Header Ads

ເມືອງປາກເຊທຳລາຍນ້ຳມັນເຄື່ອງປອມມູນຄ່າເກືອບຮ້ອຍລ້ານກີບ





ໃນວັນທີ15 ພະຈິກ 2017 ຜ່ານມາທີ່ສູນຂີ້ເຫຍື່ອຫຼັກ 17 ເມືອງຊະນະສົມບູນ ຫ້ອງການອຸດສາຫະກຳ ແລະ ການຄ້າເມືອງປາກເຊ ໄດ້ຈັດພິທີທຳລາຍນ້ຳມັນເຄື່ອງລົດຈັກປອມແປງລອກຮຽນແບບທີ່ບໍ່ໄດ້ຄຸນນະພາບມູນຄ່າເກືອບຮ້ອຍລ້ານກີບ ພ້ອມທັງປັບໃໝ ແລະ ດຳເນີນມາດຕະການທາງກົດໝາຍຕໍ່ຜູ້ກະທຳຜິດ. ໂດຍການເຂົ້າຮ່ວມຂອງທ່ານ ອ່ອນແກ້ວ ເພັດພູມີ ຮອງເຈົ້າເມືອງໆປາກເຊ ມີທ່ານ ບຸນປອນ ກອງມະນີ ຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງປາກເຊ ພ້ອມດ້ວຍຂະແໜງ ການທີ່ກ່ຽວຂ້ອງຂັ້ນແຂວງ ແລະ ເມືອງເຂົ້າຮ່ວມເປັນສັກຂີພິຍານ.

ໃນພິທີ ທ່ານ ບຸນປອນ ກອງມະນີ ໄດ້ຂຶ້ນລາຍງານຜົນການກວດຢຶດສິນຄ້າດັ່ງກ່າວວ່າ:ໃນວັນທີ 11 ກັນຍາ 2017 ເຈົ້າໜ້າທີ່ການຄ້າເມືອງປາກເຊ ໄດ້ສົມທົບກັບພາກສ່ວນທີ່ກ່ຽວຂ້ອງຂັ້ນເມືອງ ລົງກວດເຮືອນຂອງທ້າວ ຫຼິວສຽວປໍ ຄົນສັນຊາດຈີນ ຢູ່ບ້ານປາກເຊ ເມືອງປາກເຊ ແຂວງຈຳປາສັກທີ່ທຳການຜະລິດນ້ຳມັນເຄື່ອງບໍ່ຖືກຕ້ອງສອດຄ່ອງກັບລະບຽບການ, ບໍ່ມີໃບທະບຽນວິສາຫະກິດ,ບໍ່ມີໃບອະນຸຍາດດຳເນີນກິດຈະການໂຮງງານ, ບໍ່ມີໃບເສຍພັນທະອາກອນ ແລະ ເອກະສານຢັ້ງຢືນຈາກພາກສ່ວນກ່ຽວຂ້ອງຂອງລັດ ທັງເປັນການປອມແປງ ແລະ ລອກຮຽນແບບເຄື່ອງໝາຍສິນຄ້ານ້ຳເຄື່ອງລົດຈັກ Shell Adcance ຂອງບໍລິສັດລາວອິນເຕີຄອນຊາວ ເຊິ່ງເປັນຕົວແທນຈຳໜ່າຍຢູ່ລາວ. ສໍາລັບລາຍການກວດຢຶດ ແລະ ນໍາມາທໍາລາຍຄັ້ງນີ້ປະກອບມີ: ກະຖັງເຫຼັກນ້ຳມັນເຄື່ອງ 200 ລິດ 2 ຖັງ, ກະຖັງຢາງ 700 ລິດ 2 ຖັງ, ເຕົ້າອິ້ວນໍ້າມັນ, ສະຕິກເກີກະຕຸກນ້ໍາມັນ 8 ແກັດ, ຈັກລີດສະຕິກເກີ, ໂຕະເຄື່ອງມືນຳໃຊ້ເຂົ້າໃນການຜະລິດ ແລະ ນ້ຳມັນເຄື່ອງກະຕຸກນ້ອຍ 62 ແກັດ ລວມມູນຄ່າ 23 ລ້ານກວ່າກີບ ແລະ ສິນຄ້າຈຳນວນໜຶ່ງທີ່ນຳໄປທຳລາຍແລ້ວເຊັ່ນ: ກະຕຸກເປົ່າ,ແກັດໃສ່ນ້ຳມັນເຄື່ອງ ມູນຄ່າ 59 ລ້ານກວ່າກີບ. 
 
ທ່ານ ບຸນປອນ ກອງມະນີ ໃຫ້ຮູ້ຕື່ມວ່າ: ສຳລັບວິທີທຳລາຍສິນຄ້າດັ່ງກ່າວທາງພາກລັດໄດ້ທຳການຂຸດຫຼຸມຝັງດິນ. ສ່ວນຜູ້ກະທຳຜິດໄດ້ຖືກປັບໃໝຕື່ມອີກຈຳນວນ 35 ລ້ານກວ່າກີບໃນຂໍ້ຫາປອມແປງສິນຄ້າ, ດຳເນີນກິດຈະການໂດຍບໍ່ມີໃບທະບຽນວິສາຫະກິດ, ບໍ່ມີໃບອະນຸຍາດດຳເນິນກິດຈະການໂຮງງານ, ພ້ອມທັງສົ່ງມອບຜູ້ຕ້ອງຫາໃຫ້ແກ່ເຈົ້າໜ້າທີ່ຕຳຫຼວດເພື່ອດຳເນີນຄະດີຕາມລະບຽບກົດໝາຍ. 

 ຂ່າວ-ພາບ: ຄຳຫຼ້າ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.