Header Ads

ລັດຖະບານຍີ່ປຸ່ນ ສະໜອງທຶນ 4 ແສນກວ່າໂດລາ ພັດທະນາການສຶກສາ ຢູ່ແຂວງບໍ່ແກ້ວ



ລັດຖະບານຍີ່ປຸ່ນ ສະໜອງທຶນຊ່ວຍເຫລືອລ້າ ມູນຄ່າ 430.929 ໂດລາສະຫະລັດ ແກ່ ສປປ ລາວ ເພື່ອກໍ່ສ້າງສິ່ງອຳນວຍຄວາມສະດວກ ຢູ່ໂຮງຮຽນມັດທະຍົມສຶກສາ ແລະ ສະໜັບ ສະໜູນການຮຽນຮູ້ ກ່ຽວກັບບົດບາດຍິງ-ຊາຍ ຢູ່ ແຂວງບໍ່ແກ້ວ ເຊິ່ງພິທີເຊັນສັນຍາໂຄງການ ຊ່ວຍ ເຫລືອດັ່ງກ່າວ, ໄດ້ມີຂຶ້ນໃນວັນທີ 28 ພະຈິກ 2017 ນີ້, ຢູ່ນະຄອນຫລວງວຽງຈັນ ລະຫວ່າງທ່ານ ທາເຄຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ກັບທ່ານ ນາງ ຈິຢະ ນະງະຊິມະ ຜູ້ຮັບຜິດຊອບໂຄງການ Plan International Japan (PIJ), ​ໂດຍ​ມີ​ພາກ​ສ່ວນ​ກ່ຽວຂ້ອງຂອງ​ທັງ​ສອງ​ຝ່າຍ ​ເຂົ້າ​ຮ່ວມ​ເປັນ​ສັກຂີ​ພິຍານ.



ໂຄງການ “ການ​ເຜີຍ​ແຜ່​ຄວາມ​ສະ​ເໝີ​ພາບ​ບົດບາດ​ຍິງ-ຊາຍ ​ເພື່ອ​ການ​ສຶກສາ ຂັ້ນມັດທະຍົມ ທີ່ດີຂຶ້ນຂອງນັກຮຽນຍິງ” ນີ້ແມ່ນສືບຕໍ່ເປັນປີທີສອງແລ້ວ ເຊິ່ງມີເປົ້າໝາຍຈະສ້າງສະພາບ ແວ້ດລ້ອມ ໂຮງຮຽນທີ່ມີຄວາມລະອຽດອ່ອນ ຕໍ່ບົດບາດ ຍິງ-ຊາຍ ແລະ ພັດທະນາທັກສະກະຍະພາບຂອງຄູ, ນັກຮຽນມັດທະຍົມສຶກສາ ແລະ ຊຸມຊົນໃຫ້ສາມາດເຜີຍແຜ່ຄວາມສະເໜີພາບຍິງ-ຊາຍ. ໂຄງການນີ້ ແນໃສ່ໂຮງຮຽນມັດທະຍົມສຶກສາ ໃນເມືອງຜາອຸດົມ ແຂວງ ບໍ່ແກ້ວ ເຊິ່ງເປັນເມືອງ ທີ່ມີຄວາມທຸກຍາກ ແລະ ກັນດານທີ່ສຸດ ປະຊາກອນສ່ວນຫລາຍແມ່ນ ຊົນເຜົ່າກຸ່ມນ້ອຍ ຍັງຖືຮີດຄອງແບບດັ່ງເດີມ ຄື: ບໍ່ສົ່ງເສີມໃຫ້ຜູ້ຍິງຮຽນສູງ, ເຮັດແຕ່ງານບ້ານ, ແຕ່ງງານໄວ, ໂຮງຮຽນຫ່າງໄກຈາກໝູ່ບ້ານ ສິ່ງດັ່ງກ່າວ, ກາຍເປັນ ອຸປະສັກອັນໃຫຍ່ຫລວງ ໃຫ້ແກ່ເດັກ ຍິງໃນການໄດ້ຮັບການສຶກສາ.

ເພື່ອແກ້ໄຂບັນຫາດັ່ງກ່າວ, ໂຄງການໄດ້ຈັດຕັ້ງກິດຈະກຳສົ່ງເສີມການຮຽນ ໃນຫລາຍຮູບການ ເປັນຕົ້ນແມ່ນສ້າງຫໍພັກນັກສຶກສາຍິງ-ຊາຍ ພ້ອມເຮືອນຄົວ, ຫ້ອງນ້ຳຍິງ-ຊາຍ, ລະບົບນໍ້າປະປາ ແລະ ສິ່ງອຳນວຍຄວາມສະດວກຕ່າງໆ. ນອກນີ້, ຍັງຝຶກອົບຮົມໃຫ້ກັບບັນດາອາຈານ, ຜູ້ປົກຄອງ ເພື່ອໃຫ້ຄວາມຮູ້ພື້ນຖານ ຂອງບົດບາດຍິງ-ຊາຍ ແລະ ເຫັນເຖິງຄວາມ ສຳຄັນຂອງ ການສຶກສາ.

ຂ່າວ: ກິດຕາ;​ ພາບ: ເກດສະໜາ  (ສໍານັກຂ່າວສານປະເທດລາວ)
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.