Header Ads

ປະ​ທານ​ສະ​ມາ​ຄົມ​ມິດ​ຕະ​ພາບ​ລາວ​ຈີນ​ກ່າວ​ວ່າ ການ​ຢ້ຽມ​ຢາມ​ລາວ​ຂອງ​ທ່ານ​ສີ​ຈິ້ນ​ຜິງ​ຈະ​ປະ​ກອບ​ສ່ວນ​ເສີມ​ຂະ​ຫຍາຍ​ສາຍ​ພົວ​ພັນ​ລາວ-ຈີນ​ໃຫ້​ແໜ້ນ​ຟື້ນ​ຍິ່ງ​ຂຶ້ນ




ວັນ​ທີ 8 ພະ​ຈິກ​ນີ້, ທ່ານຄຳ​ມະ​ນີ ອິນ​ທິ​ລາດ ລັດ​ຖະ​ມົນ​ຕີ​ກະ​ຊວງ​ພະ​ລັງ​ງານ​ແລະບໍ່​ແຮ່ ທັງ​ເປັນ​ປະ​ທານ​ສະ​ມາ​ຄົມ​ມິດ​ຕະ​ພາບ​ລາວ​ຈີນ​ໄດ້​ໃຫ້​ສຳ​ພາດ​ຕໍ່​ສື່ມວນ​ຊົນ​ຈີນ​ແລະ​ລາວ​ເປັນ​ຕົ້ນ ວິ​ທະ​ຍຸ​ສາ​ກົນ​ແຫ່ງ​ປະ​ເທດ​ຈີນCRIແລະ​ຂ່າວ​ສານ​ປະ​ເທດ​ລາວ​ໂດຍ​ຢືນ​ຢັນ​ວ່າ ​ການ​ທີ່​ທ່ານ​ສີ​ຈິ້ນ​ຜິງ ​ເລ​ຂາ​ທິ​ການ​ໃຫຍ່​ສູນ​ກາງ​ພັກ​ກອມ​ມູ​ນິດ​ຈີນ, ປະ​ທານ​ປະ​ເທດ​ຈີນ​ຈະ​ຢ້ຽມ​ຢາມ ​ສ​ປ​ປ ລາວທາງ​ລັດ​ຖະ​ກິດ​ໃນ​ໄວໆ​ນີ້​ເປັນ​ຂີດ​ໝາຍ​ສຳ​ຄັນ​ແຫ່ງ​ສາຍ​ພົວ​ພັນ​ມິດ​ຕະ​ພາບ​​ລາວ​ຈີນ ເຊິ່ງ​ຈະ​ເປັນ​ການ​ປະ​ກອບ​ສ່ວນເສີມ​ຂະ​ຫຍາຍ​ມິດ​ຕະ​ພາບ​ທີ່​ເປັນ​ມູນ​ເຊື້ອ​ກໍ​ຄື​ສາຍ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ​ລະ​ຫວ່າງ​ສອງ​ປະ​ເທດ​ໃຫ້​ຂະ​ຫຍາຍ​ຕົວ​ກ້າວ​ສູ່​ລວງ​ເລິກ.

ທ່ານ​ຄຳ​ມະ​ນີ ກຳ​ມະ​ການ​ສູນ​ກາງ​ພັກ​ປະ​ຊາ​ຊົນ​ປະ​ຕິ​ວັດ​ລາວ, ລັດ​ຖະ​ມົນ​ຕີ​ກະ​ຊວງ​ພະ​ລັງ​ງານ​ແລະ​ບໍ່​ແຮ່ ຢືນ​ຢັນ​ວ່າ ພັກ-ລັດ​ແລະ​ປະ​ຊາ​ຊົນ​ລາວຄອງ​ຄອຍ​​ເປັນ​ຢ່າງ​ຍິ່ງຕໍ່​ການ​ເດີນ​ທາງ​ຢ້ຽມ​ຢາມ​ລາວ​ທາງ​ລັດ​ຖະ​ກິດ​ຂອງ​ທ່ານ​ສີ​ຈິ້ນ​ຜິງ ປະ​ທານ​ປະ​ເທດ​ສ​ປ​ຈີນ​ໃນ​ໄວໆ​ນີ້. ທ່ານ​ກ່າວ​ວ່າ:

“ໃນປັດຈຸບັນນີ້, ພັກ, ລັດ ແລະ ປະຊາຊົນລາວພວມກະກຽມໃຫ້ແກ່ການຕ້ອນຮັບການມາຢ້ຽມຢາມ ສປປ ລາວ ຢ່າງເປັນທາງການຂອງ ປະທານ ສີຈິ້ນຜິງດ້ວຍບັນຍາກາດທີ່ເບີກບານມ່ວນຊື່ນ, ຟົດຟື້ນເປັນຢ່າງບິ່ງ ແລະ ຂ້າພະເຈົ້າມີຄວາມເຊື່ອໝັ້ນວ່າ : ຜ່ານການຢ້ຽມຢາມ ສປປ ລາວ ຂອງທ່ານ ປະທານ ສີຈິ້ນຜິງ ເທື່ອນີ້ຈະເປັນນິມິດໝາຍທີ່ດີ, ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການພົວພັນຮ່ວມມືແບບຄູ່ຮ່ວມຍຸດທະສາດ ລະຫວ່າງລາວ-ຈີນ ຈົ່ງສືບຕໍ່ໄດ້ຮັບການພັດທະນາໃຫ້ຂະຫຍາຍຕົວຢ່າງບໍ່ຢຸດຢັ້ງ.”

ທ່ານ​ຄຳ​ມະ​ນີ ອິນ​ທິ​ລາດ​ກ່າວ​ວ່າ: ລາວ​ແລະ​ຈີນ​ມີ​ການ​ຮ່ວມ​ມື​ທີ່​ດີ​ແລະ​ມີ​ປະ​ສິດ​ທິ​ຜົນ​ໃນ​ການ​ພັດ​ທະ​ນາ​ພະ​ລັງ​ງານ​ແລະ​ບໍ່​ແຮ່ ຕົວ​ຢ່າງ​ເຊັ່ນ, ໂຄງ​ການ​ເຄືອ​ຂ່າຍ​ໄຟ​ຟ້າ​ພາກ​ເໜືອ​ລາວ​ຂະ​ໜາດ 230.000 ວົນ​ທີ່​ຈີນ​ຮັບ​ເໝົາ​ກໍ່​ສ້າງ, ຈີນ​ຊ່ວຍ​ເຫຼືອຫຼ້າ​ໃນ​ການ​ແຕ້ມ​ແຜນ​ທີ່​ທໍ​ລະ​ນີ​ທົ່ວ​ປະ​ເທດ​ລາວ​ແລະ​ອື່ນໆ ທັງ​ນີ້​ລ້ວນ​ແຕ່​ເປັນ​​ສ່ວນ​ປະ​ກອບ​ສຳ​ຄັນ​ຂອງ​ສາຍ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບ​ດ້ານ​ລະ​ຫວ່າງ​ສອງ​ປະ​ເທດ. ທ່ານ​ກ່າວ​ວ່າ:

"ການຮ່ວມມືໃນການພັດທະນາຂະແໜງພະລັງງານ ແລະ ບໍ່ແຮ່ ລະຫວ່າງ ລາວ ແລະ ຈີນ ແມ່ນບັນຫາໜຶ່ງທີ່ສໍາຄັນ ແລະ ນອນຢູ່ໃນກອບການຮ່ວມມືລວມທີ່ສອງພັກ, ສອງລັດ ແລະ ສອງຂະແໜງ ການໄດ້ຕົກລົງກັນຢູ່ໃນສັນາຍາມິດຕະພາບ ແລະ ການຮ່ວມມືລາວ-ຈີນໃນໄລຍະໃໝ່. ໃນໄລຍະທີ່ຜ່ານມາ, ການຮ່ວມມືເພື່ອພັດທະນາ ດ້ານພະລັງງານພະລັງງານ ແລະ ບໍ່ແຮ່ ລະຫວ່າງ ສປປ ລາວ ແລະ ສປ ຈີນ ແມ່ນການຮ່ວມມືທີ່ດີ ແລະ ມີປະສິດທິຜົນ. ໃນນີ້, ການມາລົງທຶນຂອງຜູ້ພັດທະນາຂອງ ສປ. ຈີນ ແມ່ນຖືວ່າຢູ່ໃນອັນດັບຕົ້ນໆ ຊຶ່ງມີມູນຄ່າສູງປະມານ 10 ກວ່າຕື້ໂດລາສະຫະລັດ ແລະ ຈະສືບຕໍ່ຮ່ວມມືກັນຢ່າງມີປະສິດທິຜົນ ໃນຕໍ່ໜ້າ."

ທ່ານ​ຄຳ​ມະ​ນີ ອິນ​ທິ​ລາດ​ໄດ້​ຕີ​ລາ​ຄາ​ສູງ​ຕໍ່​ຂໍ້​ລິ​ເລີ່ມ “ໜຶ່ງ​ແລວ​ທາງ​ໜຶ່ງ​ເສັ້ນ​ທາງ”​ທີ່​ຈີນ​ສະ​ເໜີ​ ໂດຍ​ເຫັນ​ວ່າ​ຂໍ້​ລິ​ເລີ່ມ​ດັ່ງ​ກ່າວ​ໄດ້​ເພີ່ມ​ພະ​ລັງ​ຊຸກ​ດັນ​ເຂົ້າ​ໃນ​ການ​ພັດ​ທ​ນາ​ບັນ​ດາ​ຂົງ​ເຂດ​ຂອງ​ລາວ. ທ່ານ​ກ່າວ​ວ່າ:

"ພາຍໃຕ້ຂໍ້ລິເລີ່ມ “ໜຶ່ງແລວທາງໜຶ່ງເສັ້ນທາງ” ພວກຂ້າພະເຈົ້າເຫັນວ່າ : ການລົງທຶນຂອງ ຈີນ ຢູ່ ສປປ ລາວ ໄດ້ຂະຫຍາຍຕົວດ້ວຍຈັງຫວະທີ່ໄວ, ປະກອບດ້ວຍຫຼາກຫຼາຍຮູບແບບ, ສີສັນ ເຊັ່ນ : ຢູ່ໃນຂະແໜງການພັດທະນາ ອຸດສາຫະກຳພະລັງງານໄຟຟ້າ, ອຸດສາຫະກຳບໍ່ແຮ່, ການແປຮູບຜະລິດຕະພັນກະສິກຳ, ການຄົມມະນາຄົມ-ຂົນສົ່ງ, ການກໍ່ສ້າງພື້ນຖານໂຄງລ່າງ, ການຄ້າ, ການເງິນ, ການທະນາຄານ, ການບໍລິການ ແລະ ຂະແໜງການດ້ານອື່ນໆດ້ວຍມູນຄ່າການລົງທຶນນັບມື້ນັບເພີ່ມຂຶ້ນ. ພິເສດ, ໂຄງການກໍ່ສ້າງເສັ້ນທາງລົດໄຟຄວາມໄວສູງ ລາວ-ຈີນ ມີຄວາມສໍາຄັນຕໍ່ການພັດທະນາເສດຖະກິດ-ສັງຄົມຂອງ ສປປ ລາວ ແລະ ທັງແມ່ນການປະຕິບັດຍຸດທະສາດ ການເຊື່ອມໂຍງດ້ານຄົມມະນາຄົມຂອງ ສປປ ລາວ ຕໍ່ບັນດາປະເທດເພື່ອນມິດໃນໄລຍະໃໝ່."

ປີ​ນີ້​ເປັນ​ປີ​ຄົບ​ຮອບ 56 ປີ​ແຫ່ງ​ການ​ສ້າງ​ຕັ້ງ​ສາຍ​ພົວ​ພັນ​ທາງ​ການ​ທູດ​ລະ​ຫວ່າງ​ລາວ-ຈີນ. ທ່ານ​ຄຳ​ມະ​ນີ ອິນ​ທິ​ລາດ​ເຫັນ​ວ່າ: ປັດ​ຈຸ​ບັນ, ສາຍ​ພົວ​ພັນ​ລາວ​ຈີນ​ກຳ​ລັງ​ຂະ​ຫຍາຍ​ຕົວ​ກ້າວ​ສູ່​ທັງ​ທາງ​ເລິກ​ແລະ​ທາງກວ້າງ ແລະ​ກຳ​ລັງ​ແຕກດອກ​ອອກ​ຜົນ​ຍິ່ງໆ​ຂຶ້ນ. ທ່ານ​ກ່າວ​ວ່າ​: "ສປປ ລາວ ຍາມໃດກໍຖືວ່າການພົວພັນ ລາວ-ຈີນ ແມ່ນການພົວພັນມິດຕະພາບ ທີ່ເປັນມູນເຊຶ້ອ, ແມ່ນການພົວພັນ, ຮ່ວມມືບົນຈິດໃຈ ຄູ່ຮ່ວມຍຸດທະສາດຮອບດ້ານ, ໝັ້ນຄົງ ແລະ ຍາວນານ. ພວກເຮົາ ມີຄວາມພາກພູມໃຈເປັນຢ່າງຍິ່ງທີ່ເຫັນວ່າ : ມິດຕະພາບ, ການພົວພັນ ແລະ ການຮ່ວມມືລະຫວ່າງ ລາວ ແລະ ຈີນ ໄດ້ຮັບການກໍ່ສ້າງ, ທະນຸບຳລຸງ ມາເປັນເວລາຍາວນານ ແລະ ໄດ້ເຕີບໃຫຍ່ຂະຫຍາຍຕົວ, ເກີດດອກອອກຜົນທີ່ງອກງາມ ຕິດພັນກັບຜົນສຳເລັດລວມ ຂອງການພັດທະນາປະເທດຊາດ ເພື່ອກ້າວຂຶ້ນຂອງລາວ ແລະ ຈີນ ຢ່າງໜັກແໜ້ນຕະຫຼອດມາ.

ພາບ ແລະ ຂ່າວ: ຊີອາໄອ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.