Header Ads

ລັດຖະມົນຕີ ກະຊວງການຕ່າງປະເທດ ຕ້ອນຮັບ ການເຂົ້າຢ້ຽມຂໍ່ານັບ ຂອງບັນດາທູດ ປະເທດສະມາຊິກ ສະຫະພາບເອີຣົບ




ໃນ​ວັນ​ທີ 8 ພະຈິກ 2017, ທີ່ ກະ​ຊວງ​ການ​ຕ່າງ​ປະ​ເທດ, ທ່ານ ສະ​ເຫລີມ​ໄຊ ກົມ​ມະ​ສິດ ລັດ​ຖະ​ມົນ​ຕີ​​ ກະ​ຊວງ​ການ​ຕ່າງ​ປະ​ເທດ ​ແຫ່ງ ສປປ ລາວ, ໄດ້​ຕ້ອນ​ຮັບ​ການ​ເຂົ້າ​ຢ້ຽມ​ ຂໍ່ານັບຂອງບັນດາທູດ ປະເທດສະມາຊິກ ສະຫະພາບເອີຣົບ, ​ເຊິ່ງນໍາໂດຍທ່ານ ລີອົງ ໂປນ ຟາແບກ (Leon Paul Faber), ເອກອັກຄະລັດຖະທູດ ແຫ່ງ ສະຫະພາບເອີຣົບ ປະຈຳ ສປປ ລາວ, ພ້ອມດ້ວຍບັນດາ ເອກອັກຄະລັດຖະທູດ ປະເທດສະມາຊິກ ສະຫະພາບເອີຣົບ ປະຈຳ ສປປ ລາວ ທີ່ບໍ່ມີສຳນັກງານຕັ້ງຢູ່ ສປປ ລາວ.

ໃນ​ໂອ​ກາດ​ດັ່ງ​ກ່າວ, ທ່ານລັດ​ຖະ​ມົນ​ຕີ​​ ໄດ້​ສະ​ແດງ​ ຄວາມ​ຍິນ​ດີ​ຕ້ອນຮັບ ​ຄະນະຜູ້​ແທນ ຢ່າງອົບ​ອຸ່ນ ແລະ ຕີ​ລາ​ຄາ​ສູງ​ ຕໍ່ການ​ພົ​ວ​ພັນ​ຮ່ວມ​ມືສອງ​ຝ່າຍ, ​ເຊິ່ງໃນ​ນັ້ນ ທ່ານ​ລັດ​ຖະ​ມົນ​ຕີ​ ​ໄດ້ສະ​ແດງ​ຄວາມຂອບ​ໃຈ​ຢ່າງ​ສູງ​ ຕໍ່​​ການ​ສະ​ໜັບ​ສະ​ໜູນ, ຊ່ວຍ​ເຫລືອ​ຂອງ​ປະ​ຊາ​ຊົນ ແລະ ລັດ​ຖະ​ບານ ສະ​ຫະ​ພາບເອີ​ຣົບ ເຂົ້າ​ໃນ​ການ​ພັດ​ທະ​ນາ​ ເສດ​ຖະ​ກິດ-ສັງ​ຄົມ ຂອງ ສ​ປ​ປ​ ລາວ ໃນ​ໄລ​ຍະ​ຜ່ານ​ມາ, ​ເຊິ່ງ​ເປັນການ​ ປະ​ກອບ​ສ່ວນ​ອັນ​ສຳຄັນ​ ເຮັດ​ໃຫ້ ສປ ລາວ ມີ​ຜົນສຳ​ເລັດ​ ໃນ​ການຈັດ​ຕັ້ງ​ປະຕິບັດ​ ເປົ້າ​ໝາຍ​ສະຫັດ​ສະຫວັດ​ ຂອງອົງການ ສະຫະ​ປະຊາ​ຊາດ ​ແລະ ນຳ​ເອົາ​ປະ​ເທດຊາດ ອອກ​ຈາ​ກຄວາມທຸກ​ຍາກ ​ແລະ ດ້ອຍ​ພັດທະນາ​ ໃຫ້ດີຂຶ້ນເທື່ອ​ລະ​ກ້າວ.

ທ່ານທູດ  ລີອົງ ໂປນ ຟາແບກ ຕາງໜ້າບັນດາທູດ ສະຫະພາບເອີຣົບ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບ ອັນອົບອຸ່ນ ຂອງທ່ານ ລັດ​ຖະ​ມົນ​ຕີ​​ ກະ​ຊວງ​ການ​ຕ່າງ​ປະ​ເທດ ແລະ ໄດ້ແຈ້ງໃຫ້ຊາບວ່າ ໃນການຢ້ຽມຢາມຄັ້ງນີ້, ໄດ້ສ້າງໂອກາດ ໃຫ້ບັນດາທູດສະຫະພາບເອີຣົບ ໄດ້ເຫັນສະພາບການຕົວຈິງ ຂອງການສ້າງສາພັດທະນາ ເສດຖະກິດ-ສັງຄົມ ຢູ່ລາວ ແລະ ເພື່ອຮັບຊາບ ນະໂຍບາຍ ແລະ ວິໄສທັດຂອງ ສປປ ລາວ ໃນການສ້າງສາພັດທະນາ ເສດຖະກິດ-ສັງຄົມ ຂອງລາວ ໃນໄລຍະໃໝ່.

ໃນໂອກາດຢ້ຽມຢາມ ສປປ ລາວ ຄັ້ງນີ້, ສອງຝ່າຍ ລາວ-ອີຢູ ຍັງປຶກ​ສາ​ຫາ​ລື ​ແລກປ່ຽນຄຳຄິດຄຳເຫັນ ກ່ຽວ​ກັບການພົວພັນຮ່ວມມື ໃນໄລຍະຜ່ານມາ ແລະ ທິດ​ທາງໃນ​ການ​ສືບ​ຕໍ່ ເສີມ​ຂະ​ຫ​ຍາຍ​ການ​ພົວ​ພັນ​ຮ່ວມ​ມື ສອງຝ່າຍ​ໃນ​ຕໍ່​ໜ້າ ເພື່ອແນໃສ່ການ​ເສີມຂະ​ຫ​ຍາ​ຍ ​ການ​ພົວ​ພັນຮ່ວມ​ມື ລະ​ຫວ່າງ​ ສປປ ລາວ ແລະ ສະຫະພາບເອີຣົບ ​ໃຫ້​ນັບມື້​ນັບ​ມີ​ປະ​ສິດທິ​ຜົນຍິ່ງຂຶ້ນ.

ໃນໄລຍະຜ່ານມາ, ສະຫະພາບເອີຣົບ ໄດ້ໃຫ້ການຊ່ວຍເຫລືອ ເພື່ອການພັດທະນາແກ່ ສປປ ລາວ ໃນມູນຄ່າສູງສົມຄວນ, ໃນທ້າຍປີ 2014 ສະຫະພາບເອີຣົບ ໄດ້ຕົກລົງ ໃຫ້ການຊ່ວຍເຫຼືອແກ່ ສປປ ລາວ ເປັນໄລຍະຍາວ ຄື ແຕ່ປີ 2014-2020, ດ້ວຍມູນຄ່າ 207 ລ້ານເອີໂຣ, ໂດຍໄດ້ແບ່ງອອກເປັນ 2 ໄລຍະ ຄື ສົກປີ 2014-2015, ຈໍານວນ 45 ລ້ານເອີໂຣ ແລະ ສົກປີ 2016-2020, ຈໍານວນ 162 ລ້ານເອີໂຣ, ເຊິ່ງເນັ້ນໃສ່ວຽກງານທາງດ້ານ ການພັດທະນາ ຊັບພະຍາກອນມະນຸດ, ການສຶກສາຂັ້ນພື້ນຖານ, ດ້ານສາທາລະນະສຸກ, ດ້ານວຽກງານສິດທິມະນຸດ ແລະ ກົດໝາຍ, ດ້ານການປົກຄອງທີ່ດີ ແລະ ອື່ນໆ.

ຂ່າວ: ສົມ​ຫວັງ ພາບ: ​ສະຫວາດ (ຂປລ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.