Header Ads

ແຂວງວຽຈັນ ຖະແຫລງຂ່າວງານບຸນຊ່ວງເຮືອປະເພນີປະຈຳປີ 2017



ພິທີຖະແຫລງຂ່າວງານບຸນຊ່ວງເຮືອປະເພນີ ປະຈຳປີ 2017 ຂອງແຂວງວຽງຈັນ ໄດ້ຈັດຂຶ້ນທີ່ຫ້ອງວ່າການປົກຄອງເມືອງວຽງຄຳ ໂດຍແມ່ນ ທ່ານ ພອນແກ້ວ ຂຸນພົນ ເຈົ້າເມືອງໆວຽງຄຳ ເປັນຜູ້ຖະ ແຫລງຂ່າວເຊິ່ງທ່ານໄດ້ກ່າວວ່າ: ງານບຸນຊ່ວງເຮືອປີນີ້ເປັນງານຊ່ວງເຮືອປະເພນີຊາຍ ແລະ ເຮືອກິລາ12 ສີພາຍຍິງ-ຊາຍ ເຊິ່ງຈະໄດ້ຈັດການແຂ່ງຂັນຂຶ້ນໃນລະຫວ່າງວັນທີ 25-26 ພະຈິກ 2017 ສະຖານທີ່ແຂ່ງຂັນແມ່ນໄດ້ກຳນົດເອົາສາຍນໍ້າງຶ່ມສອງຟາກຝັ່ງລະຫວ່າງບ້ານປາກກະຍຸງ,ບ້ານເມືອງເກົ່າ ແລະ ບ້ານທ່າໂພໄຊເມືອງວຽງຄຳ,ຄືໃນວັນເສົາທີ 25 ພະຈິກ 2017 ເວລາ 9:30 ໂມງ ແຂ່ງຂັນຊ່ວງເຮືອກິລາ 12 ສີພາຍຍິງ-ຊາຍ,ວັນອາທິດວັນທີ 26 ພະຈິກ 2017 ເວລາ 9:30 ໂມງ ແຂ່ງຂັນຊ່ວງເຮືອປະເພນີຊາຍ.ທ່ານເຈົ້າເມືອງໆວຽງຄຳກ່າວຕື່ມອີກວ່າ: ການຈັດງານບຸນຊ່ວງເຮືອຄັ້ງນີ້ ກໍ່ເພື່ອເປັນການອານຸລັກຮັກສາຮີດຄອງປະເພນີອັນດີງານຂອງປະຊາຊົນຊາວແຂວງວຽງຈັນ ເວົ້າສະເພາະແມ່ນຊາວລ່ອງງຶ່ມທີ່ເຄີຍປະຕິ ບັດມາແຕ່ລຸ້ນປູ່ຍ່າຕາຍາຍ ກ່ຽວກັບງານບຸນຊ່ວງເຮືອປະເພນີໃຫ້ຍືນຍົງຄົງຕົວຢູ່ຄູ່ຊາວແຂວງວຽງຈັນຕະ ຫຼອດໄປ ທັງເປັນການສ້າງສັນຄວາມສາມັກຄີມິດຕະພາບຂອງປະຊາຊົນບັນດາເຜົ່າ ທັງເປັນການສົ່ງເສີມການທ່ອງທ່ຽວທາງດ້ານວັດທະນະທຳຮີດຄອງປະເພນີ ຢູ່ພາຍໃນແຂວງວຽງຈັນ ໃຫ້ມີບັນຍາກາດຟົດຟື້ນມ່ວນຊື່ນ,ທັງເປັນການຝຶກແອບທົດສອບນັກກິລາພາຍເຮືອຂອງແຂວງ ແລະ ຊີງຂັນໝູນວຽນ ແລະ ຂັນຂອງທ່ານເຈົ້າແຂວງໆວຽງຈັນອີກດ້ວຍ.





ໃນຕອນທ້າຍທ່ານເຈົ້າເມືອໆວຽງຄຳໃນນາມຄະນະປະທານຈັດງານບຸນຊ່ວງເຮືອຄັ້ງນີ້ ຍັງໄດ້ຂໍເຊີນຊວນພໍ່ແມ່,ພີ່ນ້ອງຊາວແຂວງວຽງຈັນ,ຊາວຕ່າງແຂວງ ແລະ ຊາວຕ່າງປະເທດ ເຂົ້າມາທ່ຽວຊົມ ແລະ ຮ່ວມຊົມຮ່ວມເຊຍໃນການແຂ່ງຂັນກິລາຊ່ວງເຮືອປະເພນີປະຈຳປີ 2017 ຂອງແຂວງວຽງຈັນນຳພວກເຮົາດ້ວຍ.


ພາບ-ຂ່າວ ໂດຍ : ບຸນມາ ແກ້ວບຸດດາ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.