Header Ads

ເຊກອງ ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ X






ອົງຄະນະພັກແຂວງເຊກອງ ຈັດກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 5 ຂອງຄະນະບໍລິຫານງານສູນກາງພັກສະໄໝທີ X ຂຶ້ນໃນວັນທີ 29 ພະຈິກ 2017 ນີ້ ຢູ່ທີ່ສະໂມສອນແຂວງ, ໂດຍການເຜີຍແຜ່ຂອງ ສະຫາຍ ຄໍາເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ, ໂດຍມີ ບັນດາຄະນະປະຈໍາພັກແຂວງ, ເມືອງ, ເລຂາ-ຮອງເລຂາຄະນະພັກຮາກຖານ, ໜ່ວຍພັກຮາກຖານ ພ້ອມດ້ວຍກົມກອງອ້ອມຂ້າງແຂວງເຂົ້າຮ່ວມ.


 
ກອງປະຊຸມໄດ້ຮັບຟັງບົດລາຍງານຂອງຄະນະເລຂາທິການສູນກາງພັກກ່ຽວກັບການຕີລາຄາຜົນການຈັດຕັ້ງປະຕິບັດ ມະຕິກອງປະຊຸມສູນກາງພັກ ຄັ້ງທີ 4 ສະໄໝທີ X, ພ້ອມທັງຮັບຟັງການລາຍງານ ກ່ຽວກັບການຕີລາຄາສະພາບການເຄື່ອນໄຫວນຳພາຂອງພັກກ່ຽວກັບໝາກຜົນຂອງການຜັນຂະຫຍາຍໃນແຕ່ລະຂົງເຂດວຽກງານໃນໄລຍະຜ່ານມາ, ທິດທາງລວມ ແລະ ໜ້າທີ່ຈຸດສຸມໃນຕໍ່ໜ້າ ໂດຍສະເພາະແມ່ນຂົງເຂດເສດຖະກິດ ເຫັນວ່າເສດຖະກິດມີການຂະຫຍາຍຕົວຕໍ່ເນື່ອງ ແລະ ໝັ້ນທ່ຽງ ເຊິ່ງສາມາດບັນລຸການເຕີບໂຕຂອງເສດຖະກິດໃນນີ້ລວມຍອດຜະລິດຕະພັນພາຍໃນ ໃນລະດັບ 6,83% ແລະ ຫຼາຍຕົວເລກຄາດໝາຍ ກໍສາມາດປະຕິບັດໄດ້ຕາມແຜນການ ຖືເປັນຜົນສໍາເລັດທີ່ສໍາຄັນ ແລະ ມີຄວາມໝາຍ; ຂົງເຂດວຽກງານປ້ອງກັນຊາດ-ປ້ອງກັນຄວາມສະຫງົບ ແມ່ນສາມາດເຮັດໃຫ້ສະພາບການ ຢູ່ເຂດຫລໍ່ແຫຼມເຂົ້າສູ່ສະພາບປົກກະຕິ, ສະກັດກັ້ນ ແລະ ທັບມ້າງການເຄື່ອນໄຫວມ້າງເພທຳລາຍ ຄວາມສະຫງົບໝັ້ນຄົງໃນສັງຄົມຂອງບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີຢ່າງທັນການ, ບັນລຸຜົນສຳເລັດໃນການປາບປາມຢາເສບຕິດ ແລະ ອາຊະຍາກຳອື່ນໆຈຳນວນໜຶ່ງ; ການຊີ້ນຳຜັນຂະຫຍາຍແນວທາງ, ແຜນນະໂຍບາຍຂອງພັກ ໃນຂົງເຂດວັດທະນະທຳ-ສັງຄົມ ສືບຕໍ່ໄດ້ຮັບການເອົາໃຈໃສ່ຢ່າງຕໍ່ເນື່ອງ ແລະ ສາມາດບັນລຸໄດ້ຕາມເປົ້າໝາຍເປັນກ້າວໆ; ວຽກງານການຕ່າງປະເທດ ກໍໄດ້ມີການເຄື່ອນໄຫວຢ່າງແຂງແຮງສາມາດຊຸກຍູ້ໃຫ້ມີຂໍ້ຕົກລົງຮ່ວມມືສອງຝ່າຍ, ຫລາຍຝ່າຍ ແລະ ອື່ນໆ.



ກອງປະຊຸມຍັງໄດ້ເຊື່ອມຊຶມມະຕິ 26/ຄລສພ ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະ ໃໝ່ ແລະ ເອກະສານສົ່ງເສີມວິສາຫະກິດຂະໜາດນ້ອຍ ແລະ ກາງ ຈາກທ່ານ ເຫຼັກໄຫຼ ສີວິໄລ ຄະນະປະຈໍາພັກແຂວງ ຮອງເຈົ້າແຂວງເຊກອງ. ນອກນີ້, ໃນກອງປະຊຸມຍັງໄດ້ກຳນົດທິດທາງແຜນການຕໍ່ໜ້າໃນແຕ່ລະຂົງເຂດວຽກງານ ແລະ ສືບຕໍ່ຜັນຂະຫຍາຍມະຕິກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 4-5 ສະໄໝທີ X ໂດຍຖືເອົາການເຄື່ອນໄຫວນີ້ ຕິດພັນກັບການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ ກໍຄືການກະກຽມແກ່ເນື້ອໃນກອງປະຊຸມຄົບຄະນະ ຄັ້ງທີ 6 ຂອງຄະນະບໍລິຫານງານສູນກາງພັກສະໄໝທີ X ຂອງພັກ.
ທັງນີ້, ກໍເພື່ອເຮັດໃຫ້ປະເທດຊາດຂອງພວກເຮົາ ສືບຕໍ່ມີສະຖຽນລະພາບດ້ານການເມືອງຢ່າງໜັກແໜ້ນ, ເຂັ້ມແຂງ, ສັງຄົມມີຄວາມສະຫງົບປອດໄພ, ມີຄວາມເປັນລະບຽບຮຽບຮ້ອຍ, ນໍາໃຊ້ກາລະໂອກາດ ແລະ ເງື່ອນໄຂເອື້ອອໍານວຍຂອງສະພາບການພາກພື້ນ ແລະ ສາກົນ ເພື່ອສືບຕໍ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດສູ່ຄວາມມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ມີປະຊາທິປະໄຕ, ຍຸຕິທໍາ ແລະ ສີວິໄລຍິ່ງໆຂຶ້ນ.


ຂ່າວ-ພາບ: ນາລີວັນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.