Header Ads

ເຈົ້າໜ້າທີ່ເຜີຍ ຂໍ້ມູນການສັນນະສູດສົບເດັກນ້ອຍ 3 ຄົນທີ່ເສຍຊີວິດ!



ລາຍງານຈາກ ໜັງສືພິມຄວາມສະຫງົບ ໃນວັນທີ 8 ພະຈິກ 2017 ໃຫ້ຮູ້ກ່ຽວກັບການສັນນະສູດ ສົບເດັກນ້ອຍ 3​ ຄົນ ທີ່ເປັນຂ່າວດັງ ໃນທ້າຍເດືອນ ຕຸລາ 2017 ຜ່ານມາວ່າ.

ຕາມການໃຫ້ຂໍ້ມູນຂອງ ພັຕ ແສງເພັດ ສຸທຳມະວົງ ຮອງຫົວໜ້າພະແນກຕຳຫຼວດສືບສວນ-ສອບສວນ ປກສ ແຂວງວຽງຈັນ ໄດ້ເປີດເຜີຍຄວາມຄືບໜ້າຕໍ່ໜັງສືພີມຄວາມສະຫງົບ ໃນວັນທີ 7 ພະຈິກ 2017 ວ່າ: ເດັກທັງສາມຄົນເສຍຊີວິດຍ້ອນທາດເບື່ອແທ້ ແຕ່ຍັງບໍ່ພົບວ່າເປັນທາດເບື່ອຊະນິດໃດ. ເຊິ່ງຕາມການສັນນະສູດຕົວຈິງ ການເສຍຊີວິດຂອງເດັກນ້ອຍທັງສາມຄົນນັ້ນ ອາການເບື້ອງນອກມີຮ່ອງຮອຍເລັບມືກໍ່າຊໍ້າທັງສອງຂ້າງ, ຮິມສົບກໍ່າ ສ່ວນຮ່າງກາຍແມ່ນບໍ່ພົບເຫັນຮ່ອງຮອຍບາດແຜ ຫຼື ບວມຊໍ້າໃດໆ. ສໍາລັບຜົນພິສູດຂອງກົມຕໍາຫຼວດນິຕິວິທະຍາ ກະຊວງ ປກສ ຢູ່ເຮືອນຂອງເດັກທັງສາມຄົນໃນເບື້ອງຕົ້ນ ພົບວ່າ: ຢູ່ອະໄວຍະວະພາຍໃນພົບເຫັນ ປອດເປັນສີມ່ວງ, ຫົວໃຈແຮ່ວແວບເປັນສີບົວອ່ອນ, ແຕ່ດ້ານໃນຫົວໃຈເລືອດບໍ່ກ້າມຕົວ, ຕັບ, ມ້າມ, ໝາກໄຂ່ຫຼັງ ແລະ ກະເພາະອາຫານ ມີລັກສະນະເປັນສີບົວ. 


ນອກນີ້, ຄະນະແພດປະຈໍາໂຮງໜໍເມືອງໝື່ນ ແຂວງວຽງຈັນ ກໍໄດ້ໄປພິສູດເຊັ່ນກັນ ຕາມຜົນການກວດເອກະສານສະບັບເລກທີ 196,197,198/ສທມ,ໝ ລົງວັນທີ 26 ຕຸລາ 2017 ແມ່ນເສຍຊີວິດຍ້ອນທາດເບື່ອ ແຕ່ຍັງບໍ່ຮູ້ວ່າເປັນສານຜິດຊະນິດໃດ. ປັດຈຸບັນ, ເຈົ້າໜ້າທີ່ຕໍາຫຼວດ ປກສ ແຂວງວຽງຈັນ ສົມທົບກັບກົມຕໍາຫຼວດນິຕິວິທະຍາ ກໍາລັງສືບຕໍ່ພິສູດຫາສານຜິດດັ່ງກ່າວ ຄາດວ່າຈະຮູ້ຜົນໃນໄວໆນີ້. ສ່ວນຜູ້ເປັນພໍ່ຂອງເດັກທັງສາມຄົນ ທີ່ຂ່າວລືວ່າ: ຕໍາຫຼວດຈັບຕົວແລ້ວແມ່ນບໍ່ມີຄວາມຈິງ, ເຈົ້າໜ້າທີ່ຕໍາຫຼວດຍັງບໍ່ໄດ້ຄວບຄຸມຕົວ ເຊິ່ງລໍຖ້າແຕ່ຜົນພິສູດຫາສານຜິດເທົ່ານັ້ນ ວ່າເກີດມາຈາກໃສແທ້.

ເຈົ້າໜ້າທີ່ສືບສວນ-ສອບສວນ ປກສ ແຂວງວຽງຈັນ ໃຫ້ຮູ້ວ່າ: ເຫດການດັ່ງກ່າວນີ້, ໃນເບື້ອງຕົນ ໃນວັນທີ 24 ຕຸລາ 2017 ພໍ່ຂອງເດັກທັງສາມຄົນ ຊື່ທ້າວ ຟືວ່າງ ອາຍຸ 32 ປີ ຢູ່ບ້ານປ່າໄຜ ເມືອງໝື່ນ ແຂວງວຽງຈັນ ໄດ້ເດີ່ນທາງໄປນະຄອນຫຼວງວຽງຈັນ ເພື່ອໄປຂັບລົດຈົກຢູ່ນຳທ້າວ ລໍ່ ອາຍຸ 50 ປີ ຢູ່ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ແຕ່ຍັງບໍ່ທັນໄດ້ເຮັດວຽກ. 


ມື້ຕໍ່ມາຜູ້ກ່ຽວຈຶ່ງອອກໄປຫຼິ້ນຕະຫຼາດເຊົ້າ ແລ້ວໄດ້ຈ້າງລົດໂດຍສານກັບບ້ານ ເມື່ອມາຮອດຕະຫຼາດສີໄຄ ຈຶ່ງບອກໃຫ້ໂສເຟີຈອດລົດເພື່ອຊື້ເຂົ້າຈີ່ປາເຕ້ ກ້ອນລະ 5.000 ກີບ ຈຳນວນ 1 ກ້ອນ, ແຕ່ຍັງບໍ່ທັນໄດ້ກິນ ເພາະໃນລົດໂດຍສານຄົນຫຼາຍ ຈຶ່ງເກັບຮັກສາໄວ້ໃນກະເປົາເຄື່ອງ, ພໍມາຮອດບ້ານໃນເວລາ 16:00 ໂມງ ໄດ້ວາງກະເປົາໄວ້ ແລ້ວໄປອຸ້ມເອົາລູກຊາຍ ອາຍຸ 6 ເດືອນ. ຈາກນັ້ນ, ລູກສາວກົກຊື່ ນາງ ແກ້ວຢ່າງ ອາຍຸ 8 ປີ ໄດ້ໄປຄົ້ນກະເປົາເຄື່ອງຂອງພໍ່ ເຫັນເຂົ້າຈີ່ປາເຕ້ ແລ້ວເອົາໄປໃຫ້ແມ່ ຊື່ ນາງ ນູວ່າງ ອາຍຸ 24 ປີ ທີ່ກຳລັງແຕ່ງກິນຢູ່ເຮືອນຄົວ, ສ່ວນຜູ້ເປັນແມ່ແມ່ນໄດ້ແບ່ງເຂົ້າຈີ່ ເປັນສາມສ່ວນໃຫ້ ນາງ ແກ້ວຢ່າງ, ນາງ ນີຢ່າງ ອາຍຸ 5 ປີ ແລະ ນາງ ຫຼ້ານ້ອຍຢ່າງ ອາຍຸ 3 ປີ, ພາຍຫຼັງລູກທັງສາມໄດ້ກິນເຂົ້າຈີ່ໝົດແລ້ວ ຈຶ່ງພາກັນກິນເຂົ້າຮ່ວມກັນອີກ. ຈາກນັ້ນ, ສອງຜົວເມຍໄດ້ພາກັນໄປອາບນໍ້າຢູ່ຫ່າງຈາກເຮືອນປະມານ 25 ແມັດ, ໃນຂະນະນັ້ນ ຜູ້ເປັນແມ່ກັບຄືນມາເອົາສະບູຢູ່ເຮືອນ ພົບເຫັນລູກທັງສາມຄົນນອນໝົດສະຕິຢູ່ກາງເຮືອນ ຫ່າງກັນປະມານຄົນລະແມັດ ແລະ ມີຟອດສີຂາວໄຫຼອອກຈາກປາກ ຈຶ່ງໄດ້ຮ້ອງໃຫ້ຜົວມາຊ່ວຍນຳສົ່ງໂຮງໝໍເມືອງໝື່ນ ເມື່ອໄປຮອດ ນາງ ແກ້ວຢ່າງ ໄດ້ເສຍຊີວິດແລ້ວ, ອີກສອງຄົນແມ່ນຍັງຫາຍໃຈຢູ່ ແລະ ເສຍຊີວິດໃນເວລາຕໍ່ມາ.

ຂ່າວ: ໜັງສືພິມຄວາມສະຫງົບ


ຂ່າວກ່ອນໜ້ານີ້





ຈາກເຫດການສະເທືອນໃຈ ໃນທ້າຍເດືອນ ຕຸລາ 2017 ຜ່ານມາ ທີ່ມີເດັກນ້ອຍ ເສຍຊີວິດ ພ້ອມກັນ 3 ຄົນ ໃນເວລາປະມານ 18:00 ວັນທີ 25 ຕຸລາ 2017 ທີ່ບ້ານນາປ່າໄຜ່, ເມືອງໝື່ນແຂວງວຽງຈັນ. 

ເຊິ່ງສາເຫດ ທີ່ເຮັດໃຫ້ເດັກນ້ອຍເສຍຊີວິດ ກໍ່ຍັງບໍ່ທັນມີການສະຫຼຸບ ເປັນທາງການຈາກເຈົ້າໜ້າທີ່ກ່ຽວຂ້ອງ. ຮູ້ພຽງແຕ່ວ່າ ກ່ອນເສຍຊີວິດ ເດັກນ້ອຍ ໄດ້ພາກັນ ກິນເຂົ້າຈີ່ ທີ່ພໍ່ຊື່ມາແຕ່ວຽງຈັນ.

ເຫດການດັ່ງກ່າວ ໄດ້ເກີດການວິພາກວິຈານ ກັນໃນສື່ອ່ອນລາຍ ຢ່າງກວ້າງຂວາງ. ເຊິ່ງປະເດັນສຳຄັນ ແມ່ນເກີດມີການ ອອກຂ່າວວ່າ ເຈົ້າໜ້າທີ່ສືບສວນ ວ່າພໍ່ເປັນຄົນທີ່ຈະວາງຢາຂ້າເມຍເພື່ອເອົາເມຍນ້ອຍ, ແຕ່ໂຊກຮ້າຍ ລູກພັດກິນເຂົ້າຈີ່. ຂ່າວດັ່ງກ່າວ ແມ່ນຖືກສ້າງຂຶ້ນ ໂດຍບໍ່ມີຂໍ້ມູນທີ່ຖືກຕ້ອງ ແລະ ເຈົ້າໜ້າທີ່ກໍ່ບໍ່ທັນມີການລາຍງານດັ່ງກ່າວ. 

ຈາກຂ່າວອັນບໍ່ຖືກຕ້ອງນັ້ນ, ກ່ອນໜ້ານີ້ ທີມງານ ລາວ ອັບເດດ ກໍ່ໄດ້ ມີການຕິດຕາມຂໍ້ມູນ ແລະ ໄດ້ຮັບການຢືນຢັນຈາກເມຍ ວ່າເປັນໄປບໍ່ໄດ້ ທີ່ຜົວຈະຄິດແບບນັ້ນ ເພາະຄອບຄົວກະທຸກຍາກແບບນີ້ ຊິເອົາຫຍັງໄປເມຍນ້ອຍ ແລະ ຜົວກໍ່ຮັກລູກຮັກເມຍ ບໍ່ໄດ້ມີແນວຜິດໃຈກັນ.

ພາຍຫຼັງທີ່ເຈົ້າໜ້າທີ່ໄດ້ມີການສັນນະສູດເດັກທັງສາມ ແລະ ທາງຄອບຄົວ ໄດ້ທຳພິທີທາງສາສະໜາ ສົງສະການແລ້ວ ໃນວັນທີ 4 ພະຈິກ 2017 ຜ່ານມາ.​ທາງຜູ່ເປັນພໍ່ ແລະ ພີ່ນ້ອງ ຈິ່ງໄດ້ ອັດຄລິບ ເພື່ອຊີ້ແຈງຄວາມບໍລິສັດໃຈ ຂອງຜູ່ເປັນພໍ່ວ່າບໍ່ໄດ້ ກະທຳວາງຢາຂ້າເມຍ ຄືດັ່ງທີ່ຂ່າວດັ່ງກ່າວ.

ຊົມຄລິບຂ້າງລຸ່ມ.


ສ່ວນການສະຫຼຸບ ສາເຫດການຕາຍນັ້ນ ກໍ່ຍັງບໍ່ທັນໄດ້ມີການລາຍງານອອກມາ, ເຊິ່ງກໍ່ຄົງຈະມີການຊີ້ແຈງຈາກທາງເຈົ້າໜ້າທີ່ ໃນໄວໆນີ້.




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





No comments

Powered by Blogger.