Header Ads

ຮອງເຈົ້າແຂວງເຊກອງເຄື່ອນໄຫວສຳຫຼວດແຫຼ່ງທ່ອງທ່ຽວ 2 ເຂດຈຸດສຸມ ​ເມືອງ​ທ່າ​ແຕງ.




ໃນວັນທີ 12 ພະຈິກ 2017 ນີ້, ທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ ໄດ້ລົງເຄື່ອນໄຫວສຳຫຼວດພື້ນທີ່ແຫຼ່ງທ່ອງທ່ຽວທຳມະຊາດຢູ່ເຂດຈຸດສຸມພັດທະນາທີ 1 ແລະ ທີ 3 ເມືອງທ່າແຕງ ແຂວງເຊກອງ ໂດຍມີທ່ານ ຄຳໄພ ສິມມາວັດ ຮອງເຈົ້າເມືອງທ່າແຕງ ພ້ອມດ້ວຍຂະແໜງການກ່ຽວຂ້ອງທັງຂັ້ນແຂວງ ແລະ ເມືອງເຂົ້າຮ່ວມສຳຫຼວດ.





ການລົງສໍາຫຼວດພື້ນທີ່ແຫຼ່ງທ່ອງທ່ຽວທໍາມະຊາດໃນຄັ້ງນີ້ ​ໄດ້​ສໍາ​ຫຼວດ​ແຫຼ່ງທ່ອງ​ທ່ຽວ​ນໍ້າຕົກຕາດໄຟໄໝ້ບ້ານປະແຫຼງໄຕ້ ແລະ ແຫຼ່ງທ່ອງທ່ຽວທໍາມະຊາດນໍ້າຕົກຕາດຕະມໍຮອນ ບ້ານແສນ ເຊິ່ງແຫຼ່ງທ່ອງທ່ຽວທຳມະຊາດທັງສອງແຫ່ງມີຄວາມ​ສວຍ​ງາມ ​ໂດຍ​ສະ​ເພາະນໍ້າຕົກຕາດໄຟໄໝ້ມີຄວາມສູງກ່ວາ 50 ແມັດ, ກ້ວາງ 20 ແມັດ ເປັນຕາດທີ່ມີນໍ້າໄຫຼ​ໃສ​ເຢັນ​ຕະຫຼອດ​ປີ ທີ່​ໄຫຼມາຈາກຫ້ວຍລະວັນ ເຊິ່ງມີເນື້ອທີ່ພັດທະນາ 68 ເຮັກຕາ, ສ່ວນແຫຼ່ງທ່ອງທ່ຽວທໍາມະຊາດນໍ້າຕົກຕາດຕະມໍຮອນບ້ານແສນໄຕ້ເປັນຕາດທີ່ມີນໍ້າໄຫຼຜ່ານມາຈາກຫ້ວຍນໍ້າໄສ ມີຄວາມສູງປະມານ 50 ​ແມັດ ແລະ ກ້ວາງ​ເກືອບ 20 ​ແມັດເຊັນ​ດຽວກັນກັບ​ຕາດ​ໄຟ​ໄໝ້, ພາຍຫຼັງສຳຫຼວດແຫຼ່ງທ່ອງທ່ຽວທຳມະຊາດນໍ້າຕົກຕາດ 2 ຈຸດດັ່ງກ່າວແລ້ວ, ທ່ານ ຮອງເຈົ້າແຂວງເຊກອງຍັງຈະສືບຕໍ່ສຳຫຼວດພື້ນທີ່ແຫຼ່ງທ່ອງທ່ຽວທໍາມະຊາດນໍ້າຕົກຕາດອີກຫຼາຍແຫ່ງເປັນຕົ້ນ: ແຫຼ່ງທ່ອງທ່ຽວທຳມະຊາດນໍ້າຕົກຕາດຊຽງຍືນ , ແຫຼ່ງທ່ອງທ່ຽວທຳມະຊາດນໍ້າຕົກຕາດລາ ແລະ ບ່ອນອື່ນໆຈໍານວນ​ນື້ງ. ປະຈຸບັນທົ່ວເມືອງທ່າແຕງມີແຫຼ່ງທ່ອງທ່ຽວທີ່ຂຶ້ນບັນຊີແລ້ວ 9 ແຫ່ງ ແລະ ເປີດບໍລິການແລ້ວ 4 ແຫ່ງຄື: ແຫຼ່ງທ່ອງທ່ຽວກະສິກຳກະເຟສີໜຸກ, ສວນອາຫານໜອງເປັດ, ວັດທະນທຳວິຖີຊີວິດບ້ານກົກພຸງໄຕ້ ແລະ ວັດທະນະທຳຊົນເຜົ່າກະຕູບ້ານກັນດອນ

ການ​ສໍາ​ຫຼວດຄັ້ງ​ນີ້, ​​ໄດ້​ເກັບ​ກໍາ​ຂໍ້​ມູນ ບັນດາ​ແຫຼ່ງທ່ອງ​ທ່ຽວ ​ເພື່ອ​ເປັນຂໍ້​ມູນ​ພື້ນຖານ​ໃນ​ການວາງ​ແຜນ​ພັດທະນາ ທັງ​ເປັນ​ການເປີດໂອກາດໃຫ້ນັກລົງທຶນເຂົ້າມາພັດທະນາແຫຼ່ງທ່ອງທ່ຽວດັ່ງກ່າວໃຫ້ມີ​ການ​ພັດທະນາດີຂື້ນ, ພ້ອມ​ນັ້ນ ກໍ່​ເພື່ອ ​ໂຄສະນາ​ເຜີຍ​ແຜ່ ​ເພື່ອທ່າ​ແຮງ​ທາງ​ດ້ານ​ການທ່ອງທ່ຽວ​ຂອງ​ເມືອງ​ທ່າ​ແຕງ ​ໃຫ້ສາມາດດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ອງທ່ຽວຢູ່ແຂວງເຊກອງກໍຄືເມືອງທ່າແຕງໃຫ້ນັບ​ມື້​ນັບຫຼາຍຂຶ້ນ ​ໂດຍ​ສະ​ເພາະໃນໂອກາດເປີດປີທ່ອງທ່ຽວລາວ ປີ 2018 ທີ່​ແຂວງ​ເຊ​ກອງ​ຈະ​ມີ​ພິທີ​ເປີດ​ຢ່າງ​ເປັນ​ທາງ​ການ ​ໃນ​ວັນ​ທີ 31 ທັນວາ 2017 ນີ້.

ທີ່ມາ: ຂ່າວແຂວງເຊກອງ
 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.