທຽບໃສ່ປີຜ່ານມາ ເພີ່ມຂື້ນ 134 ໂດລາ. ກອງທືນພັດທະນາບ້ານໄດ້ມີການເຕີບໃຫຍ່ ແລະ ຂະຫຍາຍຕົວຢ່າງກ້ວາງຂວາງ ປະຈຸບັນ ມີສະມາຊິກກອງທືນທັງໝົດ 457 ຄົນ, ມີເງິນຝາກທັງໝົດ 3.148 ລ້ານກີບ.

ພາຍຫຼັງສຳເລັດບ້ານດັ່ງກ່າວ ຄະນະຮັບຜິດຊອບວຽກງານ 3 ສ້າງຂອງເມືອງ ຈະໄດ້ພ້ອມກັນສືບຕໍ່ລົງຈັດຕັ້ງປະຕິບັດ ທິດນຳ 3 ສ້າງຢູ່ບ້ານ ນາງົວ ແລະ ບ້ານທອງ ຕື່ມອີກ.
ໂດຍ: ອິນແປງ ແຫວນຄຳ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.